משלי 3 : 1 (ALEP)
א בני תורתי אל-תשכח ומצותי יצר לבך
משלי 3 : 2 (ALEP)
ב כי ארך ימים ושנות חיים-- ושלום יוסיפו לך
משלי 3 : 3 (ALEP)
ג חסד ואמת אל-יעזבך קשרם על-גרגרותיך כתבם על-לוח לבך
משלי 3 : 4 (ALEP)
ד ומצא-חן ושכל-טוב-- בעיני אלהים ואדם
משלי 3 : 5 (ALEP)
ה בטח אל-יהוה בכל-לבך ואל-בינתך אל-תשען
משלי 3 : 6 (ALEP)
ו בכל-דרכיך דעהו והוא יישר ארחתיך
משלי 3 : 7 (ALEP)
ז אל-תהי חכם בעיניך ירא את-יהוה וסור מרע
משלי 3 : 8 (ALEP)
ח רפאות תהי לשרך ושקוי לעצמותיך
משלי 3 : 9 (ALEP)
ט כבד את-יהוה מהונך ומראשית כל-תבואתך
משלי 3 : 10 (ALEP)
י וימלאו אסמיך שבע ותירוש יקביך יפרצו
משלי 3 : 11 (ALEP)
יא מוסר יהוה בני אל-תמאס ואל-תקץ בתוכחתו
משלי 3 : 12 (ALEP)
יב כי את אשר יאהב יהוה יוכיח וכאב את-בן ירצה
משלי 3 : 13 (ALEP)
יג אשרי אדם מצא חכמה ואדם יפיק תבונה
משלי 3 : 14 (ALEP)
יד כי טוב סחרה מסחר-כסף ומחרוץ תבואתה
משלי 3 : 15 (ALEP)
טו יקרה היא מפניים (מפנינים) וכל-חפציך לא ישוו-בה
משלי 3 : 16 (ALEP)
טז ארך ימים בימינה בשמאולה עשר וכבוד
משלי 3 : 17 (ALEP)
יז דרכיה דרכי-נעם וכל-נתיבותיה שלום
משלי 3 : 18 (ALEP)
יח עץ-חיים היא למחזיקים בה ותמכיה מאשר
משלי 3 : 19 (ALEP)
יט יהוה--בחכמה יסד-ארץ כונן שמים בתבונה
משלי 3 : 20 (ALEP)
כ בדעתו תהומות נבקעו ושחקים ירעפו-טל
משלי 3 : 21 (ALEP)
כא בני אל-ילזו מעיניך נצר תשיה ומזמה
משלי 3 : 22 (ALEP)
כב ויהיו חיים לנפשך וחן לגרגרתיך
משלי 3 : 23 (ALEP)
כג אז תלך לבטח דרכך ורגלך לא תגוף
משלי 3 : 24 (ALEP)
כד אם-תשכב לא-תפחד ושכבת וערבה שנתך
משלי 3 : 25 (ALEP)
כה אל-תירא מפחד פתאם ומשאת רשעים כי תבא
משלי 3 : 26 (ALEP)
כו כי-יהוה יהיה בכסלך ושמר רגלך מלכד
משלי 3 : 27 (ALEP)
כז אל-תמנע-טוב מבעליו-- בהיות לאל ידיך (ידך) לעשות
משלי 3 : 28 (ALEP)
כח אל-תאמר לרעיך (לרעך) לך ושוב--ומחר אתן ויש אתך
משלי 3 : 29 (ALEP)
כט אל-תחרש על-רעך רעה והוא-יושב לבטח אתך
משלי 3 : 30 (ALEP)
ל אל-תרוב (תריב) עם-אדם חנם-- אם-לא גמלך רעה
משלי 3 : 31 (ALEP)
לא אל-תקנא באיש חמס ואל-תבחר בכל-דרכיו
משלי 3 : 32 (ALEP)
לב כי תועבת יהוה נלוז ואת-ישרים סודו
משלי 3 : 33 (ALEP)
לג מארת יהוה בבית רשע ונוה צדיקים יברך
משלי 3 : 34 (ALEP)
לד אם-ללצים הוא-יליץ ולעניים (ולענוים) יתן-חן
משלי 3 : 35 (ALEP)
לה כבוד חכמים ינחלו וכסילים מרים קלון
❮
❯