Leviticus 19 : 1 (ALEP)
א וידבר יהוה אל משה לאמר
Leviticus 19 : 2 (ALEP)
ב דבר אל כל עדת בני ישראל ואמרת אלהם--קדשים תהיו כי קדוש אני יהוה אלהיכם
Leviticus 19 : 3 (ALEP)
ג איש אמו ואביו תיראו ואת שבתתי תשמרו אני יהוה אלהיכם
Leviticus 19 : 4 (ALEP)
ד אל תפנו אל האלילם ואלהי מסכה לא תעשו לכם אני יהוה אלהיכם
Leviticus 19 : 5 (ALEP)
ה וכי תזבחו זבח שלמים ליהוה--לרצנכם תזבחהו
Leviticus 19 : 6 (ALEP)
ו ביום זבחכם יאכל וממחרת והנותר עד יום השלישי באש ישרף
Leviticus 19 : 7 (ALEP)
ז ואם האכל יאכל ביום השלישי--פגול הוא לא ירצה
Leviticus 19 : 8 (ALEP)
ח ואכליו עונו ישא כי את קדש יהוה חלל ונכרתה הנפש ההוא מעמיה
Leviticus 19 : 9 (ALEP)
ט ובקצרכם את קציר ארצכם לא תכלה פאת שדך לקצר ולקט קצירך לא תלקט
Leviticus 19 : 10 (ALEP)
י וכרמך לא תעולל ופרט כרמך לא תלקט לעני ולגר תעזב אתם אני יהוה אלהיכם
Leviticus 19 : 11 (ALEP)
יא לא תגנבו ולא תכחשו ולא תשקרו איש בעמיתו
Leviticus 19 : 12 (ALEP)
יב ולא תשבעו בשמי לשקר וחללת את שם אלהיך אני יהוה
Leviticus 19 : 13 (ALEP)
יג לא תעשק את רעך ולא תגזל לא תלין פעלת שכיר אתך--עד בקר
Leviticus 19 : 14 (ALEP)
יד לא תקלל חרש--ולפני עור לא תתן מכשל ויראת מאלהיך אני יהוה
Leviticus 19 : 15 (ALEP)
טו לא תעשו עול במשפט--לא תשא פני דל ולא תהדר פני גדול בצדק תשפט עמיתך
Leviticus 19 : 16 (ALEP)
טז לא תלך רכיל בעמיך לא תעמד על דם רעך אני יהוה
Leviticus 19 : 17 (ALEP)
יז לא תשנא את אחיך בלבבך הוכח תוכיח את עמיתך ולא תשא עליו חטא
Leviticus 19 : 18 (ALEP)
יח לא תקם ולא תטר את בני עמך ואהבת לרעך כמוך אני יהוה
Leviticus 19 : 19 (ALEP)
יט את חקתי תשמרו--בהמתך לא תרביע כלאים שדך לא תזרע כלאים ובגד כלאים שעטנז לא יעלה עליך
Leviticus 19 : 20 (ALEP)
כ ואיש כי ישכב את אשה שכבת זרע והוא שפחה נחרפת לאיש והפדה לא נפדתה או חפשה לא נתן לה--בקרת תהיה לא יומתו כי לא חפשה
Leviticus 19 : 21 (ALEP)
כא והביא את אשמו ליהוה אל פתח אהל מועד--איל אשם
Leviticus 19 : 22 (ALEP)
כב וכפר עליו הכהן באיל האשם לפני יהוה על חטאתו אשר חטא ונסלח לו מחטאתו אשר חטא {פ}
Leviticus 19 : 23 (ALEP)
כג וכי תבאו אל הארץ ונטעתם כל עץ מאכל--וערלתם ערלתו את פריו שלש שנים יהיה לכם ערלים--לא יאכל
Leviticus 19 : 24 (ALEP)
כד ובשנה הרביעת יהיה כל פריו--קדש הלולים ליהוה
Leviticus 19 : 25 (ALEP)
כה ובשנה החמישת תאכלו את פריו להוסיף לכם תבואתו אני יהוה אלהיכם
Leviticus 19 : 26 (ALEP)
כו לא תאכלו על הדם לא תנחשו ולא תעוננו
Leviticus 19 : 27 (ALEP)
כז לא תקפו פאת ראשכם ולא תשחית את פאת זקנך
Leviticus 19 : 28 (ALEP)
כח ושרט לנפש לא תתנו בבשרכם וכתבת קעקע לא תתנו בכם אני יהוה
Leviticus 19 : 29 (ALEP)
כט אל תחלל את בתך להזנותה ולא תזנה הארץ ומלאה הארץ זמה
Leviticus 19 : 30 (ALEP)
ל את שבתתי תשמרו ומקדשי תיראו אני יהוה
Leviticus 19 : 31 (ALEP)
לא אל תפנו אל האבת ואל הידענים אל תבקשו לטמאה בהם אני יהוה אלהיכם
Leviticus 19 : 32 (ALEP)
לב מפני שיבה תקום והדרת פני זקן ויראת מאלהיך אני יהוה {ס}
Leviticus 19 : 33 (ALEP)
לג וכי יגור אתך גר בארצכם--לא תונו אתו
Leviticus 19 : 34 (ALEP)
לד כאזרח מכם יהיה לכם הגר הגר אתכם ואהבת לו כמוך--כי גרים הייתם בארץ מצרים אני יהוה אלהיכם
Leviticus 19 : 35 (ALEP)
לה לא תעשו עול במשפט במדה במשקל ובמשורה
Leviticus 19 : 36 (ALEP)
לו מאזני צדק אבני צדק איפת צדק והין צדק--יהיה לכם אני יהוה אלהיכם אשר הוצאתי אתכם מארץ מצרים
Leviticus 19 : 37 (ALEP)
לז ושמרתם את כל חקתי ואת כל משפטי ועשיתם אתם אני יהוה {פ}
❮
❯