במדבר 16 : 1 (ALEP)
א ויקח קרח בן יצהר בן קהת בן לוי ודתן ואבירם בני אליאב ואון בן פלת--בני ראובן
במדבר 16 : 2 (ALEP)
ב ויקמו לפני משה ואנשים מבני ישראל חמשים ומאתים נשיאי עדה קראי מועד אנשי שם
במדבר 16 : 3 (ALEP)
ג ויקהלו על משה ועל אהרן ויאמרו אלהם רב לכם--כי כל העדה כלם קדשים ובתוכם יהוה ומדוע תתנשאו על קהל יהוה
במדבר 16 : 4 (ALEP)
ד וישמע משה ויפל על פניו
במדבר 16 : 5 (ALEP)
ה וידבר אל קרח ואל כל עדתו לאמר בקר וידע יהוה את אשר לו ואת הקדוש והקריב אליו ואת אשר יבחר בו יקריב אליו
במדבר 16 : 6 (ALEP)
ו זאת עשו קחו לכם מחתות קרח וכל עדתו
במדבר 16 : 7 (ALEP)
ז ותנו בהן אש ושימו עליהן קטרת לפני יהוה מחר והיה האיש אשר יבחר יהוה הוא הקדוש רב לכם בני לוי
במדבר 16 : 8 (ALEP)
ח ויאמר משה אל קרח שמעו נא בני לוי
במדבר 16 : 9 (ALEP)
ט המעט מכם כי הבדיל אלהי ישראל אתכם מעדת ישראל להקריב אתכם אליו--לעבד את עבדת משכן יהוה ולעמד לפני העדה לשרתם
במדבר 16 : 10 (ALEP)
י ויקרב אתך ואת כל אחיך בני לוי אתך ובקשתם גם כהנה
במדבר 16 : 11 (ALEP)
יא לכן אתה וכל עדתך--הנעדים על יהוה ואהרן מה הוא כי תלונו (תלינו) עליו
במדבר 16 : 12 (ALEP)
יב וישלח משה לקרא לדתן ולאבירם בני אליאב ויאמרו לא נעלה
במדבר 16 : 13 (ALEP)
יג המעט כי העליתנו מארץ זבת חלב ודבש להמיתנו במדבר כי תשתרר עלינו גם השתרר
במדבר 16 : 14 (ALEP)
יד אף לא אל ארץ זבת חלב ודבש הביאתנו ותתן לנו נחלת שדה וכרם העיני האנשים ההם תנקר--לא נעלה
במדבר 16 : 15 (ALEP)
טו ויחר למשה מאד ויאמר אל יהוה אל תפן אל מנחתם לא חמור אחד מהם נשאתי ולא הרעתי את אחד מהם
במדבר 16 : 16 (ALEP)
טז ויאמר משה אל קרח אתה וכל עדתך היו לפני יהוה אתה והם ואהרן מחר
במדבר 16 : 17 (ALEP)
יז וקחו איש מחתתו ונתתם עליהם קטרת והקרבתם לפני יהוה איש מחתתו חמשים ומאתים מחתת ואתה ואהרן איש מחתתו
במדבר 16 : 18 (ALEP)
יח ויקחו איש מחתתו ויתנו עליהם אש וישימו עליהם קטרת ויעמדו פתח אהל מועד--ומשה ואהרן
במדבר 16 : 19 (ALEP)
יט ויקהל עליהם קרח את כל העדה אל פתח אהל מועד וירא כבוד יהוה אל כל העדה ס
במדבר 16 : 20 (ALEP)
כ וידבר יהוה אל משה ואל אהרן לאמר
במדבר 16 : 21 (ALEP)
כא הבדלו מתוך העדה הזאת ואכלה אתם כרגע
במדבר 16 : 22 (ALEP)
כב ויפלו על פניהם ויאמרו אל אלהי הרוחת לכל בשר האיש אחד יחטא ועל כל העדה תקצף ס
במדבר 16 : 23 (ALEP)
כג וידבר יהוה אל משה לאמר
במדבר 16 : 24 (ALEP)
כד דבר אל העדה לאמר העלו מסביב למשכן קרח דתן ואבירם
במדבר 16 : 25 (ALEP)
כה ויקם משה וילך אל דתן ואבירם וילכו אחריו זקני ישראל
במדבר 16 : 26 (ALEP)
כו וידבר אל העדה לאמר סורו נא מעל אהלי האנשים הרשעים האלה ואל תגעו בכל אשר להם פן תספו בכל חטאתם
במדבר 16 : 27 (ALEP)
כז ויעלו מעל משכן קרח דתן ואבירם--מסביב ודתן ואבירם יצאו נצבים פתח אהליהם ונשיהם ובניהם וטפם
במדבר 16 : 28 (ALEP)
כח ויאמר משה בזאת תדעון כי יהוה שלחני לעשות את כל המעשים האלה כי לא מלבי
במדבר 16 : 29 (ALEP)
כט אם כמות כל האדם ימתון אלה ופקדת כל האדם יפקד עליהם--לא יהוה שלחני
במדבר 16 : 30 (ALEP)
ל ואם בריאה יברא יהוה ופצתה האדמה את פיה ובלעה אתם ואת כל אשר להם וירדו חיים שאלה--וידעתם כי נאצו האנשים האלה את יהוה
במדבר 16 : 31 (ALEP)
לא ויהי ככלתו לדבר את כל הדברים האלה ותבקע האדמה אשר תחתיהם
במדבר 16 : 32 (ALEP)
לב ותפתח הארץ את פיה ותבלע אתם ואת בתיהם ואת כל האדם אשר לקרח ואת כל הרכוש
במדבר 16 : 33 (ALEP)
לג וירדו הם וכל אשר להם חיים--שאלה ותכס עליהם הארץ ויאבדו מתוך הקהל
במדבר 16 : 34 (ALEP)
לד וכל ישראל אשר סביבתיהם--נסו לקלם כי אמרו פן תבלענו הארץ
במדבר 16 : 35 (ALEP)
לה ואש יצאה מאת יהוה ותאכל את החמשים ומאתים איש מקריבי הקטרת ס
❮
❯