משלי 12 : 1 (ALEP)
א אהב מוסר אהב דעת ושונא תוכחת בער
משלי 12 : 2 (ALEP)
ב טוב--יפיק רצון מיהוה ואיש מזמות ירשיע
משלי 12 : 3 (ALEP)
ג לא-יכון אדם ברשע ושרש צדיקים בל-ימוט
משלי 12 : 4 (ALEP)
ד אשת-חיל עטרת בעלה וכרקב בעצמותיו מבישה
משלי 12 : 5 (ALEP)
ה מחשבות צדיקים משפט תחבלות רשעים מרמה
משלי 12 : 6 (ALEP)
ו דברי רשעים ארב-דם ופי ישרים יצילם
משלי 12 : 7 (ALEP)
ז הפוך רשעים ואינם ובית צדיקים יעמד
משלי 12 : 8 (ALEP)
ח לפי-שכלו יהלל-איש ונעוה-לב יהיה לבוז
משלי 12 : 9 (ALEP)
ט טוב נקלה ועבד לו-- ממתכבד וחסר-לחם
משלי 12 : 10 (ALEP)
י יודע צדיק נפש בהמתו ורחמי רשעים אכזרי
משלי 12 : 11 (ALEP)
יא עבד אדמתו ישבע-לחם ומרדף ריקים חסר-לב
משלי 12 : 12 (ALEP)
יב חמד רשע מצוד רעים ושרש צדיקים יתן
משלי 12 : 13 (ALEP)
יג בפשע שפתים מוקש רע ויצא מצרה צדיק
משלי 12 : 14 (ALEP)
יד מפרי פי-איש ישבע-טוב וגמול ידי-אדם ישוב (ישיב) לו
משלי 12 : 15 (ALEP)
טו דרך אויל ישר בעיניו ושמע לעצה חכם
משלי 12 : 16 (ALEP)
טז אויל--ביום יודע כעסו וכסה קלון ערום
משלי 12 : 17 (ALEP)
יז יפיח אמונה יגיד צדק ועד שקרים מרמה
משלי 12 : 18 (ALEP)
יח יש בוטה כמדקרות חרב ולשון חכמים מרפא
משלי 12 : 19 (ALEP)
יט שפת-אמת תכון לעד ועד-ארגיעה לשון שקר
משלי 12 : 20 (ALEP)
כ מרמה בלב-חרשי רע וליעצי שלום שמחה
משלי 12 : 21 (ALEP)
כא לא-יאנה לצדיק כל-און ורשעים מלאו רע
משלי 12 : 22 (ALEP)
כב תועבת יהוה שפתי-שקר ועשי אמונה רצונו
משלי 12 : 23 (ALEP)
כג אדם ערום כסה דעת ולב כסילים יקרא אולת
משלי 12 : 24 (ALEP)
כד יד-חרוצים תמשול ורמיה תהיה למס
משלי 12 : 25 (ALEP)
כה דאגה בלב-איש ישחנה ודבר טוב ישמחנה
משלי 12 : 26 (ALEP)
כו יתר מרעהו צדיק ודרך רשעים תתעם
משלי 12 : 27 (ALEP)
כז לא-יחרך רמיה צידו והון-אדם יקר חרוץ
משלי 12 : 28 (ALEP)
כח בארח-צדקה חיים ודרך נתיבה אל-מות
❮
❯