תהלים 105 : 1 (ALEP)
א הודו ליהוה קראו בשמו הודיעו בעמים עלילותיו
תהלים 105 : 2 (ALEP)
ב שירו-לו זמרו-לו שיחו בכל-נפלאותיו
תהלים 105 : 3 (ALEP)
ג התהללו בשם קדשו ישמח לב מבקשי יהוה
תהלים 105 : 4 (ALEP)
ד דרשו יהוה ועזו בקשו פניו תמיד
תהלים 105 : 5 (ALEP)
ה זכרו--נפלאותיו אשר-עשה מפתיו ומשפטי-פיו
תהלים 105 : 6 (ALEP)
ו זרע אברהם עבדו בני יעקב בחיריו
תהלים 105 : 7 (ALEP)
ז הוא יהוה אלהינו בכל-הארץ משפטיו
תהלים 105 : 8 (ALEP)
ח זכר לעולם בריתו דבר צוה לאלף דור
תהלים 105 : 9 (ALEP)
ט אשר כרת את-אברהם ושבועתו לישחק
תהלים 105 : 10 (ALEP)
י ויעמידה ליעקב לחק לישראל ברית עולם
תהלים 105 : 11 (ALEP)
יא לאמר--לך אתן את-ארץ-כנען חבל נחלתכם
תהלים 105 : 12 (ALEP)
יב בהיותם מתי מספר כמעט וגרים בה
תהלים 105 : 13 (ALEP)
יג ויתהלכו מגוי אל-גוי מממלכה אל-עם אחר
תהלים 105 : 14 (ALEP)
יד לא-הניח אדם לעשקם ויוכח עליהם מלכים
תהלים 105 : 15 (ALEP)
טו אל-תגעו במשיחי ולנביאי אל-תרעו
תהלים 105 : 16 (ALEP)
טז ויקרא רעב על-הארץ כל-מטה-לחם שבר
תהלים 105 : 17 (ALEP)
יז שלח לפניהם איש לעבד נמכר יוסף
תהלים 105 : 18 (ALEP)
יח ענו בכבל רגליו (רגלו) ברזל באה נפשו
תהלים 105 : 19 (ALEP)
יט עד-עת בא-דברו-- אמרת יהוה צרפתהו
תהלים 105 : 20 (ALEP)
כ שלח מלך ויתירהו משל עמים ויפתחהו
תהלים 105 : 21 (ALEP)
כא שמו אדון לביתו ומשל בכל-קנינו
תהלים 105 : 22 (ALEP)
כב לאסר שריו בנפשו וזקניו יחכם
תהלים 105 : 23 (ALEP)
כג ויבא ישראל מצרים ויעקב גר בארץ-חם
תהלים 105 : 24 (ALEP)
כד ויפר את-עמו מאד ויעצמהו מצריו
תהלים 105 : 25 (ALEP)
כה הפך לבם לשנא עמו להתנכל בעבדיו
תהלים 105 : 26 (ALEP)
כו שלח משה עבדו אהרן אשר בחר-בו
תהלים 105 : 27 (ALEP)
כז שמו-בם דברי אתותיו ומפתים בארץ חם
תהלים 105 : 28 (ALEP)
כח שלח חשך ויחשך ולא-מרו את-דבריו (דברו)
תהלים 105 : 29 (ALEP)
כט הפך את-מימיהם לדם וימת את-דגתם
תהלים 105 : 30 (ALEP)
ל שרץ ארצם צפרדעים בחדרי מלכיהם
תהלים 105 : 31 (ALEP)
לא אמר ויבא ערב כנים בכל-גבולם
תהלים 105 : 32 (ALEP)
לב נתן גשמיהם ברד אש להבות בארצם
תהלים 105 : 33 (ALEP)
לג ויך גפנם ותאנתם וישבר עץ גבולם
תהלים 105 : 34 (ALEP)
לד אמר ויבא ארבה וילק ואין מספר
תהלים 105 : 35 (ALEP)
לה ויאכל כל-עשב בארצם ויאכל פרי אדמתם
תהלים 105 : 36 (ALEP)
לו ויך כל-בכור בארצם ראשית לכל-אונם
תהלים 105 : 37 (ALEP)
לז ויוציאם בכסף וזהב ואין בשבטיו כושל
תהלים 105 : 38 (ALEP)
לח שמח מצרים בצאתם כי-נפל פחדם עליהם
תהלים 105 : 39 (ALEP)
לט פרש ענן למסך ואש להאיר לילה
תהלים 105 : 40 (ALEP)
מ שאל ויבא שלו ולחם שמים ישביעם
תהלים 105 : 41 (ALEP)
מא פתח צור ויזובו מים הלכו בציות נהר
תהלים 105 : 42 (ALEP)
מב כי-זכר את-דבר קדשו את-אברהם עבדו
תהלים 105 : 43 (ALEP)
מג ויוצא עמו בששון ברנה את-בחיריו
תהלים 105 : 44 (ALEP)
מד ויתן להם ארצות גוים ועמל לאמים יירשו
תהלים 105 : 45 (ALEP)
מה בעבור ישמרו חקיו-- ותורתיו ינצרו הללו-יה
❮
❯