שפטים 1 : 1 (ALEP)
א ויהי אחרי מות יהושע וישאלו בני ישראל ביהוה לאמר מי יעלה לנו אל הכנעני בתחלה להלחם בו
שפטים 1 : 2 (ALEP)
ב ויאמר יהוה יהודה יעלה הנה נתתי את הארץ בידו
שפטים 1 : 3 (ALEP)
ג ויאמר יהודה לשמעון אחיו עלה אתי בגרלי ונלחמה בכנעני והלכתי גם אני אתך בגורלך וילך אתו שמעון
שפטים 1 : 4 (ALEP)
ד ויעל יהודה ויתן יהוה את הכנעני והפרזי בידם ויכום בבזק עשרת אלפים איש
שפטים 1 : 5 (ALEP)
ה וימצאו את אדני בזק בבזק וילחמו בו ויכו את הכנעני ואת הפרזי
שפטים 1 : 6 (ALEP)
ו וינס אדני בזק וירדפו אחריו ויאחזו אותו--ויקצצו את בהנות ידיו ורגליו
שפטים 1 : 7 (ALEP)
ז ויאמר אדני בזק שבעים מלכים בהנות ידיהם ורגליהם מקצצים היו מלקטים תחת שלחני--כאשר עשיתי כן שלם לי אלהים ויביאהו ירושלם וימת שם פ
שפטים 1 : 8 (ALEP)
ח וילחמו בני יהודה בירושלם וילכדו אותה ויכוה לפי חרב ואת העיר שלחו באש
שפטים 1 : 9 (ALEP)
ט ואחר ירדו בני יהודה להלחם בכנעני--יושב ההר והנגב והשפלה
שפטים 1 : 10 (ALEP)
י וילך יהודה אל הכנעני היושב בחברון ושם חברון לפנים קרית ארבע ויכו את ששי ואת אחימן ואת תלמי
שפטים 1 : 11 (ALEP)
יא וילך משם אל יושבי דביר ושם דביר לפנים קרית ספר
שפטים 1 : 12 (ALEP)
יב ויאמר כלב אשר יכה את קרית ספר ולכדה--ונתתי לו את עכסה בתי לאשה
שפטים 1 : 13 (ALEP)
יג וילכדה עתניאל בן קנז אחי כלב הקטן ממנו ויתן לו את עכסה בתו לאשה
שפטים 1 : 14 (ALEP)
יד ויהי בבואה ותסיתהו לשאל מאת אביה השדה ותצנח מעל החמור ויאמר לה כלב מה לך
שפטים 1 : 15 (ALEP)
טו ותאמר לו הבה לי ברכה כי ארץ הנגב נתתני ונתתה לי גלת מים ויתן לה כלב את גלת עלית ואת גלת תחתית פ
שפטים 1 : 16 (ALEP)
טז ובני קיני חתן משה עלו מעיר התמרים את בני יהודה מדבר יהודה אשר בנגב ערד וילך וישב את העם
שפטים 1 : 17 (ALEP)
יז וילך יהודה את שמעון אחיו ויכו את הכנעני יושב צפת ויחרימו אותה ויקרא את שם העיר חרמה
שפטים 1 : 18 (ALEP)
יח וילכד יהודה את עזה ואת גבולה ואת אשקלון ואת גבולה ואת עקרון ואת גבולה
שפטים 1 : 19 (ALEP)
יט ויהי יהוה את יהודה וירש את ההר כי לא להוריש את ישבי העמק כי רכב ברזל להם
שפטים 1 : 20 (ALEP)
כ ויתנו לכלב את חברון כאשר דבר משה ויורש משם את שלשה בני הענק
שפטים 1 : 21 (ALEP)
כא ואת היבוסי ישב ירושלם לא הורישו בני בנימן וישב היבוסי את בני בנימן בירושלם עד היום הזה פ
שפטים 1 : 22 (ALEP)
כב ויעלו בית יוסף גם הם בית אל ויהוה עמם
שפטים 1 : 23 (ALEP)
כג ויתירו בית יוסף בבית אל ושם העיר לפנים לוז
שפטים 1 : 24 (ALEP)
כד ויראו השמרים איש יוצא מן העיר ויאמרו לו הראנו נא את מבוא העיר ועשינו עמך חסד
שפטים 1 : 25 (ALEP)
כה ויראם את מבוא העיר ויכו את העיר לפי חרב ואת האיש ואת כל משפחתו שלחו
שפטים 1 : 26 (ALEP)
כו וילך האיש ארץ החתים ויבן עיר ויקרא שמה לוז--הוא שמה עד היום הזה פ
שפטים 1 : 27 (ALEP)
כז ולא הוריש מנשה את בית שאן ואת בנותיה ואת תענך ואת בנתיה ואת יושב (יושבי) דור ואת בנותיה ואת יושבי יבלעם ואת בנתיה ואת יושבי מגדו ואת בנותיה ויואל הכנעני לשבת בארץ הזאת
שפטים 1 : 28 (ALEP)
כח ויהי כי חזק ישראל וישם את הכנעני למס והוריש לא הורישו ס
שפטים 1 : 29 (ALEP)
כט ואפרים לא הוריש את הכנעני היושב בגזר וישב הכנעני בקרבו בגזר ס
שפטים 1 : 30 (ALEP)
ל זבולן לא הוריש את יושבי קטרון ואת יושבי נהלל וישב הכנעני בקרבו ויהיו למס ס
שפטים 1 : 31 (ALEP)
לא אשר לא הוריש את ישבי עכו ואת יושבי צידון ואת אחלב ואת אכזיב ואת חלבה ואת אפיק ואת רחב
שפטים 1 : 32 (ALEP)
לב וישב האשרי בקרב הכנעני ישבי הארץ כי לא הורישו ס
שפטים 1 : 33 (ALEP)
לג נפתלי לא הוריש את ישבי בית שמש ואת ישבי בית ענת וישב בקרב הכנעני ישבי הארץ וישבי בית שמש ובית ענת היו להם למס
שפטים 1 : 34 (ALEP)
לד וילחצו האמרי את בני דן ההרה כי לא נתנו לרדת לעמק
שפטים 1 : 35 (ALEP)
לה ויואל האמרי לשבת בהר חרס באילון ובשעלבים ותכבד יד בית יוסף ויהיו למס
שפטים 1 : 36 (ALEP)
לו וגבול האמרי ממעלה עקרבים--מהסלע ומעלה פ
❮
❯