במדבר 15 : 1 (ALEP)
א וידבר יהוה אל משה לאמר
במדבר 15 : 2 (ALEP)
ב דבר אל בני ישראל ואמרת אלהם כי תבאו אל ארץ מושבתיכם אשר אני נתן לכם
במדבר 15 : 3 (ALEP)
ג ועשיתם אשה ליהוה עלה או זבח לפלא נדר או בנדבה או במעדיכם--לעשות ריח ניחח ליהוה מן הבקר או מן הצאן
במדבר 15 : 4 (ALEP)
ד והקריב המקריב קרבנו ליהוה--מנחה סלת עשרון בלול ברבעית ההין שמן
במדבר 15 : 5 (ALEP)
ה ויין לנסך רביעית ההין תעשה על העלה או לזבח--לכבש האחד
במדבר 15 : 6 (ALEP)
ו או לאיל תעשה מנחה סלת שני עשרנים בלולה בשמן שלשית ההין
במדבר 15 : 7 (ALEP)
ז ויין לנסך שלשית ההין--תקריב ריח ניחח ליהוה
במדבר 15 : 8 (ALEP)
ח וכי תעשה בן בקר עלה או זבח לפלא נדר או שלמים ליהוה
במדבר 15 : 9 (ALEP)
ט והקריב על בן הבקר מנחה סלת שלשה עשרנים בלול בשמן חצי ההין
במדבר 15 : 10 (ALEP)
י ויין תקריב לנסך חצי ההין--אשה ריח ניחח ליהוה
במדבר 15 : 11 (ALEP)
יא ככה יעשה לשור האחד או לאיל האחד או לשה בכבשים או בעזים
במדבר 15 : 12 (ALEP)
יב כמספר אשר תעשו--ככה תעשו לאחד כמספרם
במדבר 15 : 13 (ALEP)
יג כל האזרח יעשה ככה את אלה להקריב אשה ריח ניחח ליהוה
במדבר 15 : 14 (ALEP)
יד וכי יגור אתכם גר או אשר בתוככם לדרתיכם ועשה אשה ריח ניחח ליהוה--כאשר תעשו כן יעשה
במדבר 15 : 15 (ALEP)
טו הקהל חקה אחת לכם ולגר הגר חקת עולם לדרתיכם ככם כגר יהיה לפני יהוה
במדבר 15 : 16 (ALEP)
טז תורה אחת ומשפט אחד יהיה לכם ולגר הגר אתכם פ
במדבר 15 : 17 (ALEP)
יז וידבר יהוה אל משה לאמר
במדבר 15 : 18 (ALEP)
יח דבר אל בני ישראל ואמרת אלהם בבאכם אל הארץ אשר אני מביא אתכם שמה
במדבר 15 : 19 (ALEP)
יט והיה באכלכם מלחם הארץ--תרימו תרומה ליהוה
במדבר 15 : 20 (ALEP)
כ ראשית ערסתכם--חלה תרימו תרומה כתרומת גרן כן תרימו אתה
במדבר 15 : 21 (ALEP)
כא מראשית ערסתיכם תתנו ליהוה תרומה--לדרתיכם ס
במדבר 15 : 22 (ALEP)
כב וכי תשגו--ולא תעשו את כל המצות האלה אשר דבר יהוה אל משה
במדבר 15 : 23 (ALEP)
כג את כל אשר צוה יהוה אליכם ביד משה מן היום אשר צוה יהוה והלאה--לדרתיכם
במדבר 15 : 24 (ALEP)
כד והיה אם מעיני העדה נעשתה לשגגה ועשו כל העדה פר בן בקר אחד לעלה לריח ניחח ליהוה ומנחתו ונסכו כמשפט ושעיר עזים אחד לחטת
במדבר 15 : 25 (ALEP)
כה וכפר הכהן על כל עדת בני ישראל--ונסלח להם כי שגגה הוא--והם הביאו את קרבנם אשה ליהוה וחטאתם לפני יהוה על שגגתם
במדבר 15 : 26 (ALEP)
כו ונסלח לכל עדת בני ישראל ולגר הגר בתוכם כי לכל העם בשגגה ס
במדבר 15 : 27 (ALEP)
כז ואם נפש אחת תחטא בשגגה--והקריבה עז בת שנתה לחטאת
במדבר 15 : 28 (ALEP)
כח וכפר הכהן על הנפש השגגת בחטאה בשגגה--לפני יהוה לכפר עליו ונסלח לו
במדבר 15 : 29 (ALEP)
כט האזרח בבני ישראל ולגר הגר בתוכם--תורה אחת יהיה לכם לעשה בשגגה
במדבר 15 : 30 (ALEP)
ל והנפש אשר תעשה ביד רמה מן האזרח ומן הגר--את יהוה הוא מגדף ונכרתה הנפש ההוא מקרב עמה
במדבר 15 : 31 (ALEP)
לא כי דבר יהוה בזה ואת מצותו הפר הכרת תכרת הנפש ההוא עונה בה פ
במדבר 15 : 32 (ALEP)
לב ויהיו בני ישראל במדבר וימצאו איש מקשש עצים--ביום השבת
במדבר 15 : 33 (ALEP)
לג ויקריבו אתו המצאים אתו מקשש עצים--אל משה ואל אהרן ואל כל העדה
במדבר 15 : 34 (ALEP)
לד ויניחו אתו במשמר כי לא פרש מה יעשה לו ס
במדבר 15 : 35 (ALEP)
לה ויאמר יהוה אל משה מות יומת האיש רגום אתו באבנים כל העדה מחוץ למחנה
במדבר 15 : 36 (ALEP)
לו ויציאו אתו כל העדה אל מחוץ למחנה וירגמו אתו באבנים וימת כאשר צוה יהוה את משה פ
במדבר 15 : 37 (ALEP)
לז ויאמר יהוה אל משה לאמר
במדבר 15 : 38 (ALEP)
לח דבר אל בני ישראל ואמרת אלהם ועשו להם ציצת על כנפי בגדיהם לדרתם ונתנו על ציצת הכנף פתיל תכלת
במדבר 15 : 39 (ALEP)
לט והיה לכם לציצת וראיתם אתו וזכרתם את כל מצות יהוה ועשיתם אתם ולא תתורו אחרי לבבכם ואחרי עיניכם אשר אתם זנים אחריהם
במדבר 15 : 40 (ALEP)
מ למען תזכרו ועשיתם את כל מצותי והייתם קדשים לאלהיכם
במדבר 15 : 41 (ALEP)
מא אני יהוה אלהיכם אשר הוצאתי אתכם מארץ מצרים להיות לכם לאלהים אני יהוה אלהיכם פ
❮
❯