משלי 25 : 1 (ALEP)
א גם-אלה משלי שלמה-- אשר העתיקו אנשי חזקיה מלך-יהודה
משלי 25 : 2 (ALEP)
ב כבד אלהים הסתר דבר וכבד מלכים חקר דבר
משלי 25 : 3 (ALEP)
ג שמים לרום וארץ לעמק ולב מלכים אין חקר
משלי 25 : 4 (ALEP)
ד הגו סיגים מכסף ויצא לצרף כלי
משלי 25 : 5 (ALEP)
ה הגו רשע לפני-מלך ויכון בצדק כסאו
משלי 25 : 6 (ALEP)
ו אל-תתהדר לפני-מלך ובמקום גדלים אל-תעמד
משלי 25 : 7 (ALEP)
ז כי טוב אמר-לך עלה-הנה מהשפילך לפני נדיב--אשר ראו עיניך
משלי 25 : 8 (ALEP)
ח אל-תצא לרב מהר פן מה-תעשה באחריתה--בהכלים אתך רעך
משלי 25 : 9 (ALEP)
ט ריבך ריב את-רעך וסוד אחר אל-תגל
משלי 25 : 10 (ALEP)
י פן-יחסדך שמע ודבתך לא תשוב
משלי 25 : 11 (ALEP)
יא תפוחי זהב במשכיות כסף-- דבר דבר על-אפניו
משלי 25 : 12 (ALEP)
יב נזם זהב וחלי-כתם-- מוכיח חכם על-אזן שמעת
משלי 25 : 13 (ALEP)
יג כצנת שלג ביום קציר--ציר נאמן לשלחיו ונפש אדניו ישיב
משלי 25 : 14 (ALEP)
יד נשיאים ורוח וגשם אין-- איש מתהלל במתת-שקר
משלי 25 : 15 (ALEP)
טו בארך אפים יפתה קצין ולשון רכה תשבר-גרם
משלי 25 : 16 (ALEP)
טז דבש מצאת אכל דיך פן-תשבענו והקאתו
משלי 25 : 17 (ALEP)
יז הקר רגלך מבית רעך פן-ישבעך ושנאך
משלי 25 : 18 (ALEP)
יח מפיץ וחרב וחץ שנון-- איש ענה ברעהו עד שקר
משלי 25 : 19 (ALEP)
יט שן רעה ורגל מועדת-- מבטח בוגד ביום צרה
משלי 25 : 20 (ALEP)
כ מעדה-בגד ביום קרה--חמץ על-נתר ושר בשרים על לב-רע
משלי 25 : 21 (ALEP)
כא אם-רעב שנאך האכלהו לחם ואם-צמא השקהו מים
משלי 25 : 22 (ALEP)
כב כי גחלים--אתה חתה על-ראשו ויהוה ישלם-לך
משלי 25 : 23 (ALEP)
כג רוח צפון תחולל גשם ופנים נזעמים לשון סתר
משלי 25 : 24 (ALEP)
כד טוב שבת על-פנת-גג-- מאשת מדונים (מדינים) ובית חבר
משלי 25 : 25 (ALEP)
כה מים קרים על-נפש עיפה ושמועה טובה מארץ מרחק
משלי 25 : 26 (ALEP)
כו מעין נרפש ומקור משחת-- צדיק מט לפני-רשע
משלי 25 : 27 (ALEP)
כז אכל דבש הרבות לא-טוב וחקר כבדם כבוד
משלי 25 : 28 (ALEP)
כח עיר פרוצה אין חומה-- איש אשר אין מעצר לרוחו
❮
❯