משלי 20 : 1 (ALEP)
א לץ היין המה שכר וכל-שגה בו לא יחכם
משלי 20 : 2 (ALEP)
ב נהם ככפיר אימת מלך מתעברו חוטא נפשו
משלי 20 : 3 (ALEP)
ג כבוד לאיש שבת מריב וכל-אויל יתגלע
משלי 20 : 4 (ALEP)
ד מחרף עצל לא-יחרש ישאל (ושאל) בקציר ואין
משלי 20 : 5 (ALEP)
ה מים עמקים עצה בלב-איש ואיש תבונה ידלנה
משלי 20 : 6 (ALEP)
ו רב-אדם--יקרא איש חסדו ואיש אמונים מי ימצא
משלי 20 : 7 (ALEP)
ז מתהלך בתמו צדיק אשרי בניו אחריו
משלי 20 : 8 (ALEP)
ח מלך יושב על-כסא-דין-- מזרה בעיניו כל-רע
משלי 20 : 9 (ALEP)
ט מי-יאמר זכיתי לבי טהרתי מחטאתי
משלי 20 : 10 (ALEP)
י אבן ואבן איפה ואיפה-- תועבת יהוה גם-שניהם
משלי 20 : 11 (ALEP)
יא גם במעלליו יתנכר-נער-- אם-זך ואם-ישר פעלו
משלי 20 : 12 (ALEP)
יב אזן שמעת ועין ראה-- יהוה עשה גם-שניהם
משלי 20 : 13 (ALEP)
יג אל-תאהב שנה פן-תורש פקח עיניך שבע-לחם
משלי 20 : 14 (ALEP)
יד רע רע יאמר הקונה ואזל לו אז יתהלל
משלי 20 : 15 (ALEP)
טו יש זהב ורב-פנינים וכלי יקר שפתי-דעת
משלי 20 : 16 (ALEP)
טז לקח-בגדו כי-ערב זר ובעד נכרים (נכריה) חבלהו
משלי 20 : 17 (ALEP)
יז ערב לאיש לחם שקר ואחר ימלא-פיהו חצץ
משלי 20 : 18 (ALEP)
יח מחשבות בעצה תכון ובתחבלות עשה מלחמה
משלי 20 : 19 (ALEP)
יט גולה-סוד הולך רכיל ולפתה שפתיו לא תתערב
משלי 20 : 20 (ALEP)
כ מקלל אביו ואמו-- ידעך נרו באישון (באשון) חשך
משלי 20 : 21 (ALEP)
כא נחלה מבחלת (מבהלת) בראשונה ואחריתה לא תברך
משלי 20 : 22 (ALEP)
כב אל-תאמר אשלמה-רע קוה ליהוה וישע לך
משלי 20 : 23 (ALEP)
כג תועבת יהוה אבן ואבן ומאזני מרמה לא-טוב
משלי 20 : 24 (ALEP)
כד מיהוה מצעדי-גבר ואדם מה-יבין דרכו
משלי 20 : 25 (ALEP)
כה מוקש אדם ילע קדש ואחר נדרים לבקר
משלי 20 : 26 (ALEP)
כו מזרה רשעים מלך חכם וישב עליהם אופן
משלי 20 : 27 (ALEP)
כז נר יהוה נשמת אדם חפש כל-חדרי-בטן
משלי 20 : 28 (ALEP)
כח חסד ואמת יצרו-מלך וסעד בחסד כסאו
משלי 20 : 29 (ALEP)
כט תפארת בחורים כחם והדר זקנים שיבה
משלי 20 : 30 (ALEP)
ל חברות פצע תמריק (תמרוק) ברע ומכות חדרי-בטן
❮
❯