נחמיה 10 : 1 (BHS)
וּבְכָל־זֹאת אֲנַחְנוּ כֹּרְתִים אֲמָנָה וְכֹתְבִים וְעַל הֶחָתוּם שָׂרֵינוּ לְוִיֵּנוּ כֹּהֲנֵינוּ ׃
נחמיה 10 : 2 (BHS)
וְעַל הַחֲתוּמִים נְחֶמְיָה הַתִּרְשָׁתָא בֶּן־חֲכַלְיָה וְצִדְקִיָּה ׃
נחמיה 10 : 3 (BHS)
שְׂרָיָה עֲזַרְיָה יִרְמְיָה ׃
נחמיה 10 : 4 (BHS)
פַּשְׁחוּר אֲמַרְיָה מַלְכִּיָּה ׃
נחמיה 10 : 5 (BHS)
חַטּוּשׁ שְׁבַנְיָה מַלּוּךְ ׃
נחמיה 10 : 6 (BHS)
חָרִם מְרֵמוֹת עֹבַדְיָה ׃
נחמיה 10 : 7 (BHS)
דָּנִיֵּאל גִּנְּתוֹן בָּרוּךְ ׃
נחמיה 10 : 8 (BHS)
מְשֻׁלָּם אֲבִיָּה מִיָּמִן ׃
נחמיה 10 : 9 (BHS)
מַעַזְיָה בִלְגַּי שְׁמַעְיָה אֵלֶּה הַכֹּהֲנִים ׃ ס
נחמיה 10 : 10 (BHS)
וְהַלְוִיִּם וְיֵשׁוּעַ בֶּן־אֲזַנְיָה בִּנּוּי מִבְּנֵי חֵנָדָד קַדְמִיאֵל ׃
נחמיה 10 : 11 (BHS)
וַאֲחֵיהֶם שְׁבַנְיָה הוֹדִיָּה קְלִיטָא פְּלָאיָה חָנָן ׃
נחמיה 10 : 12 (BHS)
מִיכָא רְחוֹב חֲשַׁבְיָה ׃
נחמיה 10 : 13 (BHS)
זַכּוּר שֵׁרֵבְיָה שְׁבַנְיָה ׃
נחמיה 10 : 14 (BHS)
הוֹדִיָּה בָנִי בְּנִינוּ ׃ ס
נחמיה 10 : 15 (BHS)
רָאשֵׁי הָעָם פַּרְעֹשׁ פַּחַת מוֹאָב עֵילָם זַתּוּא בָּנִי ׃
נחמיה 10 : 16 (BHS)
בֻּנִּי עַזְגָּד בֵּבָי ׃
נחמיה 10 : 17 (BHS)
אֲדֹנִיָּה בִגְוַי עָדִין ׃
נחמיה 10 : 18 (BHS)
אָטֵר חִזְקִיָּה עַזּוּר ׃
נחמיה 10 : 19 (BHS)
הוֹדִיָּה חָשֻׁם בֵּצָי ׃
נחמיה 10 : 20 (BHS)
חָרִיף עֲנָתוֹת נוֹבָי ׃
נחמיה 10 : 21 (BHS)
מַגְפִּיעָשׁ מְשֻׁלָּם חֵזִיר ׃
נחמיה 10 : 22 (BHS)
מְשֵׁיזַבְאֵל צָדוֹק יַדּוּעַ ׃
נחמיה 10 : 23 (BHS)
פְּלַטְיָה חָנָן עֲנָיָה ׃
נחמיה 10 : 24 (BHS)
הוֹשֵׁעַ חֲנַנְיָה חַשּׁוּב ׃
נחמיה 10 : 25 (BHS)
הַלּוֹחֵשׁ פִּלְחָא שׁוֹבֵק ׃
נחמיה 10 : 26 (BHS)
רְחוּם חֲשַׁבְנָה מַעֲשֵׂיָה ׃
נחמיה 10 : 27 (BHS)
וַאֲחִיָּה חָנָן עָנָן ׃
נחמיה 10 : 28 (BHS)
מַלּוּךְ חָרִם בַּעֲנָה ׃
נחמיה 10 : 29 (BHS)
וּשְׁאָר הָעָם הַכֹּהֲנִים הַלְוִיִּם הַשּׁוֹעֲרִים הַמְשֹׁרְרִים הַנְּתִינִים וְכָל־הַנִּבְדָּל מֵעַמֵּי הָאֲרָצוֹת אֶל־תּוֹרַת הָאֱלֹהִים נְשֵׁיהֶם בְּנֵיהֶם וּבְנֹתֵיהֶם כֹּל יוֹדֵעַ מֵבִין ׃
נחמיה 10 : 30 (BHS)
מַחֲזִיקִים עַל־אֲחֵיהֶם אַדִּירֵיהֶם וּבָאִים בְּאָלָה וּבִשְׁבוּעָה לָלֶכֶת בְּתוֹרַת הָאֱלֹהִים אֲשֶׁר נִתְּנָה בְּיַד מֹשֶׁה עֶבֶד־הָאֱלֹהִים וְלִשְׁמוֹר וְלַעֲשׂוֹת אֶת־כָּל־מִצְוֹת יְהוָה אֲדֹנֵינוּ וּמִשְׁפָּטָיו וְחֻקָּיו ׃
