ויקרא 15 : 1 (ALEP)
א וידבר יהוה אל משה ואל אהרן לאמר
ויקרא 15 : 2 (ALEP)
ב דברו אל בני ישראל ואמרתם אלהם איש איש כי יהיה זב מבשרו--זובו טמא הוא
ויקרא 15 : 3 (ALEP)
ג וזאת תהיה טמאתו בזובו רר בשרו את זובו או החתים בשרו מזובו--טמאתו הוא
ויקרא 15 : 4 (ALEP)
ד כל המשכב אשר ישכב עליו הזב--יטמא וכל הכלי אשר ישב עליו יטמא
ויקרא 15 : 5 (ALEP)
ה ואיש אשר יגע במשכבו--יכבס בגדיו ורחץ במים וטמא עד הערב
ויקרא 15 : 6 (ALEP)
ו והישב על הכלי אשר ישב עליו הזב--יכבס בגדיו ורחץ במים וטמא עד הערב
ויקרא 15 : 7 (ALEP)
ז והנגע בבשר הזב--יכבס בגדיו ורחץ במים וטמא עד הערב
ויקרא 15 : 8 (ALEP)
ח וכי ירק הזב בטהור--וכבס בגדיו ורחץ במים וטמא עד הערב
ויקרא 15 : 9 (ALEP)
ט וכל המרכב אשר ירכב עליו הזב--יטמא
ויקרא 15 : 10 (ALEP)
י וכל הנגע בכל אשר יהיה תחתיו--יטמא עד הערב והנושא אותם--יכבס בגדיו ורחץ במים וטמא עד הערב
ויקרא 15 : 11 (ALEP)
יא וכל אשר יגע בו הזב וידיו לא שטף במים--וכבס בגדיו ורחץ במים וטמא עד הערב
ויקרא 15 : 12 (ALEP)
יב וכלי חרש אשר יגע בו הזב ישבר וכל כלי עץ--ישטף במים
ויקרא 15 : 13 (ALEP)
יג וכי יטהר הזב מזובו--וספר לו שבעת ימים לטהרתו וכבס בגדיו ורחץ בשרו במים חיים וטהר
ויקרא 15 : 14 (ALEP)
יד וביום השמיני יקח לו שתי תרים או שני בני יונה ובא לפני יהוה אל פתח אהל מועד ונתנם אל הכהן
ויקרא 15 : 15 (ALEP)
טו ועשה אתם הכהן--אחד חטאת והאחד עלה וכפר עליו הכהן לפני יהוה מזובו ס
ויקרא 15 : 16 (ALEP)
טז ואיש כי תצא ממנו שכבת זרע--ורחץ במים את כל בשרו וטמא עד הערב
ויקרא 15 : 17 (ALEP)
יז וכל בגד וכל עור אשר יהיה עליו שכבת זרע--וכבס במים וטמא עד הערב
ויקרא 15 : 18 (ALEP)
יח ואשה אשר ישכב איש אתה שכבת זרע--ורחצו במים וטמאו עד הערב פ
ויקרא 15 : 19 (ALEP)
יט ואשה כי תהיה זבה דם יהיה זבה בבשרה--שבעת ימים תהיה בנדתה וכל הנגע בה יטמא עד הערב
ויקרא 15 : 20 (ALEP)
כ וכל אשר תשכב עליו בנדתה יטמא וכל אשר תשב עליו יטמא
ויקרא 15 : 21 (ALEP)
כא וכל הנגע במשכבה--יכבס בגדיו ורחץ במים וטמא עד הערב
ויקרא 15 : 22 (ALEP)
כב וכל הנגע--בכל כלי אשר תשב עליו יכבס בגדיו ורחץ במים וטמא עד הערב
ויקרא 15 : 23 (ALEP)
כג ואם על המשכב הוא או על הכלי אשר הוא ישבת עליו--בנגעו בו יטמא עד הערב
ויקרא 15 : 24 (ALEP)
כד ואם שכב ישכב איש אתה ותהי נדתה עליו--וטמא שבעת ימים וכל המשכב אשר ישכב עליו יטמא ס
ויקרא 15 : 25 (ALEP)
כה ואשה כי יזוב זוב דמה ימים רבים בלא עת נדתה או כי תזוב על נדתה כל ימי זוב טמאתה כימי נדתה תהיה--טמאה הוא
ויקרא 15 : 26 (ALEP)
כו כל המשכב אשר תשכב עליו כל ימי זובה--כמשכב נדתה יהיה לה וכל הכלי אשר תשב עליו--טמא יהיה כטמאת נדתה
ויקרא 15 : 27 (ALEP)
כז וכל הנוגע בם יטמא וכבס בגדיו ורחץ במים וטמא עד הערב
ויקרא 15 : 28 (ALEP)
כח ואם טהרה מזובה--וספרה לה שבעת ימים ואחר תטהר
ויקרא 15 : 29 (ALEP)
כט וביום השמיני תקח לה שתי תרים או שני בני יונה והביאה אותם אל הכהן אל פתח אהל מועד
ויקרא 15 : 30 (ALEP)
ל ועשה הכהן את האחד חטאת ואת האחד עלה וכפר עליה הכהן לפני יהוה מזוב טמאתה
ויקרא 15 : 31 (ALEP)
לא והזרתם את בני ישראל מטמאתם ולא ימתו בטמאתם בטמאם את משכני אשר בתוכם
ויקרא 15 : 32 (ALEP)
לב זאת תורת הזב ואשר תצא ממנו שכבת זרע לטמאה בה
ויקרא 15 : 33 (ALEP)
לג והדוה בנדתה והזב את זובו לזכר ולנקבה ולאיש אשר ישכב עם טמאה פ
❮
❯