תהלים 111 : 1 (ALEP)
א הללו-יה אודה יהוה בכל-לבב בסוד ישרים ועדה
תהלים 111 : 2 (ALEP)
ב גדלים מעשי יהוה דרושים לכל-חפציהם
תהלים 111 : 3 (ALEP)
ג הוד-והדר פעלו וצדקתו עמדת לעד
תהלים 111 : 4 (ALEP)
ד זכר עשה לנפלאותיו חנון ורחום יהוה
תהלים 111 : 5 (ALEP)
ה טרף נתן ליראיו יזכר לעולם בריתו
תהלים 111 : 6 (ALEP)
ו כח מעשיו הגיד לעמו-- לתת להם נחלת גוים
תהלים 111 : 7 (ALEP)
ז מעשי ידיו אמת ומשפט נאמנים כל-פקודיו
תהלים 111 : 8 (ALEP)
ח סמוכים לעד לעולם עשוים באמת וישר
תהלים 111 : 9 (ALEP)
ט פדות שלח לעמו-- צוה-לעולם בריתו קדוש ונורא שמו
תהלים 111 : 10 (ALEP)
י ראשית חכמה יראת יהוה-- שכל טוב לכל-עשיהם תהלתו עמדת לעד
❮
❯