שפטים 18 : 1 (ALEP)
א בימים ההם אין מלך בישראל ובימים ההם שבט הדני מבקש לו נחלה לשבת--כי לא נפלה לו עד היום ההוא בתוך שבטי ישראל בנחלה פ
שפטים 18 : 2 (ALEP)
ב וישלחו בני דן ממשפחתם חמשה אנשים מקצותם אנשים בני חיל מצרעה ומאשתאל לרגל את הארץ ולחקרה ויאמרו אלהם לכו חקרו את הארץ ויבאו הר אפרים עד בית מיכה וילינו שם
שפטים 18 : 3 (ALEP)
ג המה עם בית מיכה והמה הכירו את קול הנער הלוי ויסורו שם ויאמרו לו מי הביאך הלם ומה אתה עשה בזה ומה לך פה
שפטים 18 : 4 (ALEP)
ד ויאמר אלהם--כזה וכזה עשה לי מיכה וישכרני ואהי לו לכהן
שפטים 18 : 5 (ALEP)
ה ויאמרו לו שאל נא באלהים ונדעה--התצלח דרכנו אשר אנחנו הלכים עליה
שפטים 18 : 6 (ALEP)
ו ויאמר להם הכהן לכו לשלום נכח יהוה דרככם אשר תלכו בה פ
שפטים 18 : 7 (ALEP)
ז וילכו חמשת האנשים ויבאו לישה ויראו את העם אשר בקרבה יושבת לבטח כמשפט צדנים שקט ובטח ואין מכלים דבר בארץ יורש עצר ורחוקים המה מצידנים ודבר אין להם עם אדם
שפטים 18 : 8 (ALEP)
ח ויבאו אל אחיהם צרעה ואשתאל ויאמרו להם אחיהם מה אתם
שפטים 18 : 9 (ALEP)
ט ויאמרו קומה ונעלה עליהם כי ראינו את הארץ והנה טובה מאד ואתם מחשים--אל תעצלו ללכת לבא לרשת את הארץ
שפטים 18 : 10 (ALEP)
י כבאכם תבאו אל עם בטח והארץ רחבת ידים--כי נתנה אלהים בידכם מקום אשר אין שם מחסור כל דבר אשר בארץ
שפטים 18 : 11 (ALEP)
יא ויסעו משם ממשפחת הדני מצרעה ומאשתאל שש מאות איש חגור כלי מלחמה
שפטים 18 : 12 (ALEP)
יב ויעלו ויחנו בקרית יערים--ביהודה על כן קראו למקום ההוא מחנה דן עד היום הזה--הנה אחרי קרית יערים
שפטים 18 : 13 (ALEP)
יג ויעברו משם הר אפרים ויבאו עד בית מיכה
שפטים 18 : 14 (ALEP)
יד ויענו חמשת האנשים ההלכים לרגל את הארץ ליש ויאמרו אל אחיהם הידעתם כי יש בבתים האלה אפוד ותרפים ופסל ומסכה ועתה דעו מה תעשו
שפטים 18 : 15 (ALEP)
טו ויסורו שמה ויבאו אל בית הנער הלוי בית מיכה וישאלו לו לשלום
שפטים 18 : 16 (ALEP)
טז ושש מאות איש חגורים כלי מלחמתם נצבים פתח השער--אשר מבני דן
שפטים 18 : 17 (ALEP)
יז ויעלו חמשת האנשים ההלכים לרגל את הארץ--באו שמה לקחו את הפסל ואת האפוד ואת התרפים ואת המסכה והכהן נצב פתח השער ושש מאות האיש החגור כלי המלחמה
שפטים 18 : 18 (ALEP)
יח ואלה באו בית מיכה ויקחו את פסל האפוד ואת התרפים ואת המסכה ויאמר אליהם הכהן מה אתם עשים
שפטים 18 : 19 (ALEP)
יט ויאמרו לו החרש שים ידך על פיך ולך עמנו והיה לנו לאב ולכהן הטוב היותך כהן לבית איש אחד או היותך כהן לשבט ולמשפחה בישראל
שפטים 18 : 20 (ALEP)
כ וייטב לב הכהן ויקח את האפוד ואת התרפים ואת הפסל ויבא בקרב העם
שפטים 18 : 21 (ALEP)
כא ויפנו וילכו וישימו את הטף ואת המקנה ואת הכבודה--לפניהם
שפטים 18 : 22 (ALEP)
כב המה הרחיקו מבית מיכה והאנשים אשר בבתים אשר עם בית מיכה נזעקו וידביקו את בני דן
שפטים 18 : 23 (ALEP)
כג ויקראו אל בני דן ויסבו פניהם ויאמרו למיכה מה לך כי נזעקת
שפטים 18 : 24 (ALEP)
כד ויאמר את אלהי אשר עשיתי לקחתם ואת הכהן ותלכו--ומה לי עוד ומה זה תאמרו אלי מה לך
שפטים 18 : 25 (ALEP)
כה ויאמרו אליו בני דן אל תשמע קולך עמנו--פן יפגעו בכם אנשים מרי נפש ואספתה נפשך ונפש ביתך
שפטים 18 : 26 (ALEP)
כו וילכו בני דן לדרכם וירא מיכה כי חזקים המה ממנו ויפן וישב אל ביתו
שפטים 18 : 27 (ALEP)
כז והמה לקחו את אשר עשה מיכה ואת הכהן אשר היה לו ויבאו על ליש על עם שקט ובטח ויכו אותם לפי חרב ואת העיר שרפו באש
שפטים 18 : 28 (ALEP)
כח ואין מציל כי רחוקה היא מצידון ודבר אין להם עם אדם והיא בעמק אשר לבית רחוב ויבנו את העיר וישבו בה
שפטים 18 : 29 (ALEP)
כט ויקראו שם העיר דן בשם דן אביהם אשר יולד לישראל ואולם ליש שם העיר לראשנה
שפטים 18 : 30 (ALEP)
ל ויקימו להם בני דן את הפסל ויהונתן בן גרשם בן מ נ שה הוא ובניו היו כהנים לשבט הדני עד יום גלות הארץ
שפטים 18 : 31 (ALEP)
לא וישימו להם את פסל מיכה אשר עשה כל ימי היות בית האלהים בשלה פ
❮
❯