במדבר 20 : 1 (ALEP)
א ויבאו בני ישראל כל העדה מדבר צן בחדש הראשון וישב העם בקדש ותמת שם מרים ותקבר שם
במדבר 20 : 2 (ALEP)
ב ולא היה מים לעדה ויקהלו על משה ועל אהרן
במדבר 20 : 3 (ALEP)
ג וירב העם עם משה ויאמרו לאמר ולו גוענו בגוע אחינו לפני יהוה
במדבר 20 : 4 (ALEP)
ד ולמה הבאתם את קהל יהוה אל המדבר הזה למות שם אנחנו ובעירנו
במדבר 20 : 5 (ALEP)
ה ולמה העליתנו ממצרים להביא אתנו אל המקום הרע הזה לא מקום זרע ותאנה וגפן ורמון ומים אין לשתות
במדבר 20 : 6 (ALEP)
ו ויבא משה ואהרן מפני הקהל אל פתח אהל מועד ויפלו על פניהם וירא כבוד יהוה אליהם פ
במדבר 20 : 7 (ALEP)
ז וידבר יהוה אל משה לאמר
במדבר 20 : 8 (ALEP)
ח קח את המטה והקהל את העדה אתה ואהרן אחיך ודברתם אל הסלע לעיניהם ונתן מימיו והוצאת להם מים מן הסלע והשקית את העדה ואת בעירם
במדבר 20 : 9 (ALEP)
ט ויקח משה את המטה מלפני יהוה כאשר צוהו
במדבר 20 : 10 (ALEP)
י ויקהלו משה ואהרן את הקהל--אל פני הסלע ויאמר להם שמעו נא המרים--המן הסלע הזה נוציא לכם מים
במדבר 20 : 11 (ALEP)
יא וירם משה את ידו ויך את הסלע במטהו--פעמים ויצאו מים רבים ותשת העדה ובעירם ס
במדבר 20 : 12 (ALEP)
יב ויאמר יהוה אל משה ואל אהרן יען לא האמנתם בי להקדישני לעיני בני ישראל--לכן לא תביאו את הקהל הזה אל הארץ אשר נתתי להם
במדבר 20 : 13 (ALEP)
יג המה מי מריבה אשר רבו בני ישראל את יהוה ויקדש בם ס
במדבר 20 : 14 (ALEP)
יד וישלח משה מלאכים מקדש אל מלך אדום כה אמר אחיך ישראל אתה ידעת את כל התלאה אשר מצאתנו
במדבר 20 : 15 (ALEP)
טו וירדו אבתינו מצרימה ונשב במצרים ימים רבים וירעו לנו מצרים ולאבתינו
במדבר 20 : 16 (ALEP)
טז ונצעק אל יהוה וישמע קלנו וישלח מלאך ויצאנו ממצרים והנה אנחנו בקדש עיר קצה גבולך
במדבר 20 : 17 (ALEP)
יז נעברה נא בארצך לא נעבר בשדה ובכרם ולא נשתה מי באר דרך המלך נלך לא נטה ימין ושמאול עד אשר נעבר גבלך
במדבר 20 : 18 (ALEP)
יח ויאמר אליו אדום לא תעבר בי--פן בחרב אצא לקראתך
במדבר 20 : 19 (ALEP)
יט ויאמרו אליו בני ישראל במסלה נעלה ואם מימיך נשתה אני ומקני ונתתי מכרם רק אין דבר ברגלי אעברה
במדבר 20 : 20 (ALEP)
כ ויאמר לא תעבר ויצא אדום לקראתו בעם כבד וביד חזקה
במדבר 20 : 21 (ALEP)
כא וימאן אדום נתן את ישראל עבר בגבלו ויט ישראל מעליו פ
במדבר 20 : 22 (ALEP)
כב ויסעו מקדש ויבאו בני ישראל כל העדה הר ההר
במדבר 20 : 23 (ALEP)
כג ויאמר יהוה אל משה ואל אהרן בהר ההר על גבול ארץ אדום לאמר
במדבר 20 : 24 (ALEP)
כד יאסף אהרן אל עמיו כי לא יבא אל הארץ אשר נתתי לבני ישראל--על אשר מריתם את פי למי מריבה
במדבר 20 : 25 (ALEP)
כה קח את אהרן ואת אלעזר בנו והעל אתם הר ההר
במדבר 20 : 26 (ALEP)
כו והפשט את אהרן את בגדיו והלבשתם את אלעזר בנו ואהרן יאסף ומת שם
במדבר 20 : 27 (ALEP)
כז ויעש משה כאשר צוה יהוה ויעלו אל הר ההר לעיני כל העדה
במדבר 20 : 28 (ALEP)
כח ויפשט משה את אהרן את בגדיו וילבש אתם את אלעזר בנו וימת אהרן שם בראש ההר וירד משה ואלעזר מן ההר
במדבר 20 : 29 (ALEP)
כט ויראו כל העדה כי גוע אהרן ויבכו את אהרן שלשים יום כל בית ישראל ס
❮
❯