1. א לדוד מזמור חסד-ומשפט אשירה לך יהוה אזמרה
2. ב אשכילה בדרך תמים-- מתי תבוא אלי אתהלך בתם-לבבי בקרב ביתי
3. ג לא-אשית לנגד עיני-- דבר-בליעל עשה-סטים שנאתי לא ידבק בי
4. ד לבב עקש יסור ממני רע לא אדע
5. ה מלושני (מלשני) בסתר רעהו-- אותו אצמית גבה-עינים ורחב לבב-- אתו לא אוכל
6. ו עיני בנאמני-ארץ-- לשבת עמדי הלך בדרך תמים-- הוא ישרתני
7. ז לא-ישב בקרב ביתי-- עשה רמיה דבר שקרים-- לא-יכון לנגד עיני
8. ח לבקרים אצמית כל-רשעי-ארץ להכרית מעיר-יהוה כל-פעלי און