במדבר 21 : 1 (ALEP)
א וישמע הכנעני מלך ערד ישב הנגב כי בא ישראל דרך האתרים וילחם בישראל וישב ממנו שבי
במדבר 21 : 2 (ALEP)
ב וידר ישראל נדר ליהוה ויאמר אם נתן תתן את העם הזה בידי--והחרמתי את עריהם
במדבר 21 : 3 (ALEP)
ג וישמע יהוה בקול ישראל ויתן את הכנעני ויחרם אתהם ואת עריהם ויקרא שם המקום חרמה פ
במדבר 21 : 4 (ALEP)
ד ויסעו מהר ההר דרך ים סוף לסבב את ארץ אדום ותקצר נפש העם בדרך
במדבר 21 : 5 (ALEP)
ה וידבר העם באלהים ובמשה למה העליתנו ממצרים למות במדבר כי אין לחם ואין מים ונפשנו קצה בלחם הקלקל
במדבר 21 : 6 (ALEP)
ו וישלח יהוה בעם את הנחשים השרפים וינשכו את העם וימת עם רב מישראל
במדבר 21 : 7 (ALEP)
ז ויבא העם אל משה ויאמרו חטאנו כי דברנו ביהוה ובך--התפלל אל יהוה ויסר מעלינו את הנחש ויתפלל משה בעד העם
במדבר 21 : 8 (ALEP)
ח ויאמר יהוה אל משה עשה לך שרף ושים אתו על נס והיה כל הנשוך וראה אתו וחי
במדבר 21 : 9 (ALEP)
ט ויעש משה נחש נחשת וישמהו על הנס והיה אם נשך הנחש את איש--והביט אל נחש הנחשת וחי
במדבר 21 : 10 (ALEP)
י ויסעו בני ישראל ויחנו באבת
במדבר 21 : 11 (ALEP)
יא ויסעו מאבת ויחנו בעיי העברים במדבר אשר על פני מואב ממזרח השמש
במדבר 21 : 12 (ALEP)
יב משם נסעו ויחנו בנחל זרד
במדבר 21 : 13 (ALEP)
יג משם נסעו ויחנו מעבר ארנון אשר במדבר היצא מגבל האמרי כי ארנון גבול מואב בין מואב ובין האמרי
במדבר 21 : 14 (ALEP)
יד על כן יאמר בספר מלחמת יהוה את והב בסופה ואת הנחלים ארנון
במדבר 21 : 15 (ALEP)
טו ואשד הנחלים אשר נטה לשבת ער ונשען לגבול מואב
במדבר 21 : 16 (ALEP)
טז ומשם בארה הוא הבאר אשר אמר יהוה למשה אסף את העם ואתנה להם מים ס
במדבר 21 : 17 (ALEP)
יז אז ישיר ישראל את השירה הזאת עלי באר ענו לה
במדבר 21 : 18 (ALEP)
יח באר חפרוה שרים כרוה נדיבי העם במחקק במשענתם וממדבר מתנה
במדבר 21 : 19 (ALEP)
יט וממתנה נחליאל ומנחליאל במות
במדבר 21 : 20 (ALEP)
כ ומבמות הגיא אשר בשדה מואב--ראש הפסגה ונשקפה על פני הישימן פ
במדבר 21 : 21 (ALEP)
כא וישלח ישראל מלאכים אל סיחן מלך האמרי לאמר
במדבר 21 : 22 (ALEP)
כב אעברה בארצך לא נטה בשדה ובכרם--לא נשתה מי באר בדרך המלך נלך עד אשר נעבר גבלך
במדבר 21 : 23 (ALEP)
כג ולא נתן סיחן את ישראל עבר בגבלו ויאסף סיחן את כל עמו ויצא לקראת ישראל המדברה ויבא יהצה וילחם בישראל
במדבר 21 : 24 (ALEP)
כד ויכהו ישראל לפי חרב ויירש את ארצו מארנן עד יבק עד בני עמון--כי עז גבול בני עמון
במדבר 21 : 25 (ALEP)
כה ויקח ישראל את כל הערים האלה וישב ישראל בכל ערי האמרי בחשבון ובכל בנתיה
במדבר 21 : 26 (ALEP)
כו כי חשבון--עיר סיחן מלך האמרי הוא והוא נלחם במלך מואב הראשון ויקח את כל ארצו מידו עד ארנן
במדבר 21 : 27 (ALEP)
כז על כן יאמרו המשלים באו חשבון תבנה ותכונן עיר סיחון
במדבר 21 : 28 (ALEP)
כח כי אש יצאה מחשבון להבה מקרית סיחן אכלה ער מואב בעלי במות ארנן
במדבר 21 : 29 (ALEP)
כט אוי לך מואב אבדת עם כמוש נתן בניו פליטם ובנתיו בשבית למלך אמרי סיחון
במדבר 21 : 30 (ALEP)
ל ונירם אבד חשבון עד דיבן ונשים עד נפח אשר עד מידבא
במדבר 21 : 31 (ALEP)
לא וישב ישראל בארץ האמרי
במדבר 21 : 32 (ALEP)
לב וישלח משה לרגל את יעזר וילכדו בנתיה ויירש (ויורש) את האמרי אשר שם
במדבר 21 : 33 (ALEP)
לג ויפנו ויעלו דרך הבשן ויצא עוג מלך הבשן לקראתם הוא וכל עמו למלחמה--אדרעי
במדבר 21 : 34 (ALEP)
לד ויאמר יהוה אל משה אל תירא אתו--כי בידך נתתי אתו ואת כל עמו ואת ארצו ועשית לו--כאשר עשית לסיחן מלך האמרי אשר יושב בחשבון
במדבר 21 : 35 (ALEP)
לה ויכו אתו ואת בניו ואת כל עמו עד בלתי השאיר לו שריד ויירשו את ארצו
❮
❯