נחמיה 6 : 1 (ALEP)
א ויהי כאשר נשמע לסנבלט וטוביה ולגשם הערבי וליתר איבינו כי בניתי את החומה ולא נותר בה פרץ--גם עד העת ההיא דלתות לא העמדתי בשערים
נחמיה 6 : 2 (ALEP)
ב וישלח סנבלט וגשם אלי לאמר לכה ונועדה יחדו בכפירים בבקעת אונו והמה חשבים לעשות לי רעה
נחמיה 6 : 3 (ALEP)
ג ואשלחה עליהם מלאכים לאמר--מלאכה גדולה אני עשה ולא אוכל לרדת למה תשבת המלאכה כאשר ארפה וירדתי אליכם
נחמיה 6 : 4 (ALEP)
ד וישלחו אלי כדבר הזה ארבע פעמים ואשיב אותם כדבר הזה ס
נחמיה 6 : 5 (ALEP)
ה וישלח אלי סנבלט כדבר הזה פעם חמישית--את נערו ואגרת פתוחה בידו
נחמיה 6 : 6 (ALEP)
ו כתוב בה בגוים נשמע וגשמו אמר אתה והיהודים חשבים למרוד על כן אתה בונה החומה ואתה הוה להם למלך--כדברים האלה
נחמיה 6 : 7 (ALEP)
ז וגם נביאים העמדת לקרא עליך בירושלם לאמר מלך ביהודה ועתה ישמע למלך כדברים האלה ועתה לכה ונועצה יחדו ס
נחמיה 6 : 8 (ALEP)
ח ואשלחה אליו לאמר--לא נהיה כדברים האלה אשר אתה אומר כי מלבך אתה בודאם
נחמיה 6 : 9 (ALEP)
ט כי כלם מיראים אותנו לאמר ירפו ידיהם מן המלאכה ולא תעשה ועתה חזק את ידי
נחמיה 6 : 10 (ALEP)
י ואני באתי בית שמעיה בן דליה בן מהיטבאל--והוא עצור ויאמר נועד אל בית האלהים אל תוך ההיכל ונסגרה דלתות ההיכל--כי באים להרגך ולילה באים להרגך
נחמיה 6 : 11 (ALEP)
יא ואמרה האיש כמוני יברח ומי כמוני אשר יבא אל ההיכל וחי לא אבוא
נחמיה 6 : 12 (ALEP)
יב ואכירה והנה לא אלהים שלחו כי הנבואה דבר עלי וטוביה וסנבלט שכרו
נחמיה 6 : 13 (ALEP)
יג למען שכור הוא למען אירא ואעשה כן וחטאתי והיה להם לשם רע למען יחרפוני פ
נחמיה 6 : 14 (ALEP)
יד זכרה אלהי לטוביה ולסנבלט כמעשיו אלה וגם לנועדיה הנביאה וליתר הנביאים אשר היו מיראים אותי
נחמיה 6 : 15 (ALEP)
טו ותשלם החומה בעשרים וחמשה לאלול--לחמשים ושנים יום פ
נחמיה 6 : 16 (ALEP)
טז ויהי כאשר שמעו כל אויבינו ויראו כל הגוים אשר סביבתינו ויפלו מאד בעיניהם וידעו--כי מאת אלהינו נעשתה המלאכה הזאת
נחמיה 6 : 17 (ALEP)
יז גם בימים ההם מרבים חרי יהודה אגרתיהם הולכות על טוביה ואשר לטוביה באות אליהם
נחמיה 6 : 18 (ALEP)
יח כי רבים ביהודה בעלי שבועה לו--כי חתן הוא לשכניה בן ארח ויהוחנן בנו--לקח את בת משלם בן ברכיה
נחמיה 6 : 19 (ALEP)
יט גם טובתיו היו אמרים לפני ודברי היו מוציאים לו אגרות שלח טוביה ליראני
❮
❯
1
2
3
4
5
6
7
8
9
10
11
12
13
14
15
16
17
18
19