ויקרא 9 : 1 (ALEP)
א ויהי ביום השמיני קרא משה לאהרן ולבניו--ולזקני ישראל
ויקרא 9 : 2 (ALEP)
ב ויאמר אל אהרן קח לך עגל בן בקר לחטאת ואיל לעלה--תמימם והקרב לפני יהוה
ויקרא 9 : 3 (ALEP)
ג ואל בני ישראל תדבר לאמר קחו שעיר עזים לחטאת ועגל וכבש בני שנה תמימם לעלה
ויקרא 9 : 4 (ALEP)
ד ושור ואיל לשלמים לזבח לפני יהוה ומנחה בלולה בשמן כי היום יהוה נראה אליכם
ויקרא 9 : 5 (ALEP)
ה ויקחו את אשר צוה משה אל פני אהל מועד ויקרבו כל העדה ויעמדו לפני יהוה
ויקרא 9 : 6 (ALEP)
ו ויאמר משה זה הדבר אשר צוה יהוה תעשו--וירא אליכם כבוד יהוה
ויקרא 9 : 7 (ALEP)
ז ויאמר משה אל אהרן קרב אל המזבח ועשה את חטאתך ואת עלתך וכפר בעדך ובעד העם ועשה את קרבן העם וכפר בעדם כאשר צוה יהוה
ויקרא 9 : 8 (ALEP)
ח ויקרב אהרן אל המזבח וישחט את עגל החטאת אשר לו
ויקרא 9 : 9 (ALEP)
ט ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח
ויקרא 9 : 10 (ALEP)
י ואת החלב ואת הכלית ואת היתרת מן הכבד מן החטאת--הקטיר המזבחה כאשר צוה יהוה את משה
ויקרא 9 : 11 (ALEP)
יא ואת הבשר ואת העור שרף באש מחוץ למחנה
ויקרא 9 : 12 (ALEP)
יב וישחט את העלה וימצאו בני אהרן אליו את הדם ויזרקהו על המזבח סביב
ויקרא 9 : 13 (ALEP)
יג ואת העלה המציאו אליו לנתחיה--ואת הראש ויקטר על המזבח
ויקרא 9 : 14 (ALEP)
יד וירחץ את הקרב ואת הכרעים ויקטר על העלה המזבחה
ויקרא 9 : 15 (ALEP)
טו ויקרב את קרבן העם ויקח את שעיר החטאת אשר לעם וישחטהו ויחטאהו כראשון
ויקרא 9 : 16 (ALEP)
טז ויקרב את העלה ויעשה כמשפט
ויקרא 9 : 17 (ALEP)
יז ויקרב את המנחה וימלא כפו ממנה ויקטר על המזבח--מלבד עלת הבקר
ויקרא 9 : 18 (ALEP)
יח וישחט את השור ואת האיל זבח השלמים אשר לעם וימצאו בני אהרן את הדם אליו ויזרקהו על המזבח סביב
ויקרא 9 : 19 (ALEP)
יט ואת החלבים מן השור ומן האיל--האליה והמכסה והכלית ויתרת הכבד
ויקרא 9 : 20 (ALEP)
כ וישימו את החלבים על החזות ויקטר החלבים המזבחה
ויקרא 9 : 21 (ALEP)
כא ואת החזות ואת שוק הימין הניף אהרן תנופה לפני יהוה--כאשר צוה משה
ויקרא 9 : 22 (ALEP)
כב וישא אהרן את ידו אל העם ויברכם וירד מעשת החטאת והעלה--והשלמים
ויקרא 9 : 23 (ALEP)
כג ויבא משה ואהרן אל אהל מועד ויצאו ויברכו את העם וירא כבוד יהוה אל כל העם
ויקרא 9 : 24 (ALEP)
כד ותצא אש מלפני יהוה ותאכל על המזבח את העלה ואת החלבים וירא כל העם וירנו ויפלו על פניהם
❮
❯