ויקרא 8 : 1 (ALEP)
א וידבר יהוה אל משה לאמר
ויקרא 8 : 2 (ALEP)
ב קח את אהרן ואת בניו אתו ואת הבגדים ואת שמן המשחה ואת פר החטאת ואת שני האילים ואת סל המצות
ויקרא 8 : 3 (ALEP)
ג ואת כל העדה הקהל אל פתח אהל מועד
ויקרא 8 : 4 (ALEP)
ד ויעש משה כאשר צוה יהוה אתו ותקהל העדה אל פתח אהל מועד
ויקרא 8 : 5 (ALEP)
ה ויאמר משה אל העדה זה הדבר אשר צוה יהוה לעשות
ויקרא 8 : 6 (ALEP)
ו ויקרב משה את אהרן ואת בניו וירחץ אתם במים
ויקרא 8 : 7 (ALEP)
ז ויתן עליו את הכתנת ויחגר אתו באבנט וילבש אתו את המעיל ויתן עליו את האפד ויחגר אתו בחשב האפד ויאפד לו בו
ויקרא 8 : 8 (ALEP)
ח וישם עליו את החשן ויתן אל החשן את האורים ואת התמים
ויקרא 8 : 9 (ALEP)
ט וישם את המצנפת על ראשו וישם על המצנפת אל מול פניו את ציץ הזהב נזר הקדש כאשר צוה יהוה את משה
ויקרא 8 : 10 (ALEP)
י ויקח משה את שמן המשחה וימשח את המשכן ואת כל אשר בו ויקדש אתם
ויקרא 8 : 11 (ALEP)
יא ויז ממנו על המזבח שבע פעמים וימשח את המזבח ואת כל כליו ואת הכיר ואת כנו--לקדשם
ויקרא 8 : 12 (ALEP)
יב ויצק משמן המשחה על ראש אהרן וימשח אתו לקדשו
ויקרא 8 : 13 (ALEP)
יג ויקרב משה את בני אהרן וילבשם כתנת ויחגר אתם אבנט ויחבש להם מגבעות--כאשר צוה יהוה את משה
ויקרא 8 : 14 (ALEP)
יד ויגש את פר החטאת ויסמך אהרן ובניו את ידיהם על ראש פר החטאת
ויקרא 8 : 15 (ALEP)
טו וישחט ויקח משה את הדם ויתן על קרנות המזבח סביב באצבעו ויחטא את המזבח ואת הדם יצק אל יסוד המזבח ויקדשהו לכפר עליו
ויקרא 8 : 16 (ALEP)
טז ויקח את כל החלב אשר על הקרב ואת יתרת הכבד ואת שתי הכלית ואת חלבהן ויקטר משה המזבחה
ויקרא 8 : 17 (ALEP)
יז ואת הפר ואת ערו ואת בשרו ואת פרשו--שרף באש מחוץ למחנה כאשר צוה יהוה את משה
ויקרא 8 : 18 (ALEP)
יח ויקרב את איל העלה ויסמכו אהרן ובניו את ידיהם--על ראש האיל
ויקרא 8 : 19 (ALEP)
יט וישחט ויזרק משה את הדם על המזבח סביב
ויקרא 8 : 20 (ALEP)
כ ואת האיל--נתח לנתחיו ויקטר משה את הראש ואת הנתחים ואת הפדר
ויקרא 8 : 21 (ALEP)
כא ואת הקרב ואת הכרעים רחץ במים ויקטר משה את כל האיל המזבחה עלה הוא לריח ניחח אשה הוא ליהוה כאשר צוה יהוה את משה
ויקרא 8 : 22 (ALEP)
כב ויקרב את האיל השני איל המלאים ויסמכו אהרן ובניו את ידיהם--על ראש האיל
ויקרא 8 : 23 (ALEP)
כג וישחט--ויקח משה מדמו ויתן על תנוך אזן אהרן הימנית ועל בהן ידו הימנית ועל בהן רגלו הימנית
ויקרא 8 : 24 (ALEP)
כד ויקרב את בני אהרן ויתן משה מן הדם על תנוך אזנם הימנית ועל בהן ידם הימנית ועל בהן רגלם הימנית ויזרק משה את הדם על המזבח סביב
ויקרא 8 : 25 (ALEP)
כה ויקח את החלב ואת האליה ואת כל החלב אשר על הקרב ואת יתרת הכבד ואת שתי הכלית ואת חלבהן ואת שוק הימין
ויקרא 8 : 26 (ALEP)
כו ומסל המצות אשר לפני יהוה לקח חלת מצה אחת וחלת לחם שמן אחת--ורקיק אחד וישם על החלבים ועל שוק הימין
ויקרא 8 : 27 (ALEP)
כז ויתן את הכל--על כפי אהרן ועל כפי בניו וינף אתם תנופה לפני יהוה
ויקרא 8 : 28 (ALEP)
כח ויקח משה אתם מעל כפיהם ויקטר המזבחה על העלה מלאים הם לריח ניחח אשה הוא ליהוה
ויקרא 8 : 29 (ALEP)
כט ויקח משה את החזה ויניפהו תנופה לפני יהוה מאיל המלאים למשה היה למנה כאשר צוה יהוה את משה
ויקרא 8 : 30 (ALEP)
ל ויקח משה משמן המשחה ומן הדם אשר על המזבח ויז על אהרן על בגדיו ועל בניו ועל בגדי בניו אתו ויקדש את אהרן את בגדיו ואת בניו ואת בגדי בניו אתו
ויקרא 8 : 31 (ALEP)
לא ויאמר משה אל אהרן ואל בניו בשלו את הבשר פתח אהל מועד ושם תאכלו אתו ואת הלחם אשר בסל המלאים כאשר צויתי לאמר אהרן ובניו יאכלהו
ויקרא 8 : 32 (ALEP)
לב והנותר בבשר ובלחם--באש תשרפו
ויקרא 8 : 33 (ALEP)
לג ומפתח אהל מועד לא תצאו שבעת ימים--עד יום מלאת ימי מלאיכם כי שבעת ימים ימלא את ידכם
ויקרא 8 : 34 (ALEP)
לד כאשר עשה ביום הזה--צוה יהוה לעשת לכפר עליכם
ויקרא 8 : 35 (ALEP)
לה ופתח אהל מועד תשבו יומם ולילה שבעת ימים ושמרתם את משמרת יהוה ולא תמותו כי כן צויתי
ויקרא 8 : 36 (ALEP)
לו ויעש אהרן ובניו--את כל הדברים אשר צוה יהוה ביד משה ס
❮
❯