יהושע 7 : 1 (ALEP)
א וימעלו בני ישראל מעל בחרם ויקח עכן בן כרמי בן זבדי בן זרח למטה יהודה מן החרם ויחר אף יהוה בבני ישראל {ס}
יהושע 7 : 2 (ALEP)
ב וישלח יהושע אנשים מיריחו העי אשר עם בית און מקדם לבית אל ויאמר אליהם לאמר עלו ורגלו את הארץ ויעלו האנשים וירגלו את העי
יהושע 7 : 3 (ALEP)
ג וישבו אל יהושע ויאמרו אליו אל יעל כל העם--כאלפים איש או כשלשת אלפים איש יעלו ויכו את העי אל תיגע שמה את כל העם כי מעט המה
יהושע 7 : 4 (ALEP)
ד ויעלו מן העם שמה כשלשת אלפים איש וינסו לפני אנשי העי
יהושע 7 : 5 (ALEP)
ה ויכו מהם אנשי העי כשלשים וששה איש וירדפום לפני השער עד השברים ויכום במורד וימס לבב העם ויהי למים
יהושע 7 : 6 (ALEP)
ו ויקרע יהושע שמלתיו ויפל על פניו ארצה לפני ארון יהוה עד הערב--הוא וזקני ישראל ויעלו עפר על ראשם
יהושע 7 : 7 (ALEP)
ז ויאמר יהושע אהה אדני יהוה למה העברת העביר את העם הזה את הירדן לתת אתנו ביד האמרי להאבידנו ולו הואלנו ונשב בעבר הירדן
יהושע 7 : 8 (ALEP)
ח בי אדני מה אמר--אחרי אשר הפך ישראל ערף לפני איביו
יהושע 7 : 9 (ALEP)
ט וישמעו הכנעני וכל ישבי הארץ ונסבו עלינו והכריתו את שמנו מן הארץ ומה תעשה לשמך הגדול
יהושע 7 : 10 (ALEP)
י ויאמר יהוה אל יהושע קם לך למה זה אתה נפל על פניך
יהושע 7 : 11 (ALEP)
יא חטא ישראל וגם עברו את בריתי אשר צויתי אותם וגם לקחו מן החרם וגם גנבו וגם כחשו וגם שמו בכליהם
יהושע 7 : 12 (ALEP)
יב ולא יכלו בני ישראל לקום לפני איביהם--ערף יפנו לפני איביהם כי היו לחרם לא אוסיף להיות עמכם אם לא תשמידו החרם מקרבכם
יהושע 7 : 13 (ALEP)
יג קם קדש את העם ואמרת התקדשו למחר כי כה אמר יהוה אלהי ישראל חרם בקרבך ישראל--לא תוכל לקום לפני איביך עד הסירכם החרם מקרבכם
יהושע 7 : 14 (ALEP)
יד ונקרבתם בבקר לשבטיכם והיה השבט אשר ילכדנו יהוה יקרב למשפחות והמשפחה אשר ילכדנה יהוה תקרב לבתים והבית אשר ילכדנו יהוה יקרב לגברים
יהושע 7 : 15 (ALEP)
טו והיה הנלכד בחרם--ישרף באש אתו ואת כל אשר לו כי עבר את ברית יהוה וכי עשה נבלה בישראל
יהושע 7 : 16 (ALEP)
טז וישכם יהושע בבקר ויקרב את ישראל לשבטיו וילכד שבט יהודה
יהושע 7 : 17 (ALEP)
יז ויקרב את משפחת יהודה וילכד את משפחת הזרחי ויקרב את משפחת הזרחי לגברים וילכד זבדי
יהושע 7 : 18 (ALEP)
יח ויקרב את ביתו לגברים וילכד עכן בן כרמי בן זבדי בן זרח--למטה יהודה
יהושע 7 : 19 (ALEP)
יט ויאמר יהושע אל עכן בני שים נא כבוד ליהוה אלהי ישראל--ותן לו תודה והגד נא לי מה עשית אל תכחד ממני
יהושע 7 : 20 (ALEP)
כ ויען עכן את יהושע ויאמר אמנה אנכי חטאתי ליהוה אלהי ישראל וכזאת וכזאת עשיתי
יהושע 7 : 21 (ALEP)
כא ואראה (וארא) בשלל אדרת שנער אחת טובה ומאתים שקלים כסף ולשון זהב אחד חמשים שקלים משקלו ואחמדם ואקחם והנם טמונים בארץ בתוך האהלי והכסף תחתיה
יהושע 7 : 22 (ALEP)
כב וישלח יהושע מלאכים וירצו האהלה והנה טמונה באהלו והכסף תחתיה
יהושע 7 : 23 (ALEP)
כג ויקחום מתוך האהל ויבאום אל יהושע ואל כל בני ישראל ויצקם לפני יהוה
יהושע 7 : 24 (ALEP)
כד ויקח יהושע את עכן בן זרח ואת הכסף ואת האדרת ואת לשון הזהב ואת בניו ואת בנתיו ואת שורו ואת חמרו ואת צאנו ואת אהלו ואת כל אשר לו וכל ישראל עמו ויעלו אתם עמק עכור
יהושע 7 : 25 (ALEP)
כה ויאמר יהושע מה עכרתנו יעכרך יהוה ביום הזה וירגמו אתו כל ישראל אבן וישרפו אתם באש ויסקלו אתם באבנים
יהושע 7 : 26 (ALEP)
כו ויקימו עליו גל אבנים גדול עד היום הזה וישב יהוה מחרון אפו על כן קרא שם המקום ההוא עמק עכור עד היום הזה {פ}
❮
❯