איכה 5 : 1 (WLC)
זְכֹר יְהוָה מֶה־הָיָה לָנוּ *הַבֵּיט כ (הַבִּיטָה ק) וּרְאֵה אֶת־חֶרְפָּתֵנוּ׃
איכה 5 : 2 (WLC)
נַחֲלָתֵנוּ נֶהֶפְכָה לְזָרִים בָּתֵּינוּ לְנָכְרִים׃
איכה 5 : 3 (WLC)
יְתֹומִים הָיִינוּ *אֵין כ (וְאֵין ק) אָב אִמֹּתֵינוּ כְּאַלְמָנֹות׃
איכה 5 : 4 (WLC)
מֵימֵינוּ בְּכֶסֶף שָׁתִינוּ עֵצֵינוּ בִּמְחִיר יָבֹאוּ׃
איכה 5 : 5 (WLC)
עַל צַוָּארֵנוּ נִרְדָּפְנוּ יָגַעְנוּ *לֹא כ (וְלֹא ק) הוּנַח־לָנוּ׃
איכה 5 : 6 (WLC)
מִצְרַיִם נָתַנּוּ יָד אַשּׁוּר לִשְׂבֹּעַ לָחֶם׃
איכה 5 : 7 (WLC)
אֲבֹתֵינוּ חָטְאוּ *אֵינָם כ (וְאֵינָם ק) אֲנַחְנוּ כ (וַאֲנַחְנוּ ק) עֲוֹנֹתֵיהֶם סָבָלְנוּ׃
איכה 5 : 8 (WLC)
עֲבָדִים מָשְׁלוּ בָנוּ פֹּרֵק אֵין מִיָּדָם׃
איכה 5 : 9 (WLC)
בְּנַפְשֵׁנוּ נָבִיא לַחְמֵנוּ מִפְּנֵי חֶרֶב הַמִּדְבָּר׃
איכה 5 : 10 (WLC)
עֹורֵנוּ כְּתַנּוּר נִכְמָרוּ מִפְּנֵי זַלְעֲפֹות רָעָב׃
איכה 5 : 11 (WLC)
נָשִׁים בְּצִיֹּון עִנּוּ בְּתֻלֹת בְּעָרֵי יְהוּדָה׃
איכה 5 : 12 (WLC)
שָׂרִים בְּיָדָם נִתְלוּ פְּנֵי זְקֵנִים לֹא נֶהְדָּרוּ׃
איכה 5 : 13 (WLC)
בַּחוּרִים טְחֹון נָשָׂאוּ וּנְעָרִים בָּעֵץ כָּשָׁלוּ׃
איכה 5 : 14 (WLC)
זְקֵנִים מִשַּׁעַר שָׁבָתוּ בַּחוּרִים מִנְּגִינָתָם׃
איכה 5 : 15 (WLC)
שָׁבַת מְשֹׂושׂ לִבֵּנוּ נֶהְפַּךְ לְאֵבֶל מְחֹלֵנוּ׃
איכה 5 : 16 (WLC)
נָפְלָה עֲטֶרֶת רֹאשֵׁנוּ אֹוי־נָא לָנוּ כִּי חָטָאנוּ׃
איכה 5 : 17 (WLC)
עַל־זֶה הָיָה דָוֶה לִבֵּנוּ עַל־אֵלֶּה חָשְׁכוּ עֵינֵינוּ׃
איכה 5 : 18 (WLC)
עַל הַר־צִיֹּון שֶׁשָּׁמֵם שׁוּעָלִים הִלְּכוּ־בֹו׃ פ
איכה 5 : 19 (WLC)
אַתָּה יְהוָה לְעֹולָם תֵּשֵׁב כִּסְאֲךָ לְדֹר וָדֹור׃
איכה 5 : 20 (WLC)
לָמָּה לָנֶצַח תִּשְׁכָּחֵנוּ תַּעַזְבֵנוּ לְאֹרֶךְ יָמִים׃
איכה 5 : 21 (WLC)
הֲשִׁיבֵנוּ יְהוָה ׀ אֵלֶיךָ *וְנָשׁוּב כ (וְנָשׁוּבָה ק) חַדֵּשׁ יָמֵינוּ כְּקֶדֶם׃
איכה 5 : 22 (WLC)
כִּי אִם־מָאֹס מְאַסְתָּנוּ קָצַפְתָּ עָלֵינוּ עַד־מְאֹד׃
❮
❯