תהלים 98 : 1 (ALEP)
א מזמור שירו ליהוה שיר חדש-- כי-נפלאות עשה הושיעה-לו ימינו וזרוע קדשו
תהלים 98 : 2 (ALEP)
ב הודיע יהוה ישועתו לעיני הגוים גלה צדקתו
תהלים 98 : 3 (ALEP)
ג זכר חסדו ואמונתו-- לבית ישראל ראו כל-אפסי-ארץ-- את ישועת אלהינו
תהלים 98 : 4 (ALEP)
ד הריעו ליהוה כל-הארץ פצחו ורננו וזמרו
תהלים 98 : 5 (ALEP)
ה זמרו ליהוה בכנור בכנור וקול זמרה
תהלים 98 : 6 (ALEP)
ו בחצצרות וקול שופר-- הריעו לפני המלך יהוה
תהלים 98 : 7 (ALEP)
ז ירעם הים ומלאו תבל וישבי בה
תהלים 98 : 8 (ALEP)
ח נהרות ימחאו-כף יחד הרים ירננו
תהלים 98 : 9 (ALEP)
ט לפני יהוה-- כי בא לשפט הארץ ישפט-תבל בצדק ועמים במישרים
❮
❯