מלאכי 1 : 1 (ALEP)
א משא דבר יהוה אל ישראל ביד מלאכי
מלאכי 1 : 2 (ALEP)
ב אהבתי אתכם אמר יהוה ואמרתם במה אהבתנו הלוא אח עשו ליעקב נאם יהוה ואהב את יעקב
מלאכי 1 : 3 (ALEP)
ג ואת עשו שנאתי ואשים את הריו שממה ואת נחלתו לתנות מדבר
מלאכי 1 : 4 (ALEP)
ד כי תאמר אדום רששנו ונשוב ונבנה חרבות--כה אמר יהוה צבאות המה יבנו ואני אהרוס וקראו להם גבול רשעה והעם אשר זעם יהוה עד עולם
מלאכי 1 : 5 (ALEP)
ה ועיניכם תראינה ואתם תאמרו יגדל יהוה מעל לגבול ישראל
מלאכי 1 : 6 (ALEP)
ו בן יכבד אב ועבד אדניו ואם אב אני איה כבודי ואם אדונים אני איה מוראי אמר יהוה צבאות לכם הכהנים בוזי שמי ואמרתם במה בזינו את שמך
מלאכי 1 : 7 (ALEP)
ז מגישים על מזבחי לחם מגאל ואמרתם במה גאלנוך באמרכם שלחן יהוה נבזה הוא
מלאכי 1 : 8 (ALEP)
ח וכי תגישון עור לזבח אין רע וכי תגישו פסח וחלה אין רע הקריבהו נא לפחתך הירצך או הישא פניך--אמר יהוה צבאות
מלאכי 1 : 9 (ALEP)
ט ועתה חלו נא פני אל ויחננו מידכם היתה זאת--הישא מכם פנים אמר יהוה צבאות
מלאכי 1 : 10 (ALEP)
י מי גם בכם ויסגר דלתים ולא תאירו מזבחי חנם אין לי חפץ בכם אמר יהוה צבאות ומנחה לא ארצה מידכם
מלאכי 1 : 11 (ALEP)
יא כי ממזרח שמש ועד מבואו גדול שמי בגוים ובכל מקום מקטר מגש לשמי ומנחה טהורה כי גדול שמי בגוים אמר יהוה צבאות
מלאכי 1 : 12 (ALEP)
יב ואתם מחללים אותו--באמרכם שלחן אדני מגאל הוא וניבו נבזה אכלו
מלאכי 1 : 13 (ALEP)
יג ואמרתם הנה מתלאה והפחתם אותו אמר יהוה צבאות והבאתם גזול ואת הפסח ואת החולה והבאתם את המנחה הארצה אותה מידכם אמר יהוה ס
מלאכי 1 : 14 (ALEP)
יד וארור נוכל ויש בעדרו זכר ונדר וזבח משחת לאדני כי מלך גדול אני אמר יהוה צבאות ושמי נורא בגוים
❮
❯
1
2
3
4
5
6
7
8
9
10
11
12
13
14