hebrew Bible Presentation Sharing - Leviticus Book, chapter 4, verse 21 in Alep Version

ויקרא 4 : 1 (ALEP)

א וידבר יהוה אל משה לאמר

ויקרא 4 : 2 (ALEP)

ב דבר אל בני ישראל לאמר--נפש כי תחטא בשגגה מכל מצות יהוה אשר לא תעשינה ועשה מאחת מהנה

ויקרא 4 : 3 (ALEP)

ג אם הכהן המשיח יחטא לאשמת העם והקריב על חטאתו אשר חטא פר בן בקר תמים ליהוה--לחטאת

ויקרא 4 : 4 (ALEP)

ד והביא את הפר אל פתח אהל מועד--לפני יהוה וסמך את ידו על ראש הפר ושחט את הפר לפני יהוה

ויקרא 4 : 5 (ALEP)

ה ולקח הכהן המשיח מדם הפר והביא אתו אל אהל מועד

ויקרא 4 : 6 (ALEP)

ו וטבל הכהן את אצבעו בדם והזה מן הדם שבע פעמים לפני יהוה את פני פרכת הקדש

ויקרא 4 : 7 (ALEP)

ז ונתן הכהן מן הדם על קרנות מזבח קטרת הסמים לפני יהוה אשר באהל מועד ואת כל דם הפר ישפך אל יסוד מזבח העלה אשר פתח אהל מועד

ויקרא 4 : 8 (ALEP)

ח ואת כל חלב פר החטאת ירים ממנו--את החלב המכסה על הקרב ואת כל החלב אשר על הקרב

ויקרא 4 : 9 (ALEP)

ט ואת שתי הכלית ואת החלב אשר עליהן אשר על הכסלים ואת היתרת על הכבד על הכליות יסירנה

ויקרא 4 : 10 (ALEP)

י כאשר יורם משור זבח השלמים והקטירם הכהן על מזבח העלה

ויקרא 4 : 11 (ALEP)

יא ואת עור הפר ואת כל בשרו על ראשו ועל כרעיו וקרבו ופרשו

ויקרא 4 : 12 (ALEP)

יב והוציא את כל הפר אל מחוץ למחנה אל מקום טהור אל שפך הדשן ושרף אתו על עצים באש על שפך הדשן ישרף {פ}

ויקרא 4 : 13 (ALEP)

יג ואם כל עדת ישראל ישגו ונעלם דבר מעיני הקהל ועשו אחת מכל מצות יהוה אשר לא תעשינה--ואשמו

ויקרא 4 : 14 (ALEP)

יד ונודעה החטאת אשר חטאו עליה--והקריבו הקהל פר בן בקר לחטאת והביאו אתו לפני אהל מועד

ויקרא 4 : 15 (ALEP)

טו וסמכו זקני העדה את ידיהם על ראש הפר--לפני יהוה ושחט את הפר לפני יהוה

ויקרא 4 : 16 (ALEP)

טז והביא הכהן המשיח מדם הפר אל אהל מועד

ויקרא 4 : 17 (ALEP)

יז וטבל הכהן אצבעו מן הדם והזה שבע פעמים לפני יהוה את פני הפרכת

ויקרא 4 : 18 (ALEP)

יח ומן הדם יתן על קרנת המזבח אשר לפני יהוה אשר באהל מועד ואת כל הדם ישפך אל יסוד מזבח העלה אשר פתח אהל מועד

ויקרא 4 : 19 (ALEP)

יט ואת כל חלבו ירים ממנו והקטיר המזבחה

ויקרא 4 : 20 (ALEP)

כ ועשה לפר--כאשר עשה לפר החטאת כן יעשה לו וכפר עלהם הכהן ונסלח להם

ויקרא 4 : 21 (ALEP)

כא והוציא את הפר אל מחוץ למחנה ושרף אתו כאשר שרף את הפר הראשון חטאת הקהל הוא {פ}

ויקרא 4 : 22 (ALEP)

כב אשר נשיא יחטא ועשה אחת מכל מצות יהוה אלהיו אשר לא תעשינה בשגגה--ואשם

ויקרא 4 : 23 (ALEP)

כג או הודע אליו חטאתו אשר חטא בה--והביא את קרבנו שעיר עזים זכר תמים

ויקרא 4 : 24 (ALEP)

כד וסמך ידו על ראש השעיר ושחט אתו במקום אשר ישחט את העלה לפני יהוה חטאת הוא

ויקרא 4 : 25 (ALEP)

כה ולקח הכהן מדם החטאת באצבעו ונתן על קרנת מזבח העלה ואת דמו ישפך אל יסוד מזבח העלה

ויקרא 4 : 26 (ALEP)

כו ואת כל חלבו יקטיר המזבחה כחלב זבח השלמים וכפר עליו הכהן מחטאתו ונסלח לו {פ}

ויקרא 4 : 27 (ALEP)

כז ואם נפש אחת תחטא בשגגה מעם הארץ בעשתה אחת ממצות יהוה אשר לא תעשינה--ואשם

ויקרא 4 : 28 (ALEP)

כח או הודע אליו חטאתו אשר חטא--והביא קרבנו שעירת עזים תמימה נקבה על חטאתו אשר חטא

ויקרא 4 : 29 (ALEP)

כט וסמך את ידו על ראש החטאת ושחט את החטאת במקום העלה

ויקרא 4 : 30 (ALEP)

ל ולקח הכהן מדמה באצבעו ונתן על קרנת מזבח העלה ואת כל דמה ישפך אל יסוד המזבח

ויקרא 4 : 31 (ALEP)

לא ואת כל חלבה יסיר כאשר הוסר חלב מעל זבח השלמים והקטיר הכהן המזבחה לריח ניחח ליהוה וכפר עליו הכהן ונסלח לו {פ}

ויקרא 4 : 32 (ALEP)

לב ואם כבש יביא קרבנו לחטאת--נקבה תמימה יביאנה

ויקרא 4 : 33 (ALEP)

לג וסמך את ידו על ראש החטאת ושחט אתה לחטאת במקום אשר ישחט את העלה

ויקרא 4 : 34 (ALEP)

לד ולקח הכהן מדם החטאת באצבעו ונתן על קרנת מזבח העלה ואת כל דמה ישפך אל יסוד המזבח

ויקרא 4 : 35 (ALEP)

לה ואת כל חלבה יסיר כאשר יוסר חלב הכשב מזבח השלמים והקטיר הכהן אתם המזבחה על אשי יהוה וכפר עליו הכהן על חטאתו אשר חטא ונסלח לו {פ}