שפטים 2 : 1 (ALEP)
א ויעל מלאך יהוה מן הגלגל אל הבכים {פ} ויאמר אעלה אתכם ממצרים ואביא אתכם אל הארץ אשר נשבעתי לאבתיכם ואמר לא אפר בריתי אתכם לעולם
שפטים 2 : 2 (ALEP)
ב ואתם לא תכרתו ברית ליושבי הארץ הזאת--מזבחותיהם תתצון ולא שמעתם בקולי מה זאת עשיתם
שפטים 2 : 3 (ALEP)
ג וגם אמרתי לא אגרש אותם מפניכם והיו לכם לצדים ואלהיהם יהיו לכם למוקש
שפטים 2 : 4 (ALEP)
ד ויהי כדבר מלאך יהוה את הדברים האלה אל כל בני ישראל וישאו העם את קולם ויבכו
שפטים 2 : 5 (ALEP)
ה ויקראו שם המקום ההוא בכים ויזבחו שם ליהוה {פ}
שפטים 2 : 6 (ALEP)
ו וישלח יהושע את העם וילכו בני ישראל איש לנחלתו לרשת את הארץ
שפטים 2 : 7 (ALEP)
ז ויעבדו העם את יהוה כל ימי יהושע וכל ימי הזקנים אשר האריכו ימים אחרי יהושוע אשר ראו את כל מעשה יהוה הגדול אשר עשה לישראל
שפטים 2 : 8 (ALEP)
ח וימת יהושע בן נון עבד יהוה בן מאה ועשר שנים
שפטים 2 : 9 (ALEP)
ט ויקברו אותו בגבול נחלתו בתמנת חרס בהר אפרים מצפון להר געש
שפטים 2 : 10 (ALEP)
י וגם כל הדור ההוא נאספו אל אבותיו ויקם דור אחר אחריהם אשר לא ידעו את יהוה וגם את המעשה אשר עשה לישראל {פ}
שפטים 2 : 11 (ALEP)
יא ויעשו בני ישראל את הרע בעיני יהוה ויעבדו את הבעלים
שפטים 2 : 12 (ALEP)
יב ויעזבו את יהוה אלהי אבותם המוציא אותם מארץ מצרים וילכו אחרי אלהים אחרים מאלהי העמים אשר סביבותיהם וישתחוו להם ויכעסו את יהוה
שפטים 2 : 13 (ALEP)
יג ויעזבו את יהוה ויעבדו לבעל ולעשתרות
שפטים 2 : 14 (ALEP)
יד ויחר אף יהוה בישראל ויתנם ביד שסים וישסו אותם וימכרם ביד אויביהם מסביב ולא יכלו עוד לעמד לפני אויביהם
שפטים 2 : 15 (ALEP)
טו בכל אשר יצאו יד יהוה היתה בם לרעה כאשר דבר יהוה וכאשר נשבע יהוה להם ויצר להם מאד
שפטים 2 : 16 (ALEP)
טז ויקם יהוה שפטים ויושיעום מיד שסיהם
שפטים 2 : 17 (ALEP)
יז וגם אל שפטיהם לא שמעו--כי זנו אחרי אלהים אחרים וישתחוו להם סרו מהר מן הדרך אשר הלכו אבותם לשמע מצות יהוה--לא עשו כן
שפטים 2 : 18 (ALEP)
יח וכי הקים יהוה להם שפטים והיה יהוה עם השפט והושיעם מיד איביהם כל ימי השופט כי ינחם יהוה מנאקתם מפני לחציהם ודחקיהם
שפטים 2 : 19 (ALEP)
יט והיה במות השופט ישבו והשחיתו מאבותם ללכת אחרי אלהים אחרים לעבדם ולהשתחות להם לא הפילו ממעלליהם ומדרכם הקשה
שפטים 2 : 20 (ALEP)
כ ויחר אף יהוה בישראל ויאמר יען אשר עברו הגוי הזה את בריתי אשר צויתי את אבותם ולא שמעו לקולי
שפטים 2 : 21 (ALEP)
כא גם אני לא אוסיף להוריש איש מפניהם מן הגוים אשר עזב יהושע וימת
שפטים 2 : 22 (ALEP)
כב למען נסות בם את ישראל השמרים הם את דרך יהוה ללכת בם כאשר שמרו אבותם--אם לא
שפטים 2 : 23 (ALEP)
כג וינח יהוה את הגוים האלה לבלתי הורישם מהר ולא נתנם ביד יהושע {פ}
❮
❯