יהושע 15 : 1 (WLC)
וַיְהִי הַגֹּורָל לְמַטֵּה בְּנֵי יְהוּדָה לְמִשְׁפְּחֹתָם אֶל־גְּבוּל אֱדֹום מִדְבַּר־צִן נֶגְבָּה מִקְצֵה תֵימָן׃
יהושע 15 : 2 (WLC)
וַיְהִי לָהֶם גְּבוּל נֶגֶב מִקְצֵה יָם הַמֶּלַח מִן־הַלָּשֹׁן הַפֹּנֶה נֶגְבָּה׃
יהושע 15 : 3 (WLC)
וְיָצָא אֶל־מִנֶּגֶב לְמַעֲלֵה עַקְרַבִּים וְעָבַר צִנָה וְעָלָה מִנֶּגֶב לְקָדֵשׁ בַּרְנֵעַ וְעָבַר חֶצְרֹון וְעָלָה אַדָּרָה וְנָסַב הַקַּרְקָעָה׃
יהושע 15 : 4 (WLC)
וְעָבַר עַצְמֹונָה וְיָצָא נַחַל מִצְרַיִם *וְהָיָה כ (וְהָיוּ ק) תֹּצְאֹות הַגְּבוּל יָמָּה זֶה־יִהְיֶה לָכֶם גְּבוּל נֶגֶב׃
יהושע 15 : 5 (WLC)
וּגְבוּל קֵדְמָה יָם הַמֶּלַח עַד־קְצֵה הַיַּרְדֵּן וּגְבוּל לִפְאַת צָפֹונָה מִלְּשֹׁון הַיָּם מִקְצֵה הַיַּרְדֵּן׃
יהושע 15 : 6 (WLC)
וְעָלָה הַגְּבוּל בֵּית חָגְלָה וְעָבַר מִצְּפֹון לְבֵית הָעֲרָבָה וְעָלָה הַגְּבוּל אֶבֶן בֹּהַן בֶּן־רְאוּבֵן׃
יהושע 15 : 7 (WLC)
וְעָלָה הַגְּבוּל ׀ דְּבִרָה מֵעֵמֶק עָכֹור וְצָפֹונָה פֹּנֶה אֶל־הַגִּלְגָּל אֲשֶׁר־נֹכַח לְמַעֲלֵה אֲדֻמִּים אֲשֶׁר מִנֶּגֶב לַנָּחַל וְעָבַר הַגְּבוּל אֶל־מֵי־עֵין שֶׁמֶשׁ וְהָיוּ תֹצְאֹתָיו אֶל־עֵין רֹגֵל׃
יהושע 15 : 8 (WLC)
וְעָלָה הַגְּבוּל גֵּי בֶן־הִנֹּם אֶל־כֶּתֶף הַיְבוּסִי מִנֶּגֶב הִיא יְרוּשָׁלִָם וְעָלָה הַגְּבוּל אֶל־רֹאשׁ הָהָר אֲשֶׁר עַל־פְּנֵי גֵי־הִנֹּם יָמָּה אֲשֶׁר בִּקְצֵה עֵמֶק־רְפָאִים צָפֹנָה׃
יהושע 15 : 9 (WLC)
וְתָאַר הַגְּבוּל מֵרֹאשׁ הָהָר אֶל־מַעְיַן מֵי נֶפְתֹּוחַ וְיָצָא אֶל־עָרֵי הַר־עֶפְרֹון וְתָאַר הַגְּבוּל בַּעֲלָה הִיא קִרְיַת יְעָרִים׃
יהושע 15 : 10 (WLC)
וְנָסַב הַגְּבוּל מִבַּעֲלָה יָמָּה אֶל־הַר שֵׂעִיר וְעָבַר אֶל־כֶּתֶף הַר־יְעָרִים מִצָּפֹונָה הִיא כְסָלֹון וְיָרַד בֵּית־שֶׁמֶשׁ וְעָבַר תִּמְנָה׃
יהושע 15 : 11 (WLC)
וְיָצָא הַגְּבוּל אֶל־כֶּתֶף עֶקְרֹון צָפֹונָה וְתָאַר הַגְּבוּל שִׁכְּרֹונָה וְעָבַר הַר־הַבַּעֲלָה וְיָצָא יַבְנְאֵל וְהָיוּ תֹּצְאֹות הַגְּבוּל יָמָּה׃
יהושע 15 : 12 (WLC)
וּגְבוּל יָם הַיָּמָּה הַגָּדֹול וּגְבוּל זֶה גְּבוּל בְּנֵי־יְהוּדָה סָבִיב לְמִשְׁפְּחֹתָם׃
יהושע 15 : 13 (WLC)
וּלְכָלֵב בֶּן־יְפֻנֶּה נָתַן חֵלֶק בְּתֹוךְ בְּנֵי־יְהוּדָה אֶל־פִּי יְהוָה לִיהֹושֻׁעַ אֶת־קִרְיַת אַרְבַּע אֲבִי הָעֲנָק הִיא חֶבְרֹון׃
