שפטים 9 : 1 (ALEP)
א וילך אבימלך בן ירבעל שכמה אל אחי אמו וידבר אליהם ואל כל משפחת בית אבי אמו לאמר
שפטים 9 : 2 (ALEP)
ב דברו נא באזני כל בעלי שכם מה טוב לכם--המשל בכם שבעים איש כל בני ירבעל אם משל בכם איש אחד וזכרתם כי עצמכם ובשרכם אני
שפטים 9 : 3 (ALEP)
ג וידברו אחי אמו עליו באזני כל בעלי שכם את כל הדברים האלה ויט לבם אחרי אבימלך כי אמרו אחינו הוא
שפטים 9 : 4 (ALEP)
ד ויתנו לו שבעים כסף מבית בעל ברית וישכר בהם אבימלך אנשים ריקים ופחזים וילכו אחריו
שפטים 9 : 5 (ALEP)
ה ויבא בית אביו עפרתה ויהרג את אחיו בני ירבעל שבעים איש על אבן אחת ויותר יותם בן ירבעל הקטן--כי נחבא ס
שפטים 9 : 6 (ALEP)
ו ויאספו כל בעלי שכם וכל בית מלוא וילכו וימליכו את אבימלך למלך--עם אלון מצב אשר בשכם
שפטים 9 : 7 (ALEP)
ז ויגדו ליותם וילך ויעמד בראש הר גרזים וישא קולו ויקרא ויאמר להם שמעו אלי בעלי שכם וישמע אליכם אלהים
שפטים 9 : 8 (ALEP)
ח הלוך הלכו העצים למשח עליהם מלך ויאמרו לזית מלוכה (מלכה) עלינו
שפטים 9 : 9 (ALEP)
ט ויאמר להם הזית החדלתי את דשני אשר בי יכבדו אלהים ואנשים והלכתי לנוע על העצים
שפטים 9 : 10 (ALEP)
י ויאמרו העצים לתאנה לכי את מלכי עלינו
שפטים 9 : 11 (ALEP)
יא ותאמר להם התאנה החדלתי את מתקי ואת תנובתי הטובה והלכתי לנוע על העצים
שפטים 9 : 12 (ALEP)
יב ויאמרו העצים לגפן לכי את מלוכי (מלכי) עלינו
שפטים 9 : 13 (ALEP)
יג ותאמר להם הגפן החדלתי את תירושי המשמח אלהים ואנשים והלכתי לנוע על העצים
שפטים 9 : 14 (ALEP)
יד ויאמרו כל העצים אל האטד לך אתה מלך עלינו
שפטים 9 : 15 (ALEP)
טו ויאמר האטד אל העצים אם באמת אתם משחים אתי למלך עליכם באו חסו בצלי ואם אין--תצא אש מן האטד ותאכל את ארזי הלבנון
שפטים 9 : 16 (ALEP)
טז ועתה אם באמת ובתמים עשיתם ותמליכו את אבימלך ואם טובה עשיתם עם ירבעל ועם ביתו ואם כגמול ידיו עשיתם לו
שפטים 9 : 17 (ALEP)
יז אשר נלחם אבי עליכם וישלך את נפשו מנגד ויצל אתכם מיד מדין
שפטים 9 : 18 (ALEP)
יח ואתם קמתם על בית אבי היום ותהרגו את בניו שבעים איש על אבן אחת ותמליכו את אבימלך בן אמתו על בעלי שכם כי אחיכם הוא
שפטים 9 : 19 (ALEP)
יט ואם באמת ובתמים עשיתם עם ירבעל ועם ביתו היום הזה--שמחו באבימלך וישמח גם הוא בכם
שפטים 9 : 20 (ALEP)
כ ואם אין--תצא אש מאבימלך ותאכל את בעלי שכם ואת בית מלוא ותצא אש מבעלי שכם ומבית מלוא ותאכל את אבימלך
שפטים 9 : 21 (ALEP)
כא וינס יותם ויברח וילך בארה וישב שם מפני אבימלך אחיו פ
שפטים 9 : 22 (ALEP)
כב וישר אבימלך על ישראל שלש שנים
שפטים 9 : 23 (ALEP)
כג וישלח אלהים רוח רעה בין אבימלך ובין בעלי שכם ויבגדו בעלי שכם באבימלך
שפטים 9 : 24 (ALEP)
כד לבוא חמס שבעים בני ירבעל ודמם לשום על אבימלך אחיהם אשר הרג אותם ועל בעלי שכם אשר חזקו את ידיו להרג את אחיו
שפטים 9 : 25 (ALEP)
כה וישימו לו בעלי שכם מארבים על ראשי ההרים ויגזלו את כל אשר יעבר עליהם בדרך ויגד לאבימלך פ
שפטים 9 : 26 (ALEP)
כו ויבא געל בן עבד ואחיו ויעברו בשכם ויבטחו בו בעלי שכם
שפטים 9 : 27 (ALEP)
כז ויצאו השדה ויבצרו את כרמיהם וידרכו ויעשו הלולים ויבאו בית אלהיהם ויאכלו וישתו ויקללו את אבימלך
שפטים 9 : 28 (ALEP)
כח ויאמר געל בן עבד מי אבימלך ומי שכם כי נעבדנו--הלא בן ירבעל וזבל פקידו עבדו את אנשי חמור אבי שכם ומדוע נעבדנו אנחנו
