שפטים 21 : 1 (ALEP)
א ואיש ישראל נשבע במצפה לאמר איש ממנו לא יתן בתו לבנימן לאשה
שפטים 21 : 2 (ALEP)
ב ויבא העם בית אל וישבו שם עד הערב לפני האלהים וישאו קולם ויבכו בכי גדול
שפטים 21 : 3 (ALEP)
ג ויאמרו--למה יהוה אלהי ישראל היתה זאת בישראל להפקד היום מישראל שבט אחד
שפטים 21 : 4 (ALEP)
ד ויהי ממחרת וישכימו העם ויבנו שם מזבח ויעלו עלות ושלמים {פ}
שפטים 21 : 5 (ALEP)
ה ויאמרו בני ישראל מי אשר לא עלה בקהל מכל שבטי ישראל אל יהוה כי השבועה הגדולה היתה לאשר לא עלה אל יהוה המצפה לאמר--מות יומת
שפטים 21 : 6 (ALEP)
ו וינחמו בני ישראל אל בנימן אחיו ויאמרו נגדע היום שבט אחד מישראל
שפטים 21 : 7 (ALEP)
ז מה נעשה להם לנותרים לנשים ואנחנו נשבענו ביהוה לבלתי תת להם מבנותינו לנשים
שפטים 21 : 8 (ALEP)
ח ויאמרו--מי אחד משבטי ישראל אשר לא עלה אל יהוה המצפה והנה לא בא איש אל המחנה מיביש גלעד--אל הקהל
שפטים 21 : 9 (ALEP)
ט ויתפקד העם והנה אין שם איש מיושבי יבש גלעד
שפטים 21 : 10 (ALEP)
י וישלחו שם העדה שנים עשר אלף איש--מבני החיל ויצוו אותם לאמר לכו והכיתם את יושבי יבש גלעד לפי חרב והנשים והטף
שפטים 21 : 11 (ALEP)
יא וזה הדבר אשר תעשו כל זכר וכל אשה ידעת משכב זכר--תחרימו
שפטים 21 : 12 (ALEP)
יב וימצאו מיושבי יביש גלעד ארבע מאות נערה בתולה אשר לא ידעה איש למשכב זכר ויבאו אותם אל המחנה שלה אשר בארץ כנען {פ}
שפטים 21 : 13 (ALEP)
יג וישלחו כל העדה וידברו אל בני בנימן אשר בסלע רמון ויקראו להם שלום
שפטים 21 : 14 (ALEP)
יד וישב בנימן בעת ההיא ויתנו להם הנשים אשר חיו מנשי יבש גלעד ולא מצאו להם כן
שפטים 21 : 15 (ALEP)
טו והעם נחם לבנימן כי עשה יהוה פרץ בשבטי ישראל
שפטים 21 : 16 (ALEP)
טז ויאמרו זקני העדה מה נעשה לנותרים לנשים כי נשמדה מבנימן אשה
שפטים 21 : 17 (ALEP)
יז ויאמרו ירשת פליטה לבנימן ולא ימחה שבט מישראל
שפטים 21 : 18 (ALEP)
יח ואנחנו לא נוכל לתת להם נשים--מבנותינו כי נשבעו בני ישראל לאמר ארור נתן אשה לבנימן {ס}
שפטים 21 : 19 (ALEP)
יט ויאמרו הנה חג יהוה בשלו מימים ימימה אשר מצפונה לבית אל מזרחה השמש למסלה העלה מבית אל שכמה--ומנגב ללבונה
שפטים 21 : 20 (ALEP)
כ ויצו (ויצוו) את בני בנימן לאמר לכו וארבתם בכרמים
שפטים 21 : 21 (ALEP)
כא וראיתם והנה אם יצאו בנות שילו לחול במחלות ויצאתם מן הכרמים וחטפתם לכם איש אשתו מבנות שילו והלכתם ארץ בנימן
שפטים 21 : 22 (ALEP)
כב והיה כי יבאו אבותם או אחיהם לרוב (לריב) אלינו ואמרנו אליהם חנונו אותם--כי לא לקחנו איש אשתו במלחמה כי לא אתם נתתם להם כעת תאשמו {ס}
שפטים 21 : 23 (ALEP)
כג ויעשו כן בני בנימן וישאו נשים למספרם מן המחללות אשר גזלו וילכו וישובו אל נחלתם ויבנו את הערים וישבו בהם
שפטים 21 : 24 (ALEP)
כד ויתהלכו משם בני ישראל בעת ההיא איש לשבטו ולמשפחתו ויצאו משם איש לנחלתו {פ}
שפטים 21 : 25 (ALEP)
כה בימים ההם אין מלך בישראל איש הישר בעיניו יעשה {ש}
❮
❯