יהושע 15 : 14 (WLC)
וַיֹּרֶשׁ מִשָּׁם כָּלֵב אֶת־שְׁלֹושָׁה בְּנֵי הָעֲנָק אֶת־שֵׁשַׁי וְאֶת־אֲחִימַן וְאֶת־תַּלְמַי יְלִידֵי הָעֲנָק׃
יהושע 15 : 15 (WLC)
וַיַּעַל מִשָּׁם אֶל־יֹשְׁבֵי דְּבִר וְשֵׁם־דְּבִר לְפָנִים קִרְיַת־סֵפֶר׃
יהושע 15 : 16 (WLC)
וַיֹּאמֶר כָּלֵב אֲשֶׁר־יַכֶּה אֶת־קִרְיַת־סֵפֶר וּלְכָדָהּ וְנָתַתִּי לֹו אֶת־עַכְסָה בִתִּי לְאִשָּׁה׃
יהושע 15 : 17 (WLC)
וַיִּלְכְּדָהּ עָתְנִיאֵל בֶּן־קְנַז אֲחִי כָלֵב וַיִּתֶּן־לֹו אֶת־עַכְסָה בִתֹּו לְאִשָּׁה׃
יהושע 15 : 18 (WLC)
וַיְהִי בְּבֹואָהּ וַתְּסִיתֵהוּ לִשְׁאֹול מֵאֵת־אָבִיהָ שָׂדֶה וַתִּצְנַח מֵעַל הַחֲמֹור וַיֹּאמֶר־לָהּ כָּלֵב מַה־לָּךְ׃
יהושע 15 : 19 (WLC)
וַתֹּאמֶר תְּנָה־לִּי בְרָכָה כִּי אֶרֶץ הַנֶּגֶב נְתַתָּנִי וְנָתַתָּה לִי גֻּלֹּת מָיִם וַיִּתֶּן־לָהּ אֵת גֻּלֹּת עִלִּיֹּות וְאֵת גֻּלֹּת תַּחְתִּיֹּות׃ פ
יהושע 15 : 20 (WLC)
זֹאת נַחֲלַת מַטֵּה בְנֵי־יְהוּדָה לְמִשְׁפְּחֹתָם׃
יהושע 15 : 21 (WLC)
וַיִּהְיוּ הֶעָרִים מִקְצֵה לְמַטֵּה בְנֵי־יְהוּדָה אֶל־גְּבוּל אֱדֹום בַּנֶּגְבָּה קַבְצְאֵל וְעֵדֶר וְיָגוּר׃
יהושע 15 : 22 (WLC)
וְקִינָה וְדִימֹונָה וְעַדְעָדָה׃
יהושע 15 : 23 (WLC)
וְקֶדֶשׁ וְחָצֹור וְיִתְנָן׃
יהושע 15 : 24 (WLC)
זִיף וָטֶלֶם וּבְעָלֹות׃
יהושע 15 : 25 (WLC)
וְחָצֹור ׀ חֲדַתָּה וּקְרִיֹּות חֶצְרֹון הִיא חָצֹור׃
יהושע 15 : 26 (WLC)
אֲמָם וּשְׁמַע וּמֹולָדָה׃
יהושע 15 : 27 (WLC)
וַחֲצַר גַּדָּה וְחֶשְׁמֹון וּבֵית פָּלֶט׃
יהושע 15 : 28 (WLC)
וַחֲצַר שׁוּעָל וּבְאֵר שֶׁבַע וּבִזְיֹותְיָה׃
יהושע 15 : 29 (WLC)
בַּעֲלָה וְעִיִּים וָעָצֶם׃
יהושע 15 : 30 (WLC)
וְאֶלְתֹּולַד וּכְסִיל וְחָרְמָה׃
יהושע 15 : 31 (WLC)
וְצִקְלַג וּמַדְמַנָּה וְסַנְסַנָּה׃
יהושע 15 : 32 (WLC)
וּלְבָאֹות וְשִׁלְחִים וְעַיִן וְרִמֹּון כָּל־עָרִים עֶשְׂרִים וָתֵשַׁע וְחַצְרֵיהֶן׃ ס
יהושע 15 : 33 (WLC)
בַּשְּׁפֵלָה אֶשְׁתָּאֹול וְצָרְעָה וְאַשְׁנָה׃
יהושע 15 : 34 (WLC)
וְזָנֹוחַ וְעֵין גַּנִּים תַּפּוּחַ וְהָעֵינָם׃
יהושע 15 : 35 (WLC)
יַרְמוּת וַעֲדֻלָּם שֹׂוכֹה וַעֲזֵקָה׃
יהושע 15 : 36 (WLC)
וְשַׁעֲרַיִם וַעֲדִיתַיִם וְהַגְּדֵרָה וּגְדֵרֹתָיִם עָרִים אַרְבַּע־עֶשְׂרֵה וְחַצְרֵיהֶן׃
יהושע 15 : 37 (WLC)
