במדבר 18 : 1 (ALEP)
א ויאמר יהוה אל אהרן אתה ובניך ובית אביך אתך תשאו את עון המקדש ואתה ובניך אתך תשאו את עון כהנתכם
במדבר 18 : 2 (ALEP)
ב וגם את אחיך מטה לוי שבט אביך הקרב אתך וילוו עליך וישרתוך ואתה ובניך אתך לפני אהל העדת
במדבר 18 : 3 (ALEP)
ג ושמרו משמרתך ומשמרת כל האהל אך אל כלי הקדש ואל המזבח לא יקרבו ולא ימתו גם הם גם אתם
במדבר 18 : 4 (ALEP)
ד ונלוו עליך--ושמרו את משמרת אהל מועד לכל עבדת האהל וזר לא יקרב אליכם
במדבר 18 : 5 (ALEP)
ה ושמרתם את משמרת הקדש ואת משמרת המזבח ולא יהיה עוד קצף על בני ישראל
במדבר 18 : 6 (ALEP)
ו ואני הנה לקחתי את אחיכם הלוים מתוך בני ישראל--לכם מתנה נתנים ליהוה לעבד את עבדת אהל מועד
במדבר 18 : 7 (ALEP)
ז ואתה ובניך אתך תשמרו את כהנתכם לכל דבר המזבח ולמבית לפרכת--ועבדתם עבדת מתנה אתן את כהנתכם והזר הקרב יומת פ
במדבר 18 : 8 (ALEP)
ח וידבר יהוה אל אהרן ואני הנה נתתי לך את משמרת תרומתי לכל קדשי בני ישראל לך נתתים למשחה ולבניך--לחק עולם
במדבר 18 : 9 (ALEP)
ט זה יהיה לך מקדש הקדשים מן האש כל קרבנם לכל מנחתם ולכל חטאתם ולכל אשמם אשר ישיבו לי--קדש קדשים לך הוא ולבניך
במדבר 18 : 10 (ALEP)
י בקדש הקדשים תאכלנו כל זכר יאכל אתו קדש יהיה לך
במדבר 18 : 11 (ALEP)
יא וזה לך תרומת מתנם לכל תנופת בני ישראל--לך נתתים ולבניך ולבנתיך אתך לחק עולם כל טהור בביתך יאכל אתו
במדבר 18 : 12 (ALEP)
יב כל חלב יצהר וכל חלב תירוש ודגן--ראשיתם אשר יתנו ליהוה לך נתתים
במדבר 18 : 13 (ALEP)
יג בכורי כל אשר בארצם אשר יביאו ליהוה--לך יהיה כל טהור בביתך יאכלנו
במדבר 18 : 14 (ALEP)
יד כל חרם בישראל לך יהיה
במדבר 18 : 15 (ALEP)
טו כל פטר רחם לכל בשר אשר יקריבו ליהוה באדם ובבהמה--יהיה לך אך פדה תפדה את בכור האדם ואת בכור הבהמה הטמאה תפדה
במדבר 18 : 16 (ALEP)
טז ופדויו מבן חדש תפדה בערכך כסף חמשת שקלים בשקל הקדש עשרים גרה הוא
במדבר 18 : 17 (ALEP)
יז אך בכור שור או בכור כשב או בכור עז לא תפדה--קדש הם את דמם תזרק על המזבח ואת חלבם תקטיר--אשה לריח ניחח ליהוה
במדבר 18 : 18 (ALEP)
יח ובשרם יהיה לך כחזה התנופה וכשוק הימין לך יהיה
במדבר 18 : 19 (ALEP)
יט כל תרומת הקדשים אשר ירימו בני ישראל ליהוה--נתתי לך ולבניך ולבנתיך אתך לחק עולם ברית מלח עולם הוא לפני יהוה לך ולזרעך אתך
במדבר 18 : 20 (ALEP)
כ ויאמר יהוה אל אהרן בארצם לא תנחל וחלק לא יהיה לך בתוכם אני חלקך ונחלתך בתוך בני ישראל ס
במדבר 18 : 21 (ALEP)
כא ולבני לוי הנה נתתי כל מעשר בישראל לנחלה חלף עבדתם אשר הם עבדים את עבדת אהל מועד
במדבר 18 : 22 (ALEP)
כב ולא יקרבו עוד בני ישראל אל אהל מועד לשאת חטא למות
במדבר 18 : 23 (ALEP)
כג ועבד הלוי הוא את עבדת אהל מועד והם ישאו עונם חקת עולם לדרתיכם ובתוך בני ישראל לא ינחלו נחלה
במדבר 18 : 24 (ALEP)
כד כי את מעשר בני ישראל אשר ירימו ליהוה תרומה נתתי ללוים לנחלה על כן אמרתי להם בתוך בני ישראל לא ינחלו נחלה פ
במדבר 18 : 25 (ALEP)
כה וידבר יהוה אל משה לאמר
במדבר 18 : 26 (ALEP)
כו ואל הלוים תדבר ואמרת אלהם כי תקחו מאת בני ישראל את המעשר אשר נתתי לכם מאתם בנחלתכם--והרמתם ממנו תרומת יהוה מעשר מן המעשר
במדבר 18 : 27 (ALEP)
כז ונחשב לכם תרומתכם--כדגן מן הגרן וכמלאה מן היקב
במדבר 18 : 28 (ALEP)
כח כן תרימו גם אתם תרומת יהוה מכל מעשרתיכם אשר תקחו מאת בני ישראל ונתתם ממנו את תרומת יהוה לאהרן הכהן
במדבר 18 : 29 (ALEP)
כט מכל מתנתיכם תרימו את כל תרומת יהוה מכל חלבו--את מקדשו ממנו
במדבר 18 : 30 (ALEP)
ל ואמרת אלהם בהרימכם את חלבו ממנו ונחשב ללוים כתבואת גרן וכתבואת יקב
במדבר 18 : 31 (ALEP)
לא ואכלתם אתו בכל מקום אתם וביתכם כי שכר הוא לכם חלף עבדתכם באהל מועד
במדבר 18 : 32 (ALEP)
לב ולא תשאו עליו חטא בהרימכם את חלבו ממנו ואת קדשי בני ישראל לא תחללו ולא תמותו פ
❮
❯