Leviticus 26 : 1 (ALEP)
א לא תעשו לכם אלילם ופסל ומצבה לא תקימו לכם ואבן משכית לא תתנו בארצכם להשתחות עליה כי אני יהוה אלהיכם
Leviticus 26 : 2 (ALEP)
ב את שבתתי תשמרו ומקדשי תיראו אני יהוה {פ}
Leviticus 26 : 3 (ALEP)
ג אם בחקתי תלכו ואת מצותי תשמרו ועשיתם אתם
Leviticus 26 : 4 (ALEP)
ד ונתתי גשמיכם בעתם ונתנה הארץ יבולה ועץ השדה יתן פריו
Leviticus 26 : 5 (ALEP)
ה והשיג לכם דיש את בציר ובציר ישיג את זרע ואכלתם לחמכם לשבע וישבתם לבטח בארצכם
Leviticus 26 : 6 (ALEP)
ו ונתתי שלום בארץ ושכבתם ואין מחריד והשבתי חיה רעה מן הארץ וחרב לא תעבר בארצכם
Leviticus 26 : 7 (ALEP)
ז ורדפתם את איביכם ונפלו לפניכם לחרב
Leviticus 26 : 8 (ALEP)
ח ורדפו מכם חמשה מאה ומאה מכם רבבה ירדפו ונפלו איביכם לפניכם לחרב
Leviticus 26 : 9 (ALEP)
ט ופניתי אליכם--והפריתי אתכם והרביתי אתכם והקימתי את בריתי אתכם
Leviticus 26 : 10 (ALEP)
י ואכלתם ישן נושן וישן מפני חדש תוציאו
Leviticus 26 : 11 (ALEP)
יא ונתתי משכני בתוככם ולא תגעל נפשי אתכם
Leviticus 26 : 12 (ALEP)
יב והתהלכתי בתוככם והייתי לכם לאלהים ואתם תהיו לי לעם
Leviticus 26 : 13 (ALEP)
יג אני יהוה אלהיכם אשר הוצאתי אתכם מארץ מצרים מהית להם עבדים ואשבר מטת עלכם ואולך אתכם קוממיות {פ}
Leviticus 26 : 14 (ALEP)
יד ואם לא תשמעו לי ולא תעשו את כל המצות האלה
Leviticus 26 : 15 (ALEP)
טו ואם בחקתי תמאסו ואם את משפטי תגעל נפשכם לבלתי עשות את כל מצותי להפרכם את בריתי
Leviticus 26 : 16 (ALEP)
טז אף אני אעשה זאת לכם והפקדתי עליכם בהלה את השחפת ואת הקדחת מכלות עינים ומדיבת נפש וזרעתם לריק זרעכם ואכלהו איביכם
Leviticus 26 : 17 (ALEP)
יז ונתתי פני בכם ונגפתם לפני איביכם ורדו בכם שנאיכם ונסתם ואין רדף אתכם
Leviticus 26 : 18 (ALEP)
יח ואם עד אלה--לא תשמעו לי ויספתי ליסרה אתכם שבע על חטאתיכם
Leviticus 26 : 19 (ALEP)
יט ושברתי את גאון עזכם ונתתי את שמיכם כברזל ואת ארצכם כנחשה
Leviticus 26 : 20 (ALEP)
כ ותם לריק כחכם ולא תתן ארצכם את יבולה ועץ הארץ לא יתן פריו
Leviticus 26 : 21 (ALEP)
כא ואם תלכו עמי קרי ולא תאבו לשמע לי--ויספתי עליכם מכה שבע כחטאתיכם
Leviticus 26 : 22 (ALEP)
כב והשלחתי בכם את חית השדה ושכלה אתכם והכריתה את בהמתכם והמעיטה אתכם ונשמו דרכיכם
Leviticus 26 : 23 (ALEP)
כג ואם באלה--לא תוסרו לי והלכתם עמי קרי
Leviticus 26 : 24 (ALEP)
כד והלכתי אף אני עמכם בקרי והכיתי אתכם גם אני שבע על חטאתיכם
