משלי 1 : 1 (ALEP)
א מ שלי שלמה בן-דוד-- מלך ישראל
משלי 1 : 2 (ALEP)
ב לדעת חכמה ומוסר להבין אמרי בינה
משלי 1 : 3 (ALEP)
ג לקחת מוסר השכל צדק ומשפט ומשרים
משלי 1 : 4 (ALEP)
ד לתת לפתאים ערמה לנער דעת ומזמה
משלי 1 : 5 (ALEP)
ה ישמע חכם ויוסף לקח ונבון תחבלות יקנה
משלי 1 : 6 (ALEP)
ו להבין משל ומליצה דברי חכמים וחידתם
משלי 1 : 7 (ALEP)
ז יראת יהוה ראשית דעת חכמה ומוסר אוילים בזו
משלי 1 : 8 (ALEP)
ח שמע בני מוסר אביך ואל-תטש תורת אמך
משלי 1 : 9 (ALEP)
ט כי לוית חן הם לראשך וענקים לגרגרתך
משלי 1 : 10 (ALEP)
י בני-- אם-יפתוך חטאים אל-תבא
משלי 1 : 11 (ALEP)
יא אם-יאמרו לכה אתנו נארבה לדם נצפנה לנקי חנם
משלי 1 : 12 (ALEP)
יב נבלעם כשאול חיים ותמימים כיורדי בור
משלי 1 : 13 (ALEP)
יג כל-הון יקר נמצא נמלא בתינו שלל
משלי 1 : 14 (ALEP)
יד גורלך תפיל בתוכנו כיס אחד יהיה לכלנו
משלי 1 : 15 (ALEP)
טו בני--אל-תלך בדרך אתם מנע רגלך מנתיבתם
משלי 1 : 16 (ALEP)
טז כי רגליהם לרע ירוצו וימהרו לשפך-דם
משלי 1 : 17 (ALEP)
יז כי-חנם מזרה הרשת-- בעיני כל-בעל כנף
משלי 1 : 18 (ALEP)
יח והם לדמם יארבו יצפנו לנפשתם
משלי 1 : 19 (ALEP)
יט כן--ארחות כל-בצע בצע את-נפש בעליו יקח
משלי 1 : 20 (ALEP)
כ חכמות בחוץ תרנה ברחבות תתן קולה
משלי 1 : 21 (ALEP)
כא בראש המיות תקרא בפתחי שערים בעיר--אמריה תאמר
משלי 1 : 22 (ALEP)
כב עד-מתי פתים-- תאהבו-פתי ולצים--לצון חמדו להם וכסילים ישנאו-דעת
משלי 1 : 23 (ALEP)
כג תשובו לתוכחתי הנה אביעה לכם רוחי אודיעה דברי אתכם
משלי 1 : 24 (ALEP)
כד יען קראתי ותמאנו נטיתי ידי ואין מקשיב
משלי 1 : 25 (ALEP)
כה ותפרעו כל-עצתי ותוכחתי לא אביתם
משלי 1 : 26 (ALEP)
כו גם-אני באידכם אשחק אלעג בבא פחדכם
משלי 1 : 27 (ALEP)
כז בבא כשאוה (כשואה) פחדכם-- ואידכם כסופה יאתה בבא עליכם צרה וצוקה
משלי 1 : 28 (ALEP)
כח אז יקראנני ולא אענה ישחרנני ולא ימצאנני
משלי 1 : 29 (ALEP)
כט תחת כי-שנאו דעת ויראת יהוה לא בחרו
משלי 1 : 30 (ALEP)
ל לא-אבו לעצתי נאצו כל-תוכחתי
משלי 1 : 31 (ALEP)
לא ויאכלו מפרי דרכם וממעצתיהם ישבעו
משלי 1 : 32 (ALEP)
לב כי משובת פתים תהרגם ושלות כסילים תאבדם
משלי 1 : 33 (ALEP)
לג ושמע לי ישכן-בטח ושאנן מפחד רעה
❮
❯