נחמיה 10 : 31 (BHS)
וַאֲשֶׁר לֹא־נִתֵּן בְּנֹתֵינוּ לְעַמֵּי הָאָרֶץ וְאֶת־בְּנֹתֵיהֶם לֹא נִקַּח לְבָנֵינוּ ׃
נחמיה 10 : 32 (BHS)
וְעַמֵּי הָאָרֶץ הַמְבִיאִים אֶת־הַמַּקָּחוֹת וְכָל־שֶׁבֶר בְּיוֹם הַשַּׁבָּת לִמְכּוֹר לֹא־נִקַּח מֵהֶם בַּשַּׁבָּת וּבְיוֹם קֹדֶשׁ וְנִטֹּשׁ אֶת־הַשָּׁנָה הַשְּׁבִיעִית וּמַשָּׁא כָל־יָד ׃
נחמיה 10 : 33 (BHS)
וְהֶעֱמַדְנוּ עָלֵינוּ מִצְוֹת לָתֵת עָלֵינוּ שְׁלִשִׁית הַשֶּׁקֶל בַּשָּׁנָה לַעֲבֹדַת בֵּית אֱלֹהֵינוּ ׃
נחמיה 10 : 34 (BHS)
לְלֶחֶם הַמַּעֲרֶכֶת וּמִנְחַת הַתָּמִיד וּלְעוֹלַת הַתָּמִיד הַשַּׁבָּתוֹת הֶחֳדָשִׁים לַמּוֹעֲדִים וְלַקֳּדָשִׁים וְלַחַטָּאוֹת לְכַפֵּר עַל־יִשְׂרָאֵל וְכֹל מְלֶאכֶת בֵּית־אֱלֹהֵינוּ ׃ ס
נחמיה 10 : 35 (BHS)
וְהַגּוֹרָלוֹת הִפַּלְנוּ עַל־קֻרְבַּן הָעֵצִים הַכֹּהֲנִים הַלְוִיִּם וְהָעָם לְהָבִיא לְבֵית אֱלֹהֵינוּ לְבֵית־אֲבֹתֵינוּ לְעִתִּים מְזֻמָּנִים שָׁנָה בְשָׁנָה לְבַעֵר עַל־מִזְבַּח יְהוָה אֱלֹהֵינוּ כַּכָּתוּב בַּתּוֹרָה ׃
נחמיה 10 : 36 (BHS)
וּלְהָבִיא אֶת־בִּכּוּרֵי אַדְמָתֵנוּ וּבִכּוּרֵי כָּל־פְּרִי כָל־עֵץ שָׁנָה בְשָׁנָה לְבֵית יְהוָה ׃
נחמיה 10 : 37 (BHS)
וְאֶת־בְּכֹרוֹת בָּנֵינוּ וּבְהֶמְתֵּינוּ כַּכָּתוּב בַּתּוֹרָה וְאֶת־בְּכוֹרֵי בְקָרֵינוּ וְצֹאנֵינוּ לְהָבִיא לְבֵית אֱלֹהֵינוּ לַכֹּהֲנִים הַמְשָׁרְתִים בְּבֵית אֱלֹהֵינוּ ׃
נחמיה 10 : 38 (BHS)
וְאֶת־רֵאשִׁית עֲרִיסֹתֵינוּ וּתְרוּמֹתֵינוּ וּפְרִי כָל־עֵץ תִּירוֹשׁ וְיִצְהָר נָבִיא לַכֹּהֲנִים אֶל־לִשְׁכוֹת בֵּית־אֱלֹהֵינוּ וּמַעְשַׂר אַדְמָתֵנוּ לַלְוִיִּם וְהֵם הַלְוִיִּם הַמְעַשְּׂרִים בְּכֹל עָרֵי עֲבֹדָתֵנוּ ׃
נחמיה 10 : 39 (BHS)
וְהָיָה הַכֹּהֵן בֶּן־אַהֲרֹן עִם־הַלְוִיִּם בַּעְשֵׂר הַלְוִיִּם וְהַלְוִיִּם יַעֲלוּ אֶת־מַעֲשַׂר הַמַּעֲשֵׂר לְבֵית אֱלֹהֵינוּ אֶל־הַלְּשָׁכוֹת לְבֵית הָאוֹצָר ׃
נחמיה 10 : 40 (BHS)
כִּי אֶל־הַלְּשָׁכוֹת יָבִיאוּ בְנֵי־יִשְׂרָאֵל וּבְנֵי הַלֵּוִי אֶת־תְּרוּמַת הַדָּגָן הַתִּירוֹשׁ וְהַיִּצְהָר וְשָׁם כְּלֵי הַמִּקְדָּשׁ וְהַכֹּהֲנִים הַמְשָׁרְתִים וְהַשּׁוֹעֲרִים וְהַמְשֹׁרְרִים וְלֹא נַעֲזֹב אֶת־בֵּית אֱלֹהֵינוּ ׃
❮
❯