Leviticus 26 : 25 (ALEP)
כה והבאתי עליכם חרב נקמת נקם ברית ונאספתם אל עריכם ושלחתי דבר בתוככם ונתתם ביד אויב
Leviticus 26 : 26 (ALEP)
כו בשברי לכם מטה לחם ואפו עשר נשים לחמכם בתנור אחד והשיבו לחמכם במשקל ואכלתם ולא תשבעו {ס}
Leviticus 26 : 27 (ALEP)
כז ואם בזאת--לא תשמעו לי והלכתם עמי בקרי
Leviticus 26 : 28 (ALEP)
כח והלכתי עמכם בחמת קרי ויסרתי אתכם אף אני שבע על חטאתיכם
Leviticus 26 : 29 (ALEP)
כט ואכלתם בשר בניכם ובשר בנתיכם תאכלו
Leviticus 26 : 30 (ALEP)
ל והשמדתי את במתיכם והכרתי את חמניכם ונתתי את פגריכם על פגרי גלוליכם וגעלה נפשי אתכם
Leviticus 26 : 31 (ALEP)
לא ונתתי את עריכם חרבה והשמותי את מקדשיכם ולא אריח בריח ניחחכם
Leviticus 26 : 32 (ALEP)
לב והשמתי אני את הארץ ושממו עליה איביכם הישבים בה
Leviticus 26 : 33 (ALEP)
לג ואתכם אזרה בגוים והריקתי אחריכם חרב והיתה ארצכם שממה ועריכם יהיו חרבה
Leviticus 26 : 34 (ALEP)
לד אז תרצה הארץ את שבתתיה כל ימי השמה ואתם בארץ איביכם אז תשבת הארץ והרצת את שבתתיה
Leviticus 26 : 35 (ALEP)
לה כל ימי השמה תשבת את אשר לא שבתה בשבתתיכם בשבתכם עליה
Leviticus 26 : 36 (ALEP)
לו והנשארים בכם--והבאתי מרך בלבבם בארצת איביהם ורדף אתם קול עלה נדף ונסו מנסת חרב ונפלו ואין רדף
Leviticus 26 : 37 (ALEP)
לז וכשלו איש באחיו כמפני חרב ורדף אין ולא תהיה לכם תקומה לפני איביכם
Leviticus 26 : 38 (ALEP)
לח ואבדתם בגוים ואכלה אתכם ארץ איביכם
Leviticus 26 : 39 (ALEP)
לט והנשארים בכם ימקו בעונם בארצת איביכם ואף בעונת אבתם אתם ימקו
Leviticus 26 : 40 (ALEP)
מ והתודו את עונם ואת עון אבתם במעלם אשר מעלו בי ואף אשר הלכו עמי בקרי
Leviticus 26 : 41 (ALEP)
מא אף אני אלך עמם בקרי והבאתי אתם בארץ איביהם או אז יכנע לבבם הערל ואז ירצו את עונם
Leviticus 26 : 42 (ALEP)
מב וזכרתי את בריתי יעקוב ואף את בריתי יצחק ואף את בריתי אברהם אזכר--והארץ אזכר
Leviticus 26 : 43 (ALEP)
מג והארץ תעזב מהם ותרץ את שבתתיה בהשמה מהם והם ירצו את עונם יען וביען--במשפטי מאסו ואת חקתי געלה נפשם
Leviticus 26 : 44 (ALEP)
מד ואף גם זאת בהיותם בארץ איביהם לא מאסתים ולא געלתים לכלתם--להפר בריתי אתם כי אני יהוה אלהיהם
Leviticus 26 : 45 (ALEP)
מה וזכרתי להם ברית ראשנים אשר הוצאתי אתם מארץ מצרים לעיני הגוים להיות להם לאלהים--אני יהוה
Leviticus 26 : 46 (ALEP)
מו אלה החקים והמשפטים והתורת אשר נתן יהוה בינו ובין בני ישראל--בהר סיני ביד משה {פ}
❮
❯