תהלים 16 : 1 (ALEP)
א מכתם לדוד שמרני אל כי-חסיתי בך
תהלים 16 : 2 (ALEP)
ב אמרת ליהוה אדני אתה טובתי בל-עליך
תהלים 16 : 3 (ALEP)
ג לקדושים אשר-בארץ המה ואדירי כל-חפצי-בם
תהלים 16 : 4 (ALEP)
ד ירבו עצבותם אחר מהרו בל-אסיך נסכיהם מדם ובל-אשא את-שמותם על-שפתי
תהלים 16 : 5 (ALEP)
ה יהוה מנת-חלקי וכוסי-- אתה תומיך גורלי
תהלים 16 : 6 (ALEP)
ו חבלים נפלו-לי בנעמים אף-נחלת שפרה עלי
תהלים 16 : 7 (ALEP)
ז אברך--את-יהוה אשר יעצני אף-לילות יסרוני כליותי
תהלים 16 : 8 (ALEP)
ח שויתי יהוה לנגדי תמיד כי מימיני בל-אמוט
תהלים 16 : 9 (ALEP)
ט לכן שמח לבי--ויגל כבודי אף-בשרי ישכן לבטח
תהלים 16 : 10 (ALEP)
י כי לא-תעזב נפשי לשאול לא-תתן חסידך לראות שחת
תהלים 16 : 11 (ALEP)
יא תודיעני ארח חיים שבע שמחות את-פניך נעמות בימינך נצח
❮
❯