תהלים 95 : 1 (ALEP)
א לכו נרננה ליהוה נריעה לצור ישענו
תהלים 95 : 2 (ALEP)
ב נקדמה פניו בתודה בזמרות נריע לו
תהלים 95 : 3 (ALEP)
ג כי אל גדול יהוה ומלך גדול על-כל-אלהים
תהלים 95 : 4 (ALEP)
ד אשר בידו מחקרי-ארץ ותועפת הרים לו
תהלים 95 : 5 (ALEP)
ה אשר-לו הים והוא עשהו ויבשת ידיו יצרו
תהלים 95 : 6 (ALEP)
ו באו נשתחוה ונכרעה נברכה לפני-יהוה עשנו
תהלים 95 : 7 (ALEP)
ז כי הוא אלהינו-- ואנחנו עם מרעיתו וצאן ידו היום אם-בקלו תשמעו
תהלים 95 : 8 (ALEP)
ח אל-תקשו לבבכם כמריבה כיום מסה במדבר
תהלים 95 : 9 (ALEP)
ט אשר נסוני אבותיכם בחנוני גם-ראו פעלי
תהלים 95 : 10 (ALEP)
י ארבעים שנה אקוט בדור-- ואמר עם תעי לבב הם והם לא-ידעו דרכי
תהלים 95 : 11 (ALEP)
יא אשר-נשבעתי באפי אם-יבאון אל-מנוחתי
❮
❯