משלי 6 : 1 (ALEP)
א בני אם-ערבת לרעך תקעת לזר כפיך
משלי 6 : 2 (ALEP)
ב נוקשת באמרי-פיך נלכדת באמרי-פיך
משלי 6 : 3 (ALEP)
ג עשה זאת אפוא בני והנצל-- כי באת בכף-רעך לך התרפס ורהב רעיך
משלי 6 : 4 (ALEP)
ד אל-תתן שנה לעיניך ותנומה לעפעפיך
משלי 6 : 5 (ALEP)
ה הנצל כצבי מיד וכצפור מיד יקוש
משלי 6 : 6 (ALEP)
ו לך-אל-נמלה עצל ראה דרכיה וחכם
משלי 6 : 7 (ALEP)
ז אשר אין-לה קצין-- שטר ומשל
משלי 6 : 8 (ALEP)
ח תכין בקיץ לחמה אגרה בקציר מאכלה
משלי 6 : 9 (ALEP)
ט עד-מתי עצל תשכב מתי תקום משנתך
משלי 6 : 10 (ALEP)
י מעט שנות מעט תנומות מעט חבק ידים לשכב
משלי 6 : 11 (ALEP)
יא ובא-כמהלך ראשך ומחסרך כאיש מגן
משלי 6 : 12 (ALEP)
יב אדם בליעל איש און הולך עקשות פה
משלי 6 : 13 (ALEP)
יג קרץ בעינו מלל ברגלו מרה באצבעתיו
משלי 6 : 14 (ALEP)
יד תהפכות בלבו--חרש רע בכל-עת מדנים (מדינים) ישלח
משלי 6 : 15 (ALEP)
טו על-כן--פתאם יבוא אידו פתע ישבר ואין מרפא
משלי 6 : 16 (ALEP)
טז שש-הנה שנא יהוה ושבע תועבות (תועבת) נפשו
משלי 6 : 17 (ALEP)
יז עינים רמות לשון שקר וידים שפכות דם-נקי
משלי 6 : 18 (ALEP)
יח לב--חרש מחשבות און רגלים ממהרות לרוץ לרעה
משלי 6 : 19 (ALEP)
יט יפיח כזבים עד שקר ומשלח מדנים בין אחים
משלי 6 : 20 (ALEP)
כ נצר בני מצות אביך ואל-תטש תורת אמך
משלי 6 : 21 (ALEP)
כא קשרם על-לבך תמיד ענדם על-גרגרתך
משלי 6 : 22 (ALEP)
כב בהתהלכך תנחה אתך-- בשכבך תשמר עליך והקיצות היא תשיחך
משלי 6 : 23 (ALEP)
כג כי נר מצוה ותורה אור ודרך חיים תוכחות מוסר
משלי 6 : 24 (ALEP)
כד לשמרך מאשת רע מחלקת לשון נכריה
משלי 6 : 25 (ALEP)
כה אל-תחמד יפיה בלבבך ואל-תקחך בעפעפיה
משלי 6 : 26 (ALEP)
כו כי בעד-אשה זונה עד-ככר-לחם ואשת איש-- נפש יקרה תצוד
משלי 6 : 27 (ALEP)
כז היחתה איש אש בחיקו ובגדיו לא תשרפנה
משלי 6 : 28 (ALEP)
כח אם-יהלך איש על-הגחלים ורגליו לא תכוינה
משלי 6 : 29 (ALEP)
כט כן--הבא אל-אשת רעהו לא-ינקה כל-הנגע בה
משלי 6 : 30 (ALEP)
ל לא-יבוזו לגנב כי יגנוב-- למלא נפשו כי ירעב
משלי 6 : 31 (ALEP)
לא ונמצא ישלם שבעתים את-כל-הון ביתו יתן
משלי 6 : 32 (ALEP)
לב נאף אשה חסר-לב משחית נפשו הוא יעשנה
משלי 6 : 33 (ALEP)
לג נגע-וקלון ימצא וחרפתו לא תמחה
משלי 6 : 34 (ALEP)
לד כי-קנאה חמת-גבר ולא-יחמול ביום נקם
משלי 6 : 35 (ALEP)
לה לא-ישא פני כל-כפר ולא-יאבה כי תרבה-שחד
❮
❯