משלי 16 : 1 (ALEP)
א לאדם מערכי-לב ומיהוה מענה לשון
משלי 16 : 2 (ALEP)
ב כל-דרכי-איש זך בעיניו ותכן רוחות יהוה
משלי 16 : 3 (ALEP)
ג גל אל-יהוה מעשיך ויכנו מחשבתיך
משלי 16 : 4 (ALEP)
ד כל פעל יהוה למענהו וגם-רשע ליום רעה
משלי 16 : 5 (ALEP)
ה תועבת יהוה כל-גבה-לב יד ליד לא ינקה
משלי 16 : 6 (ALEP)
ו בחסד ואמת יכפר עון וביראת יהוה סור מרע
משלי 16 : 7 (ALEP)
ז ברצות יהוה דרכי-איש גם-אויביו ישלם אתו
משלי 16 : 8 (ALEP)
ח טוב-מעט בצדקה-- מרב תבואות בלא משפט
משלי 16 : 9 (ALEP)
ט לב אדם יחשב דרכו ויהוה יכין צעדו
משלי 16 : 10 (ALEP)
י קסם על-שפתי-מלך במשפט לא ימעל-פיו
משלי 16 : 11 (ALEP)
יא פלס ומאזני משפט--ליהוה מעשהו כל-אבני-כיס
משלי 16 : 12 (ALEP)
יב תועבת מלכים עשות רשע כי בצדקה יכון כסא
משלי 16 : 13 (ALEP)
יג רצון מלכים שפתי-צדק ודבר ישרים יאהב
משלי 16 : 14 (ALEP)
יד חמת-מלך מלאכי-מות ואיש חכם יכפרנה
משלי 16 : 15 (ALEP)
טו באור-פני-מלך חיים ורצונו כעב מלקוש
משלי 16 : 16 (ALEP)
טז קנה-חכמה--מה-טוב מחרוץ וקנות בינה נבחר מכסף
משלי 16 : 17 (ALEP)
יז מסלת ישרים סור מרע שמר נפשו נצר דרכו
משלי 16 : 18 (ALEP)
יח לפני-שבר גאון ולפני כשלון גבה רוח
משלי 16 : 19 (ALEP)
יט טוב שפל-רוח את-עניים (ענוים) מחלק שלל את-גאים
משלי 16 : 20 (ALEP)
כ משכיל על-דבר ימצא-טוב ובוטח ביהוה אשריו
משלי 16 : 21 (ALEP)
כא לחכם-לב יקרא נבון ומתק שפתים יסיף לקח
משלי 16 : 22 (ALEP)
כב מקור חיים שכל בעליו ומוסר אולים אולת
משלי 16 : 23 (ALEP)
כג לב חכם ישכיל פיהו ועל-שפתיו יסיף לקח
משלי 16 : 24 (ALEP)
כד צוף-דבש אמרי-נעם מתוק לנפש ומרפא לעצם
משלי 16 : 25 (ALEP)
כה יש דרך ישר לפני-איש ואחריתה דרכי-מות
משלי 16 : 26 (ALEP)
כו נפש עמל עמלה לו כי-אכף עליו פיהו
משלי 16 : 27 (ALEP)
כז איש בליעל כרה רעה ועל-שפתיו (שפתו) כאש צרבת
משלי 16 : 28 (ALEP)
כח איש תהפכות ישלח מדון ונרג ן מפריד אלוף
משלי 16 : 29 (ALEP)
כט איש חמס יפתה רעהו והוליכו בדרך לא-טוב
משלי 16 : 30 (ALEP)
ל עצה עיניו לחשב תהפכות קרץ שפתיו כלה רעה
משלי 16 : 31 (ALEP)
לא עטרת תפארת שיבה בדרך צדקה תמצא
משלי 16 : 32 (ALEP)
לב טוב ארך אפים מגבור ומשל ברוחו מלכד עיר
משלי 16 : 33 (ALEP)
לג בחיק יוטל את-הגורל ומיהוה כל-משפטו
❮
❯