ויקרא 20 : 1 (ALEP)
א וידבר יהוה אל משה לאמר
ויקרא 20 : 2 (ALEP)
ב ואל בני ישראל תאמר איש איש מבני ישראל ומן הגר הגר בישראל אשר יתן מזרעו למלך מות יומת עם הארץ ירגמהו באבן
ויקרא 20 : 3 (ALEP)
ג ואני אתן את פני באיש ההוא והכרתי אתו מקרב עמו כי מזרעו נתן למלך--למען טמא את מקדשי ולחלל את שם קדשי
ויקרא 20 : 4 (ALEP)
ד ואם העלם יעלימו עם הארץ את עיניהם מן האיש ההוא בתתו מזרעו למלך--לבלתי המית אתו
ויקרא 20 : 5 (ALEP)
ה ושמתי אני את פני באיש ההוא ובמשפחתו והכרתי אתו ואת כל הזנים אחריו לזנות אחרי המלך--מקרב עמם
ויקרא 20 : 6 (ALEP)
ו והנפש אשר תפנה אל האבת ואל הידענים לזנת אחריהם--ונתתי את פני בנפש ההוא והכרתי אתו מקרב עמו
ויקרא 20 : 7 (ALEP)
ז והתקדשתם--והייתם קדשים כי אני יהוה אלהיכם
ויקרא 20 : 8 (ALEP)
ח ושמרתם את חקתי ועשיתם אתם אני יהוה מקדשכם
ויקרא 20 : 9 (ALEP)
ט כי איש איש אשר יקלל את אביו ואת אמו--מות יומת אביו ואמו קלל דמיו בו
ויקרא 20 : 10 (ALEP)
י ואיש אשר ינאף את אשת איש אשר ינאף את אשת רעהו--מות יומת הנאף והנאפת
ויקרא 20 : 11 (ALEP)
יא ואיש אשר ישכב את אשת אביו--ערות אביו גלה מות יומתו שניהם דמיהם בם
ויקרא 20 : 12 (ALEP)
יב ואיש אשר ישכב את כלתו--מות יומתו שניהם תבל עשו דמיהם בם
ויקרא 20 : 13 (ALEP)
יג ואיש אשר ישכב את זכר משכבי אשה--תועבה עשו שניהם מות יומתו דמיהם בם
ויקרא 20 : 14 (ALEP)
יד ואיש אשר יקח את אשה ואת אמה--זמה הוא באש ישרפו אתו ואתהן ולא תהיה זמה בתוככם
ויקרא 20 : 15 (ALEP)
טו ואיש אשר יתן שכבתו בבהמה--מות יומת ואת הבהמה תהרגו
ויקרא 20 : 16 (ALEP)
טז ואשה אשר תקרב אל כל בהמה לרבעה אתה--והרגת את האשה ואת הבהמה מות יומתו דמיהם בם
ויקרא 20 : 17 (ALEP)
יז ואיש אשר יקח את אחתו בת אביו או בת אמו וראה את ערותה והיא תראה את ערותו חסד הוא--ונכרתו לעיני בני עמם ערות אחתו גלה עונו ישא
ויקרא 20 : 18 (ALEP)
יח ואיש אשר ישכב את אשה דוה וגלה את ערותה את מקרה הערה והוא גלתה את מקור דמיה--ונכרתו שניהם מקרב עמם
ויקרא 20 : 19 (ALEP)
יט וערות אחות אמך ואחות אביך לא תגלה כי את שארו הערה עונם ישאו
ויקרא 20 : 20 (ALEP)
כ ואיש אשר ישכב את דדתו--ערות דדו גלה חטאם ישאו ערירים ימתו
ויקרא 20 : 21 (ALEP)
כא ואיש אשר יקח את אשת אחיו--נדה הוא ערות אחיו גלה ערירים יהיו
ויקרא 20 : 22 (ALEP)
כב ושמרתם את כל חקתי ואת כל משפטי ועשיתם אתם ולא תקיא אתכם הארץ אשר אני מביא אתכם שמה לשבת בה
ויקרא 20 : 23 (ALEP)
כג ולא תלכו בחקת הגוי אשר אני משלח מפניכם כי את כל אלה עשו ואקץ בם
ויקרא 20 : 24 (ALEP)
כד ואמר לכם אתם תירשו את אדמתם ואני אתננה לכם לרשת אתה ארץ זבת חלב ודבש אני יהוה אלהיכם אשר הבדלתי אתכם מן העמים
ויקרא 20 : 25 (ALEP)
כה והבדלתם בין הבהמה הטהרה לטמאה ובין העוף הטמא לטהר ולא תשקצו את נפשתיכם בבהמה ובעוף ובכל אשר תרמש האדמה אשר הבדלתי לכם לטמא
ויקרא 20 : 26 (ALEP)
כו והייתם לי קדשים כי קדוש אני יהוה ואבדל אתכם מן העמים להיות לי
ויקרא 20 : 27 (ALEP)
כז ואיש או אשה כי יהיה בהם אוב או ידעני--מות יומתו באבן ירגמו אתם דמיהם בם פ
❮
❯