זכריה 3 : 1 (ALEP)
א ויראני את יהושע הכהן הגדול עמד לפני מלאך יהוה והשטן עמד על ימינו לשטנו
זכריה 3 : 2 (ALEP)
ב ויאמר יהוה אל השטן יגער יהוה בך השטן ויגער יהוה בך הבחר בירושלם הלוא זה אוד מצל מאש
זכריה 3 : 3 (ALEP)
ג ויהושע היה לבש בגדים צואים ועמד לפני המלאך
זכריה 3 : 4 (ALEP)
ד ויען ויאמר אל העמדים לפניו לאמר הסירו הבגדים הצאים מעליו ויאמר אליו ראה העברתי מעליך עונך והלבש אתך מחלצות
זכריה 3 : 5 (ALEP)
ה ואמר ישימו צניף טהור על ראשו וישימו הצניף הטהור על ראשו וילבשהו בגדים ומלאך יהוה עמד
זכריה 3 : 6 (ALEP)
ו ויעד מלאך יהוה ביהושע לאמר
זכריה 3 : 7 (ALEP)
ז כה אמר יהוה צבאות אם בדרכי תלך ואם את משמרתי תשמר וגם אתה תדין את ביתי וגם תשמר את חצרי--ונתתי לך מהלכים בין העמדים האלה
זכריה 3 : 8 (ALEP)
ח שמע נא יהושע הכהן הגדול אתה ורעיך הישבים לפניך--כי אנשי מופת המה כי הנני מביא את עבדי צמח
זכריה 3 : 9 (ALEP)
ט כי הנה האבן אשר נתתי לפני יהושע--על אבן אחת שבעה עינים הנני מפתח פתחה נאם יהוה צבאות ומשתי את עון הארץ ההיא ביום אחד
זכריה 3 : 10 (ALEP)
י ביום ההוא נאם יהוה צבאות תקראו איש לרעהו--אל תחת גפן ואל תחת תאנה
❮
❯