משלי 31 : 1 (ALEP)
א דברי למואל מלך-- משא אשר-יסרתו אמו
משלי 31 : 2 (ALEP)
ב מה-ברי ומה-בר-בטני ומה בר-נדרי
משלי 31 : 3 (ALEP)
ג אל-תתן לנשים חילך ודרכיך למחות מלכין
משלי 31 : 4 (ALEP)
ד אל למלכים למואל--אל למלכים שתו-יין ולרוזנים או (אי) שכר
משלי 31 : 5 (ALEP)
ה פן-ישתה וישכח מחקק וישנה דין כל-בני-עני
משלי 31 : 6 (ALEP)
ו תנו-שכר לאובד ויין למרי נפש
משלי 31 : 7 (ALEP)
ז ישתה וישכח רישו ועמלו לא יזכר-עוד
משלי 31 : 8 (ALEP)
ח פתח-פיך לאלם אל-דין כל-בני חלוף
משלי 31 : 9 (ALEP)
ט פתח-פיך שפט-צדק ודין עני ואביון
משלי 31 : 10 (ALEP)
י אשת-חיל מי ימצא ורחק מפנינים מכרה
משלי 31 : 11 (ALEP)
יא בטח בה לב בעלה ושלל לא יחסר
משלי 31 : 12 (ALEP)
יב גמלתהו טוב ולא-רע-- כל ימי חייה
משלי 31 : 13 (ALEP)
יג דרשה צמר ופשתים ותעש בחפץ כפיה
משלי 31 : 14 (ALEP)
יד היתה כאניות סוחר ממרחק תביא לחמה
משלי 31 : 15 (ALEP)
טו ותקם בעוד לילה--ותתן טרף לביתה וחק לנערתיה
משלי 31 : 16 (ALEP)
טז זממה שדה ותקחהו מפרי כפיה נטע (נטעה) כרם
משלי 31 : 17 (ALEP)
יז חגרה בעוז מתניה ותאמץ זרועתיה
משלי 31 : 18 (ALEP)
יח טעמה כי-טוב סחרה לא-יכבה בליל (בלילה) נרה
משלי 31 : 19 (ALEP)
יט ידיה שלחה בכישור וכפיה תמכו פלך
משלי 31 : 20 (ALEP)
כ כפה פרשה לעני וידיה שלחה לאביון
משלי 31 : 21 (ALEP)
כא לא-תירא לביתה משלג כי כל-ביתה לבש שנים
משלי 31 : 22 (ALEP)
כב מרבדים עשתה-לה שש וארגמן לבושה
משלי 31 : 23 (ALEP)
כג נודע בשערים בעלה בשבתו עם-זקני-ארץ
משלי 31 : 24 (ALEP)
כד סדין עשתה ותמכר וחגור נתנה לכנעני
משלי 31 : 25 (ALEP)
כה עז-והדר לבושה ותשחק ליום אחרון
משלי 31 : 26 (ALEP)
כו פיה פתחה בחכמה ותורת חסד על-לשונה
משלי 31 : 27 (ALEP)
כז צופיה הילכות (הליכות) ביתה ולחם עצלות לא תאכל
משלי 31 : 28 (ALEP)
כח קמו בניה ויאשרוה בעלה ויהללה
משלי 31 : 29 (ALEP)
כט רבות בנות עשו חיל ואת עלית על-כלנה
משלי 31 : 30 (ALEP)
ל שקר החן והבל היפי אשה יראת-יהוה היא תתהלל
משלי 31 : 31 (ALEP)
לא תנו-לה מפרי ידיה ויהללוה בשערים מעשיה ש
❮
❯