משלי 4 : 1 (ALEP)
א שמעו בנים מוסר אב והקשיבו לדעת בינה
משלי 4 : 2 (ALEP)
ב כי לקח טוב נתתי לכם תורתי אל-תעזבו
משלי 4 : 3 (ALEP)
ג כי-בן הייתי לאבי רך ויחיד לפני אמי
משלי 4 : 4 (ALEP)
ד וירני--ויאמר לי יתמך-דברי לבך שמר מצותי וחיה
משלי 4 : 5 (ALEP)
ה קנה חכמה קנה בינה אל-תשכח ואל-תט מאמרי-פי
משלי 4 : 6 (ALEP)
ו אל-תעזבה ותשמרך אהבה ותצרך
משלי 4 : 7 (ALEP)
ז ראשית חכמה קנה חכמה ובכל-קנינך קנה בינה
משלי 4 : 8 (ALEP)
ח סלסלה ותרוממך תכבדך כי תחבקנה
משלי 4 : 9 (ALEP)
ט תתן לראשך לוית-חן עטרת תפארת תמגנך
משלי 4 : 10 (ALEP)
י שמע בני וקח אמרי וירבו לך שנות חיים
משלי 4 : 11 (ALEP)
יא בדרך חכמה הריתיך הדרכתיך במעגלי-ישר
משלי 4 : 12 (ALEP)
יב בלכתך לא-יצר צעדך ואם-תרוץ לא תכשל
משלי 4 : 13 (ALEP)
יג החזק במוסר אל-תרף נצרה כי-היא חייך
משלי 4 : 14 (ALEP)
יד בארח רשעים אל-תבא ואל-תאשר בדרך רעים
משלי 4 : 15 (ALEP)
טו פרעהו אל-תעבר-בו שטה מעליו ועבר
משלי 4 : 16 (ALEP)
טז כי לא ישנו אם-לא ירעו ונגזלה שנתם אם-לא יכשולו (יכשילו)
משלי 4 : 17 (ALEP)
יז כי לחמו לחם רשע ויין חמסים ישתו
משלי 4 : 18 (ALEP)
יח וארח צדיקים כאור נגה הולך ואור עד-נכון היום
משלי 4 : 19 (ALEP)
יט דרך רשעים כאפלה לא ידעו במה יכשלו
משלי 4 : 20 (ALEP)
כ בני לדברי הקשיבה לאמרי הט-אזנך
משלי 4 : 21 (ALEP)
כא אל-יליזו מעיניך שמרם בתוך לבבך
משלי 4 : 22 (ALEP)
כב כי-חיים הם למצאיהם ולכל-בשרו מרפא
משלי 4 : 23 (ALEP)
כג מכל-משמר נצר לבך כי-ממנו תוצאות חיים
משלי 4 : 24 (ALEP)
כד הסר ממך עקשות פה ולזות שפתים הרחק ממך
משלי 4 : 25 (ALEP)
כה עיניך לנכח יביטו ועפעפיך יישרו נגדך
משלי 4 : 26 (ALEP)
כו פלס מעגל רגלך וכל-דרכיך יכנו
משלי 4 : 27 (ALEP)
כז אל-תט-ימין ושמאול הסר רגלך מרע
❮
❯