צְנָן וַחֲדָשָׁה וּמִגְדַּל־גָּד׃
יהושע 15 : 38 (WLC)
וְדִלְעָן וְהַמִּצְפֶּה וְיָקְתְאֵל׃
יהושע 15 : 39 (WLC)
לָכִישׁ וּבָצְקַת וְעֶגְלֹון׃
יהושע 15 : 40 (WLC)
וְכַבֹּון וְלַחְמָס וְכִתְלִישׁ׃
יהושע 15 : 41 (WLC)
וּגְדֵרֹות בֵּית־דָּגֹון וְנַעֲמָה וּמַקֵּדָה עָרִים שֵׁשׁ־עֶשְׂרֵה וְחַצְרֵיהֶן׃ ס
יהושע 15 : 42 (WLC)
לִבְנָה וָעֶתֶר וְעָשָׁן׃
יהושע 15 : 43 (WLC)
וְיִפְתָּח וְאַשְׁנָה וּנְצִיב׃
יהושע 15 : 44 (WLC)
וּקְעִילָה וְאַכְזִיב וּמָרֵאשָׁה עָרִים תֵּשַׁע וְחַצְרֵיהֶן׃
יהושע 15 : 45 (WLC)
עֶקְרֹון וּבְנֹתֶיהָ וַחֲצֵרֶיהָ׃
יהושע 15 : 46 (WLC)
מֵעֶקְרֹון וָיָמָּה כֹּל אֲשֶׁר־עַל־יַד אַשְׁדֹּוד וְחַצְרֵיהֶן׃
יהושע 15 : 47 (WLC)
אַשְׁדֹּוד בְּנֹותֶיהָ וַחֲצֵרֶיהָ עַזָּה בְּנֹותֶיהָ וַחֲצֵרֶיהָ עַד־נַחַל מִצְרָיִם וְהַיָּם *הַגָּבֹול כ (הַגָּדֹול ק) וּגְבוּל׃ ס
יהושע 15 : 48 (WLC)
וּבָהָר שָׁמִיר וְיַתִּיר וְשֹׂוכֹה׃
יהושע 15 : 49 (WLC)
וְדַנָּה וְקִרְיַת־סַנָּה הִיא דְבִר׃
יהושע 15 : 50 (WLC)
וַעֲנָב וְאֶשְׁתְּמֹה וְעָנִים׃
יהושע 15 : 51 (WLC)
וְגֹשֶׁן וְחֹלֹן וְגִלֹה עָרִים אַחַת־עֶשְׂרֵה וְחַצְרֵיהֶן׃
יהושע 15 : 52 (WLC)
אֲרַב וְרוּמָה וְאֶשְׁעָן׃
יהושע 15 : 53 (WLC)
*וְיָנִים כ (וְיָנוּם ק) וּבֵית־תַּפּוּחַ וַאֲפֵקָה׃
יהושע 15 : 54 (WLC)
וְחֻמְטָה וְקִרְיַת אַרְבַּע הִיא חֶבְרֹון וְצִיעֹר עָרִים תֵּשַׁע וְחַצְרֵיהֶן׃ ס
יהושע 15 : 55 (WLC)
מָעֹון ׀ כַּרְמֶל וָזִיף וְיוּטָּה׃
יהושע 15 : 56 (WLC)
וְיִזְרְעֶאל וְיָקְדְעָם וְזָנֹוחַ׃
יהושע 15 : 57 (WLC)
הַקַּיִן גִּבְעָה וְתִמְנָה עָרִים עֶשֶׂר וְחַצְרֵיהֶן׃
יהושע 15 : 58 (WLC)
חַלְחוּל בֵּית־צוּר וּגְדֹור׃
יהושע 15 : 59 (WLC)
וּמַעֲרָת וּבֵית־עֲנֹות וְאֶלְתְּקֹן עָרִים שֵׁשׁ וְחַצְרֵיהֶן׃
יהושע 15 : 60 (WLC)
קִרְיַת־בַּעַל הִיא קִרְיַת יְעָרִים וְהָרַבָּה עָרִים שְׁתַּיִם וְחַצְרֵיהֶן׃ ס
יהושע 15 : 61 (WLC)
בַּמִּדְבָּר בֵּית הָעֲרָבָה מִדִּין וּסְכָכָה׃
יהושע 15 : 62 (WLC)
וְהַנִּבְשָׁן וְעִיר־הַמֶּלַח וְעֵין גֶּדִי עָרִים שֵׁשׁ וְחַצְרֵיהֶן׃
יהושע 15 : 63 (WLC)
וְאֶת־הַיְבוּסִי יֹושְׁבֵי יְרוּשָׁלִַם לֹא־ *יוּכְלוּ כ (יָכְלוּ ק) בְנֵי־יְהוּדָה לְהֹורִישָׁם וַיֵּשֶׁב הַיְבוּסִי אֶת־בְּנֵי יְהוּדָה בִּירוּשָׁלִַם עַד הַיֹּום הַזֶּה׃ פ
❮
❯