תהלים 1 : 1 (ALEP)
א אשרי האיש-- אשר לא הלך בעצת רשעים ובדרך חטאים לא עמד ובמושב לצים לא ישב
תהלים 1 : 2 (ALEP)
ב כי אם בתורת יהוה חפצו ובתורתו יהגה יומם ולילה
תהלים 1 : 3 (ALEP)
ג והיה-- כעץ שתול על-פלגי-מים אשר פריו יתן בעתו--ועלהו לא-יבול וכל אשר-יעשה יצליח
תהלים 1 : 4 (ALEP)
ד לא-כן הרשעים כי אם-כמץ אשר-תדפנו רוח
תהלים 1 : 5 (ALEP)
ה על-כן לא-יקמו רשעים--במשפט וחטאים בעדת צדיקים
תהלים 1 : 6 (ALEP)
ו כי-יודע יהוה דרך צדיקים ודרך רשעים תאבד
❮
❯