שפטים 14 : 1 (ALEP)
א וירד שמשון תמנתה וירא אשה בתמנתה מבנות פלשתים
שפטים 14 : 2 (ALEP)
ב ויעל ויגד לאביו ולאמו ויאמר אשה ראיתי בתמנתה מבנות פלשתים ועתה קחו אותה לי לאשה
שפטים 14 : 3 (ALEP)
ג ויאמר לו אביו ואמו האין בבנות אחיך ובכל עמי אשה--כי אתה הולך לקחת אשה מפלשתים הערלים ויאמר שמשון אל אביו אותה קח לי כי היא ישרה בעיני
שפטים 14 : 4 (ALEP)
ד ואביו ואמו לא ידעו כי מיהוה היא--כי תאנה הוא מבקש מפלשתים ובעת ההיא פלשתים משלים בישראל
שפטים 14 : 5 (ALEP)
ה וירד שמשון ואביו ואמו תמנתה ויבאו עד כרמי תמנתה והנה כפיר אריות שאג לקראתו
שפטים 14 : 6 (ALEP)
ו ותצלח עליו רוח יהוה וישסעהו כשסע הגדי ומאומה אין בידו ולא הגיד לאביו ולאמו את אשר עשה
שפטים 14 : 7 (ALEP)
ז וירד וידבר לאשה ותישר בעיני שמשון
שפטים 14 : 8 (ALEP)
ח וישב מימים לקחתה ויסר לראות את מפלת האריה והנה עדת דבורים בגוית האריה ודבש
שפטים 14 : 9 (ALEP)
ט וירדהו אל כפיו וילך הלוך ואכל וילך אל אביו ואל אמו ויתן להם ויאכלו ולא הגיד להם כי מגוית האריה רדה הדבש
שפטים 14 : 10 (ALEP)
י וירד אביהו אל האשה ויעש שם שמשון משתה כי כן יעשו הבחורים
שפטים 14 : 11 (ALEP)
יא ויהי כראותם אותו ויקחו שלשים מרעים ויהיו אתו
שפטים 14 : 12 (ALEP)
יב ויאמר להם שמשון אחודה נא לכם חידה אם הגד תגידו אותה לי שבעת ימי המשתה ומצאתם--ונתתי לכם שלשים סדינים ושלשים חלפת בגדים
שפטים 14 : 13 (ALEP)
יג ואם לא תוכלו להגיד לי--ונתתם אתם לי שלשים סדינים ושלשים חליפות בגדים ויאמרו לו--חודה חידתך ונשמענה
שפטים 14 : 14 (ALEP)
יד ויאמר להם מהאכל יצא מאכל ומעז יצא מתוק ולא יכלו להגיד החידה שלשת ימים
שפטים 14 : 15 (ALEP)
טו ויהי ביום השביעי ויאמרו לאשת שמשון פתי את אישך ויגד לנו את החידה--פן נשרף אותך ואת בית אביך באש הלירשנו קראתם לנו הלא
שפטים 14 : 16 (ALEP)
טז ותבך אשת שמשון עליו ותאמר רק שנאתני ולא אהבתני--החידה חדת לבני עמי ולי לא הגדתה ויאמר לה הנה לאבי ולאמי לא הגדתי--ולך אגיד
שפטים 14 : 17 (ALEP)
יז ותבך עליו שבעת הימים אשר היה להם המשתה ויהי ביום השביעי ויגד לה כי הציקתהו ותגד החידה לבני עמה
שפטים 14 : 18 (ALEP)
יח ויאמרו לו אנשי העיר ביום השביעי בטרם יבא החרסה מה מתוק מדבש ומה עז מארי ויאמר להם--לולא חרשתם בעגלתי לא מצאתם חידתי
שפטים 14 : 19 (ALEP)
יט ותצלח עליו רוח יהוה וירד אשקלון ויך מהם שלשים איש ויקח את חליצותם ויתן החליפות למגידי החידה ויחר אפו ויעל בית אביהו
שפטים 14 : 20 (ALEP)
כ ותהי אשת שמשון למרעהו אשר רעה לו {פ}
❮
❯