שפטים 11 : 1 (ALEP)
א ויפתח הגלעדי היה גבור חיל והוא בן אשה זונה ויולד גלעד את יפתח
שפטים 11 : 2 (ALEP)
ב ותלד אשת גלעד לו בנים ויגדלו בני האשה ויגרשו את יפתח ויאמרו לו לא תנחל בבית אבינו--כי בן אשה אחרת אתה
שפטים 11 : 3 (ALEP)
ג ויברח יפתח מפני אחיו וישב בארץ טוב ויתלקטו אל יפתח אנשים ריקים ויצאו עמו פ
שפטים 11 : 4 (ALEP)
ד ויהי מימים וילחמו בני עמון עם ישראל
שפטים 11 : 5 (ALEP)
ה ויהי כאשר נלחמו בני עמון עם ישראל וילכו זקני גלעד לקחת את יפתח מארץ טוב
שפטים 11 : 6 (ALEP)
ו ויאמרו ליפתח--לכה והייתה לנו לקצין ונלחמה בבני עמון
שפטים 11 : 7 (ALEP)
ז ויאמר יפתח לזקני גלעד הלא אתם שנאתם אותי ותגרשוני מבית אבי ומדוע באתם אלי עתה כאשר צר לכם
שפטים 11 : 8 (ALEP)
ח ויאמרו זקני גלעד אל יפתח לכן עתה שבנו אליך והלכת עמנו ונלחמת בבני עמון והיית לנו לראש לכל ישבי גלעד
שפטים 11 : 9 (ALEP)
ט ויאמר יפתח אל זקני גלעד אם משיבים אתם אותי להלחם בבני עמון ונתן יהוה אותם לפני--אנכי אהיה לכם לראש
שפטים 11 : 10 (ALEP)
י ויאמרו זקני גלעד אל יפתח יהוה יהיה שמע בינותינו--אם לא כדברך כן נעשה
שפטים 11 : 11 (ALEP)
יא וילך יפתח עם זקני גלעד וישימו העם אותו עליהם לראש ולקצין וידבר יפתח את כל דבריו לפני יהוה במצפה פ
שפטים 11 : 12 (ALEP)
יב וישלח יפתח מלאכים אל מלך בני עמון לאמר מה לי ולך כי באת אלי להלחם בארצי
שפטים 11 : 13 (ALEP)
יג ויאמר מלך בני עמון אל מלאכי יפתח כי לקח ישראל את ארצי בעלותו ממצרים מארנון ועד היבק ועד הירדן ועתה השיבה אתהן בשלום
שפטים 11 : 14 (ALEP)
יד ויוסף עוד יפתח וישלח מלאכים אל מלך בני עמון
שפטים 11 : 15 (ALEP)
טו ויאמר לו כה אמר יפתח לא לקח ישראל את ארץ מואב ואת ארץ בני עמון
שפטים 11 : 16 (ALEP)
טז כי בעלותם ממצרים וילך ישראל במדבר עד ים סוף ויבא קדשה
שפטים 11 : 17 (ALEP)
יז וישלח ישראל מלאכים אל מלך אדום לאמר אעברה נא בארצך ולא שמע מלך אדום וגם אל מלך מואב שלח ולא אבה וישב ישראל בקדש
שפטים 11 : 18 (ALEP)
יח וילך במדבר ויסב את ארץ אדום ואת ארץ מואב ויבא ממזרח שמש לארץ מואב ויחנון בעבר ארנון ולא באו בגבול מואב כי ארנון גבול מואב
שפטים 11 : 19 (ALEP)
יט וישלח ישראל מלאכים אל סיחון מלך האמרי מלך חשבון ויאמר לו ישראל נעברה נא בארצך עד מקומי
שפטים 11 : 20 (ALEP)
כ ולא האמין סיחון את ישראל עבר בגבלו ויאסף סיחון את כל עמו ויחנו ביהצה וילחם עם ישראל
שפטים 11 : 21 (ALEP)