שפטים 9 : 29 (ALEP)
כט ומי יתן את העם הזה בידי ואסירה את אבימלך ויאמר לאבימלך רבה צבאך וצאה
שפטים 9 : 30 (ALEP)
ל וישמע זבל שר העיר את דברי געל בן עבד ויחר אפו
שפטים 9 : 31 (ALEP)
לא וישלח מלאכים אל אבימלך בתרמה לאמר הנה געל בן עבד ואחיו באים שכמה והנם צרים את העיר עליך
שפטים 9 : 32 (ALEP)
לב ועתה קום לילה אתה והעם אשר אתך וארב בשדה
שפטים 9 : 33 (ALEP)
לג והיה בבקר כזרח השמש תשכים ופשטת על העיר והנה הוא והעם אשר אתו יצאים אליך ועשית לו כאשר תמצא ידך
שפטים 9 : 34 (ALEP)
לד ויקם אבימלך וכל העם אשר עמו לילה ויארבו על שכם ארבעה ראשים
שפטים 9 : 35 (ALEP)
לה ויצא געל בן עבד ויעמד פתח שער העיר ויקם אבימלך והעם אשר אתו מן המארב
שפטים 9 : 36 (ALEP)
לו וירא געל את העם ויאמר אל זבל הנה עם יורד מראשי ההרים ויאמר אליו זבל את צל ההרים אתה ראה כאנשים
שפטים 9 : 37 (ALEP)
לז ויסף עוד געל לדבר ויאמר הנה עם יורדים מעם טבור הארץ וראש אחד בא מדרך אלון מעוננים
שפטים 9 : 38 (ALEP)
לח ויאמר אליו זבל איה אפוא פיך אשר תאמר מי אבימלך כי נעבדנו הלא זה העם אשר מאסתה בו צא נא עתה והלחם בו
שפטים 9 : 39 (ALEP)
לט ויצא געל לפני בעלי שכם וילחם באבימלך
שפטים 9 : 40 (ALEP)
מ וירדפהו אבימלך וינס מפניו ויפלו חללים רבים עד פתח השער
שפטים 9 : 41 (ALEP)
מא וישב אבימלך בארומה ויגרש זבל את געל ואת אחיו משבת בשכם ס
שפטים 9 : 42 (ALEP)
מב ויהי ממחרת ויצא העם השדה ויגדו לאבימלך
שפטים 9 : 43 (ALEP)
מג ויקח את העם ויחצם לשלשה ראשים ויארב בשדה וירא והנה העם יצא מן העיר ויקם עליהם ויכם
שפטים 9 : 44 (ALEP)
מד ואבימלך והראשים אשר עמו פשטו ויעמדו פתח שער העיר ושני הראשים פשטו על כל אשר בשדה--ויכום
שפטים 9 : 45 (ALEP)
מה ואבימלך נלחם בעיר כל היום ההוא וילכד את העיר ואת העם אשר בה הרג ויתץ את העיר ויזרעה מלח פ
שפטים 9 : 46 (ALEP)
מו וישמעו כל בעלי מגדל שכם ויבאו אל צריח בית אל ברית
שפטים 9 : 47 (ALEP)
מז ויגד לאבימלך כי התקבצו כל בעלי מגדל שכם
שפטים 9 : 48 (ALEP)
מח ויעל אבימלך הר צלמון הוא וכל העם אשר אתו ויקח אבימלך את הקרדמות בידו ויכרת שוכת עצים וישאה וישם על שכמו ויאמר אל העם אשר עמו מה ראיתם עשיתי--מהרו עשו כמוני
שפטים 9 : 49 (ALEP)
מט ויכרתו גם כל העם איש שוכה וילכו אחרי אבימלך וישימו על הצריח ויציתו עליהם את הצריח באש וימתו גם כל אנשי מגדל שכם כאלף--איש ואשה פ
שפטים 9 : 50 (ALEP)
נ וילך אבימלך אל תבץ ויחן בתבץ וילכדה
שפטים 9 : 51 (ALEP)
נא ומגדל עז היה בתוך העיר וינסו שמה כל האנשים והנשים וכל בעלי העיר ויסגרו בעדם ויעלו על גג המגדל
שפטים 9 : 52 (ALEP)
נב ויבא אבימלך עד המגדל וילחם בו ויגש עד פתח המגדל לשרפו באש
שפטים 9 : 53 (ALEP)
נג ותשלך אשה אחת פלח רכב--על ראש אבימלך ותרץ את גלגלתו
שפטים 9 : 54 (ALEP)
נד ויקרא מהרה אל הנער נשא כליו ויאמר לו שלף חרבך ומותתני--פן יאמרו לי אשה הרגתהו וידקרהו נערו וימת
שפטים 9 : 55 (ALEP)
נה ויראו איש ישראל כי מת אבימלך וילכו איש למקמו
שפטים 9 : 56 (ALEP)
נו וישב אלהים את רעת אבימלך אשר עשה לאביו להרג את שבעים אחיו
שפטים 9 : 57 (ALEP)
נז ואת כל רעת אנשי שכם השיב אלהים בראשם ותבא אליהם קללת יותם בן ירבעל פ
❮
❯