במדבר 3 : 1 (ALEP)
א ואלה תולדת אהרן ומשה ביום דבר יהוה את משה--בהר סיני
במדבר 3 : 2 (ALEP)
ב ואלה שמות בני אהרן הבכר נדב ואביהוא אלעזר ואיתמר
במדבר 3 : 3 (ALEP)
ג אלה שמות בני אהרן הכהנים המשחים--אשר מלא ידם לכהן
במדבר 3 : 4 (ALEP)
ד וימת נדב ואביהוא לפני יהוה בהקרבם אש זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם פ
במדבר 3 : 5 (ALEP)
ה וידבר יהוה אל משה לאמר
במדבר 3 : 6 (ALEP)
ו הקרב את מטה לוי והעמדת אתו לפני אהרן הכהן ושרתו אתו
במדבר 3 : 7 (ALEP)
ז ושמרו את משמרתו ואת משמרת כל העדה לפני אהל מועד--לעבד את עבדת המשכן
במדבר 3 : 8 (ALEP)
ח ושמרו את כל כלי אהל מועד ואת משמרת בני ישראל--לעבד את עבדת המשכן
במדבר 3 : 9 (ALEP)
ט ונתתה את הלוים לאהרן ולבניו נתונם נתונם המה לו מאת בני ישראל
במדבר 3 : 10 (ALEP)
י ואת אהרן ואת בניו תפקד ושמרו את כהנתם והזר הקרב יומת פ
במדבר 3 : 11 (ALEP)
יא וידבר יהוה אל משה לאמר
במדבר 3 : 12 (ALEP)
יב ואני הנה לקחתי את הלוים מתוך בני ישראל תחת כל בכור פטר רחם מבני ישראל והיו לי הלוים
במדבר 3 : 13 (ALEP)
יג כי לי כל בכור--ביום הכתי כל בכור בארץ מצרים הקדשתי לי כל בכור בישראל מאדם עד בהמה לי יהיו אני יהוה פ
במדבר 3 : 14 (ALEP)
יד וידבר יהוה אל משה במדבר סיני לאמר
במדבר 3 : 15 (ALEP)
טו פקד את בני לוי לבית אבתם למשפחתם כל זכר מבן חדש ומעלה תפקדם
במדבר 3 : 16 (ALEP)
טז ויפקד אתם משה על פי יהוה כאשר צוה
במדבר 3 : 17 (ALEP)
יז ויהיו אלה בני לוי בשמתם--גרשון וקהת ומררי
במדבר 3 : 18 (ALEP)
יח ואלה שמות בני גרשון למשפחתם--לבני ושמעי
במדבר 3 : 19 (ALEP)
יט ובני קהת למשפחתם--עמרם ויצהר חברון ועזיאל
במדבר 3 : 20 (ALEP)
כ ובני מררי למשפחתם--מחלי ומושי אלה הם משפחת הלוי לבית אבתם
במדבר 3 : 21 (ALEP)
כא לגרשון--משפחת הלבני ומשפחת השמעי אלה הם משפחת הגרשני
במדבר 3 : 22 (ALEP)
כב פקדיהם במספר כל זכר מבן חדש ומעלה פקדיהם שבעת אלפים וחמש מאות
במדבר 3 : 23 (ALEP)
כג משפחת הגרשני אחרי המשכן יחנו ימה
במדבר 3 : 24 (ALEP)
כד ונשיא בית אב לגרשני אליסף בן לאל
במדבר 3 : 25 (ALEP)
כה ומשמרת בני גרשון באהל מועד המשכן והאהל מכסהו--ומסך פתח אהל מועד
במדבר 3 : 26 (ALEP)
כו וקלעי החצר ואת מסך פתח החצר אשר על המשכן ועל המזבח סביב ואת מיתריו לכל עבדתו ס
במדבר 3 : 27 (ALEP)
כז ולקהת משפחת העמרמי ומשפחת היצהרי ומשפחת החברני ומשפחת העזיאלי אלה הם משפחת הקהתי