כא ויתן יהוה אלהי ישראל את סיחון ואת כל עמו ביד ישראל--ויכום ויירש ישראל את כל ארץ האמרי יושב הארץ ההיא
שפטים 11 : 22 (ALEP)
כב ויירשו את כל גבול האמרי--מארנון ועד היבק ומן המדבר ועד הירדן
שפטים 11 : 23 (ALEP)
כג ועתה יהוה אלהי ישראל הוריש את האמרי מפני עמו ישראל ואתה תירשנו
שפטים 11 : 24 (ALEP)
כד הלא את אשר יורישך כמוש אלהיך--אותו תירש ואת כל אשר הוריש יהוה אלהינו מפנינו--אותו נירש
שפטים 11 : 25 (ALEP)
כה ועתה הטוב טוב אתה מבלק בן צפור מלך מואב הרוב רב עם ישראל אם נלחם נלחם בם
שפטים 11 : 26 (ALEP)
כו בשבת ישראל בחשבון ובבנותיה ובערעור ובבנותיה ובכל הערים אשר על ידי ארנון שלש מאות שנה--ומדוע לא הצלתם בעת ההיא
שפטים 11 : 27 (ALEP)
כז ואנכי לא חטאתי לך ואתה עשה אתי רעה להלחם בי ישפט יהוה השפט היום בין בני ישראל ובין בני עמון
שפטים 11 : 28 (ALEP)
כח ולא שמע מלך בני עמון אל דברי יפתח אשר שלח אליו פ
שפטים 11 : 29 (ALEP)
כט ותהי על יפתח רוח יהוה ויעבר את הגלעד ואת מנשה ויעבר את מצפה גלעד וממצפה גלעד עבר בני עמון
שפטים 11 : 30 (ALEP)
ל וידר יפתח נדר ליהוה ויאמר אם נתון תתן את בני עמון בידי
שפטים 11 : 31 (ALEP)
לא והיה היוצא אשר יצא מדלתי ביתי לקראתי בשובי בשלום מבני עמון--והיה ליהוה והעליתיהו עלה פ
שפטים 11 : 32 (ALEP)
לב ויעבר יפתח אל בני עמון להלחם בם ויתנם יהוה בידו
שפטים 11 : 33 (ALEP)
לג ויכם מערוער ועד באך מנית עשרים עיר ועד אבל כרמים מכה גדולה מאד ויכנעו בני עמון מפני בני ישראל פ
שפטים 11 : 34 (ALEP)
לד ויבא יפתח המצפה אל ביתו והנה בתו יצאת לקראתו בתפים ובמחלות ורק היא יחידה אין לו ממנו בן או בת
שפטים 11 : 35 (ALEP)
לה ויהי כראותו אותה ויקרע את בגדיו ויאמר אהה בתי הכרע הכרעתני ואת היית בעכרי ואנכי פציתי פי אל יהוה ולא אוכל לשוב
שפטים 11 : 36 (ALEP)
לו ותאמר אליו אבי פציתה את פיך אל יהוה--עשה לי כאשר יצא מפיך אחרי אשר עשה לך יהוה נקמות מאיביך--מבני עמון
שפטים 11 : 37 (ALEP)
לז ותאמר אל אביה יעשה לי הדבר הזה הרפה ממני שנים חדשים ואלכה וירדתי על ההרים ואבכה על בתולי אנכי ורעיתי (ורעותי)
שפטים 11 : 38 (ALEP)
לח ויאמר לכי וישלח אותה שני חדשים ותלך היא ורעותיה ותבך על בתוליה על ההרים
שפטים 11 : 39 (ALEP)
לט ויהי מקץ שנים חדשים ותשב אל אביה ויעש לה את נדרו אשר נדר והיא לא ידעה איש ותהי חק בישראל
שפטים 11 : 40 (ALEP)
מ מימים ימימה תלכנה בנות ישראל לתנות לבת יפתח הגלעדי--ארבעת ימים בשנה פ
❮
❯