משלי 17 : 1 (ALEP)
א טוב פת חרבה ושלוה-בה-- מבית מלא זבחי-ריב
משלי 17 : 2 (ALEP)
ב עבד-משכיל--ימשל בבן מביש ובתוך אחים יחלק נחלה
משלי 17 : 3 (ALEP)
ג מצרף לכסף וכור לזהב ובחן לבות יהוה
משלי 17 : 4 (ALEP)
ד מרע מקשיב על-שפת-און שקר מזין על-לשון הות
משלי 17 : 5 (ALEP)
ה לעג לרש חרף עשהו שמח לאיד לא ינקה
משלי 17 : 6 (ALEP)
ו עטרת זקנים בני בנים ותפארת בנים אבותם
משלי 17 : 7 (ALEP)
ז לא-נאוה לנבל שפת-יתר אף כי-לנדיב שפת-שקר
משלי 17 : 8 (ALEP)
ח אבן-חן השחד בעיני בעליו אל-כל-אשר יפנה ישכיל
משלי 17 : 9 (ALEP)
ט מכסה-פשע מבקש אהבה ושנה בדבר מפריד אלוף
משלי 17 : 10 (ALEP)
י תחת גערה במבין-- מהכות כסיל מאה
משלי 17 : 11 (ALEP)
יא אך-מרי יבקש-רע ומלאך אכזרי ישלח-בו
משלי 17 : 12 (ALEP)
יב פגוש דב שכול באיש ואל-כסיל באולתו
משלי 17 : 13 (ALEP)
יג משיב רעה תחת טובה-- לא-תמיש (תמוש) רעה מביתו
משלי 17 : 14 (ALEP)
יד פוטר מים ראשית מדון ולפני התגלע הריב נטוש
משלי 17 : 15 (ALEP)
טו מצדיק רשע ומרשיע צדיק-- תועבת יהוה גם-שניהם
משלי 17 : 16 (ALEP)
טז למה-זה מחיר ביד-כסיל-- לקנות חכמה ולב-אין
משלי 17 : 17 (ALEP)
יז בכל-עת אהב הרע ואח לצרה יולד
משלי 17 : 18 (ALEP)
יח אדם חסר-לב תוקע כף ערב ערבה לפני רעהו
משלי 17 : 19 (ALEP)
יט אהב פשע אהב מצה מגביה פתחו מבקש-שבר
משלי 17 : 20 (ALEP)
כ עקש-לב לא ימצא-טוב ונהפך בלשונו יפול ברעה
משלי 17 : 21 (ALEP)
כא ילד כסיל לתוגה לו ולא-ישמח אבי נבל
משלי 17 : 22 (ALEP)
כב לב שמח ייטיב גהה ורוח נכאה תיבש-גרם
משלי 17 : 23 (ALEP)
כג שחד מחק רשע יקח-- להטות ארחות משפט
משלי 17 : 24 (ALEP)
כד את-פני מבין חכמה ועיני כסיל בקצה-ארץ
משלי 17 : 25 (ALEP)
כה כעס לאביו בן כסיל וממר ליולדתו
משלי 17 : 26 (ALEP)
כו גם ענוש לצדיק לא-טוב-- להכות נדיבים על-ישר
משלי 17 : 27 (ALEP)
כז חושך אמריו יודע דעת וקר- (יקר-) רוח איש תבונה
משלי 17 : 28 (ALEP)
כח גם אויל מחריש חכם יחשב אטם שפתיו נבון
❮
❯