Leviticus 22 : 1 (ALEP)
א וידבר יהוה אל משה לאמר
Leviticus 22 : 2 (ALEP)
ב דבר אל אהרן ואל בניו וינזרו מקדשי בני ישראל ולא יחללו את שם קדשי--אשר הם מקדשים לי אני יהוה
Leviticus 22 : 3 (ALEP)
ג אמר אלהם לדרתיכם כל איש אשר יקרב מכל זרעכם אל הקדשים אשר יקדישו בני ישראל ליהוה וטמאתו עליו ונכרתה הנפש ההוא מלפני--אני יהוה
Leviticus 22 : 4 (ALEP)
ד איש איש מזרע אהרן והוא צרוע או זב--בקדשים לא יאכל עד אשר יטהר והנגע בכל טמא נפש או איש אשר תצא ממנו שכבת זרע
Leviticus 22 : 5 (ALEP)
ה או איש אשר יגע בכל שרץ אשר יטמא לו או באדם אשר יטמא לו לכל טמאתו
Leviticus 22 : 6 (ALEP)
ו נפש אשר תגע בו וטמאה עד הערב ולא יאכל מן הקדשים כי אם רחץ בשרו במים
Leviticus 22 : 7 (ALEP)
ז ובא השמש וטהר ואחר יאכל מן הקדשים כי לחמו הוא
Leviticus 22 : 8 (ALEP)
ח נבלה וטרפה לא יאכל לטמאה בה אני יהוה
Leviticus 22 : 9 (ALEP)
ט ושמרו את משמרתי ולא ישאו עליו חטא ומתו בו כי יחללהו אני יהוה מקדשם
Leviticus 22 : 10 (ALEP)
י וכל זר לא יאכל קדש תושב כהן ושכיר לא יאכל קדש
Leviticus 22 : 11 (ALEP)
יא וכהן כי יקנה נפש קנין כספו--הוא יאכל בו ויליד ביתו הם יאכלו בלחמו
Leviticus 22 : 12 (ALEP)
יב ובת כהן--כי תהיה לאיש זר הוא בתרומת הקדשים לא תאכל
Leviticus 22 : 13 (ALEP)
יג ובת כהן כי תהיה אלמנה וגרושה וזרע אין לה--ושבה אל בית אביה כנעוריה מלחם אביה תאכל וכל זר לא יאכל בו
Leviticus 22 : 14 (ALEP)
יד ואיש כי יאכל קדש בשגגה--ויסף חמשיתו עליו ונתן לכהן את הקדש
Leviticus 22 : 15 (ALEP)
טו ולא יחללו את קדשי בני ישראל--את אשר ירימו ליהוה
Leviticus 22 : 16 (ALEP)
טז והשיאו אותם עון אשמה באכלם את קדשיהם כי אני יהוה מקדשם {פ}
Leviticus 22 : 17 (ALEP)
יז וידבר יהוה אל משה לאמר
Leviticus 22 : 18 (ALEP)
יח דבר אל אהרן ואל בניו ואל כל בני ישראל ואמרת אלהם איש איש מבית ישראל ומן הגר בישראל אשר יקריב קרבנו לכל נדריהם ולכל נדבותם אשר יקריבו ליהוה לעלה
Leviticus 22 : 19 (ALEP)
יט לרצנכם תמים זכר--בבקר בכשבים ובעזים
Leviticus 22 : 20 (ALEP)
כ כל אשר בו מום לא תקריבו כי לא לרצון יהיה לכם
Leviticus 22 : 21 (ALEP)
כא ואיש כי יקריב זבח שלמים ליהוה לפלא נדר או לנדבה בבקר או בצאן--תמים יהיה לרצון כל מום לא יהיה בו
Leviticus 22 : 22 (ALEP)
כב עורת או שבור או חרוץ או יבלת או גרב או ילפת--לא תקריבו אלה ליהוה ואשה לא תתנו מהם על המזבח--ליהוה
Leviticus 22 : 23 (ALEP)
כג ושור ושה שרוע וקלוט--נדבה תעשה אתו ולנדר לא ירצה
Leviticus 22 : 24 (ALEP)
כד ומעוך וכתות ונתוק וכרות לא תקריבו ליהוה ובארצכם לא תעשו
Leviticus 22 : 25 (ALEP)
כה ומיד בן נכר לא תקריבו את לחם אלהיכם--מכל אלה כי משחתם בהם מום בם לא ירצו לכם {ס}
Leviticus 22 : 26 (ALEP)
כו וידבר יהוה אל משה לאמר
Leviticus 22 : 27 (ALEP)
כז שור או כשב או עז כי יולד והיה שבעת ימים תחת אמו ומיום השמיני והלאה ירצה לקרבן אשה ליהוה
Leviticus 22 : 28 (ALEP)
כח ושור או שה--אתו ואת בנו לא תשחטו ביום אחד
Leviticus 22 : 29 (ALEP)
כט וכי תזבחו זבח תודה ליהוה--לרצנכם תזבחו
Leviticus 22 : 30 (ALEP)
ל ביום ההוא יאכל לא תותירו ממנו עד בקר אני יהוה
Leviticus 22 : 31 (ALEP)
לא ושמרתם מצותי ועשיתם אתם אני יהוה
Leviticus 22 : 32 (ALEP)
לב ולא תחללו את שם קדשי ונקדשתי בתוך בני ישראל אני יהוה מקדשכם
Leviticus 22 : 33 (ALEP)
לג המוציא אתכם מארץ מצרים להיות לכם לאלהים אני יהוה {פ}
❮
❯