תהלים 122 : 1 (ALEP)
א שיר המעלות לדוד שמחתי באמרים לי-- בית יהוה נלך
תהלים 122 : 2 (ALEP)
ב עמדות היו רגלינו-- בשעריך ירושלם
תהלים 122 : 3 (ALEP)
ג ירושלם הבנויה-- כעיר שחברה-לה יחדו
תהלים 122 : 4 (ALEP)
ד ששם עלו שבטים שבטי-יה--עדות לישראל להדות לשם יהוה
תהלים 122 : 5 (ALEP)
ה כי שמה ישבו כסאות למשפט כסאות לבית דוד
תהלים 122 : 6 (ALEP)
ו שאלו שלום ירושלם ישליו אהביך
תהלים 122 : 7 (ALEP)
ז יהי-שלום בחילך שלוה בארמנותיך
תהלים 122 : 8 (ALEP)
ח למען אחי ורעי-- אדברה-נא שלום בך
תהלים 122 : 9 (ALEP)
ט למען בית-יהוה אלהינו-- אבקשה טוב לך
❮
❯