רות 4 : 1 (ALEP)
א ובעז עלה השער וישב שם והנה הגאל עבר אשר דבר בעז ויאמר סורה שבה פה פלני אלמני ויסר וישב
רות 4 : 2 (ALEP)
ב ויקח עשרה אנשים מזקני העיר--ויאמר שבו פה וישבו
רות 4 : 3 (ALEP)
ג ויאמר לגאל חלקת השדה אשר לאחינו לאלימלך מכרה נעמי השבה משדה מואב
רות 4 : 4 (ALEP)
ד ואני אמרתי אגלה אזנך לאמר קנה נגד הישבים ונגד זקני עמי--אם תגאל גאל ואם לא יגאל הגידה לי ואדע (ואדעה) כי אין זולתך לגאול ואנכי אחריך ויאמר אנכי אגאל
רות 4 : 5 (ALEP)
ה ויאמר בעז ביום קנותך השדה מיד נעמי ומאת רות המואביה אשת המת קניתי (קנית)--להקים שם המת על נחלתו
רות 4 : 6 (ALEP)
ו ויאמר הגאל לא אוכל לגאול (לגאל) לי--פן אשחית את נחלתי גאל לך אתה את גאלתי כי לא אוכל לגאל
רות 4 : 7 (ALEP)
ז וזאת לפנים בישראל על הגאלה ועל התמורה לקים כל דבר שלף איש נעלו ונתן לרעהו וזאת התעודה בישראל
רות 4 : 8 (ALEP)
ח ויאמר הגאל לבעז קנה לך וישלף נעלו
רות 4 : 9 (ALEP)
ט ויאמר בעז לזקנים וכל העם עדים אתם היום כי קניתי את כל אשר לאלימלך ואת כל אשר לכליון ומחלון--מיד נעמי
רות 4 : 10 (ALEP)
י וגם את רות המאביה אשת מחלון קניתי לי לאשה להקים שם המת על נחלתו ולא יכרת שם המת מעם אחיו ומשער מקומו עדים אתם היום
רות 4 : 11 (ALEP)
יא ויאמרו כל העם אשר בשער והזקנים--עדים יתן יהוה את האשה הבאה אל ביתך כרחל וכלאה אשר בנו שתיהם את בית ישראל ועשה חיל באפרתה וקרא שם בבית לחם
רות 4 : 12 (ALEP)
יב ויהי ביתך כבית פרץ אשר ילדה תמר ליהודה--מן הזרע אשר יתן יהוה לך מן הנערה הזאת
רות 4 : 13 (ALEP)
יג ויקח בעז את רות ותהי לו לאשה ויבא אליה ויתן יהוה לה הריון ותלד בן
רות 4 : 14 (ALEP)
יד ותאמרנה הנשים אל נעמי ברוך יהוה אשר לא השבית לך גאל היום ויקרא שמו בישראל
רות 4 : 15 (ALEP)
טו והיה לך למשיב נפש ולכלכל את שיבתך כי כלתך אשר אהבתך ילדתו אשר היא טובה לך משבעה בנים
רות 4 : 16 (ALEP)
טז ותקח נעמי את הילד ותשתהו בחיקה ותהי לו לאמנת
רות 4 : 17 (ALEP)
יז ותקראנה לו השכנות שם לאמר ילד בן לנעמי ותקראנה שמו עובד הוא אבי ישי אבי דוד פ
רות 4 : 18 (ALEP)
יח ואלה תולדות פרץ פרץ הוליד את חצרון
רות 4 : 19 (ALEP)
יט וחצרון הוליד את רם ורם הוליד את עמינדב
רות 4 : 20 (ALEP)
כ ועמינדב הוליד את נחשון ונחשון הוליד את שלמה
רות 4 : 21 (ALEP)
כא ושלמון הוליד את בעז ובעז הוליד את עובד
רות 4 : 22 (ALEP)
כב ועבד הוליד את ישי וישי הוליד את דוד ש
❮
❯