במדבר 3 : 28 (ALEP)
כח במספר כל זכר מבן חדש ומעלה--שמנת אלפים ושש מאות שמרי משמרת הקדש
במדבר 3 : 29 (ALEP)
כט משפחת בני קהת יחנו על ירך המשכן תימנה
במדבר 3 : 30 (ALEP)
ל ונשיא בית אב למשפחת הקהתי אליצפן בן עזיאל
במדבר 3 : 31 (ALEP)
לא ומשמרתם הארן והשלחן והמנרה והמזבחת וכלי הקדש אשר ישרתו בהם והמסך--וכל עבדתו
במדבר 3 : 32 (ALEP)
לב ונשיא נשיאי הלוי אלעזר בן אהרן הכהן פקדת שמרי משמרת הקדש
במדבר 3 : 33 (ALEP)
לג למררי--משפחת המחלי ומשפחת המושי אלה הם משפחת מררי
במדבר 3 : 34 (ALEP)
לד ופקדיהם במספר כל זכר מבן חדש ומעלה--ששת אלפים ומאתים
במדבר 3 : 35 (ALEP)
לה ונשיא בית אב למשפחת מררי צוריאל בן אביחיל על ירך המשכן יחנו צפנה
במדבר 3 : 36 (ALEP)
לו ופקדת משמרת בני מררי--קרשי המשכן ובריחיו ועמדיו ואדניו וכל כליו--וכל עבדתו
במדבר 3 : 37 (ALEP)
לז ועמדי החצר סביב ואדניהם ויתדתם ומיתריהם
במדבר 3 : 38 (ALEP)
לח והחנים לפני המשכן קדמה לפני אהל מועד מזרחה משה ואהרן ובניו שמרים משמרת המקדש למשמרת בני ישראל והזר הקרב יומת
במדבר 3 : 39 (ALEP)
לט כל פקודי הלוים אשר פקד משה ואהרן על פי יהוה--למשפחתם כל זכר מבן חדש ומעלה שנים ועשרים אלף ס
במדבר 3 : 40 (ALEP)
מ ויאמר יהוה אל משה פקד כל בכר זכר לבני ישראל מבן חדש ומעלה ושא את מספר שמתם
במדבר 3 : 41 (ALEP)
מא ולקחת את הלוים לי אני יהוה תחת כל בכר בבני ישראל ואת בהמת הלוים תחת כל בכור בבהמת בני ישראל
במדבר 3 : 42 (ALEP)
מב ויפקד משה כאשר צוה יהוה אתו את כל בכור בבני ישראל
במדבר 3 : 43 (ALEP)
מג ויהי כל בכור זכר במספר שמת מבן חדש ומעלה--לפקדיהם שנים ועשרים אלף שלשה ושבעים ומאתים פ
במדבר 3 : 44 (ALEP)
מד וידבר יהוה אל משה לאמר
במדבר 3 : 45 (ALEP)
מה קח את הלוים תחת כל בכור בבני ישראל ואת בהמת הלוים תחת בהמתם והיו לי הלוים אני יהוה
במדבר 3 : 46 (ALEP)
מו ואת פדויי השלשה והשבעים והמאתים--העדפים על הלוים מבכור בני ישראל
במדבר 3 : 47 (ALEP)
מז ולקחת חמשת חמשת שקלים--לגלגלת בשקל הקדש תקח עשרים גרה השקל
במדבר 3 : 48 (ALEP)
מח ונתתה הכסף לאהרן ולבניו--פדויי העדפים בהם
במדבר 3 : 49 (ALEP)
מט ויקח משה את כסף הפדיום--מאת העדפים על פדויי הלוים
במדבר 3 : 50 (ALEP)
נ מאת בכור בני ישראל--לקח את הכסף חמשה וששים ושלש מאות ואלף--בשקל הקדש
במדבר 3 : 51 (ALEP)
נא ויתן משה את כסף הפדים לאהרן ולבניו--על פי יהוה כאשר צוה יהוה את משה פ
❮
❯