יהושע 13 : 1 (ALEP)
א ויהושע זקן בא בימים ויאמר יהוה אליו אתה זקנתה באת בימים והארץ נשארה הרבה מאד לרשתה
יהושע 13 : 2 (ALEP)
ב זאת הארץ הנשארת כל גלילות הפלשתים וכל הגשורי
יהושע 13 : 3 (ALEP)
ג מן השיחור אשר על פני מצרים ועד גבול עקרון צפונה--לכנעני תחשב חמשת סרני פלשתים העזתי והאשדודי האשקלוני הגתי והעקרוני והעוים
יהושע 13 : 4 (ALEP)
ד מתימן כל ארץ הכנעני ומערה אשר לצידנים--עד אפקה עד גבול האמרי
יהושע 13 : 5 (ALEP)
ה והארץ הגבלי וכל הלבנון מזרח השמש מבעל גד תחת הר חרמון--עד לבוא חמת
יהושע 13 : 6 (ALEP)
ו כל ישבי ההר מן הלבנון עד משרפת מים כל צידנים--אנכי אורישם מפני בני ישראל רק הפלה לישראל בנחלה כאשר צויתיך
יהושע 13 : 7 (ALEP)
ז ועתה חלק את הארץ הזאת בנחלה--לתשעת השבטים וחצי השבט המנשה
יהושע 13 : 8 (ALEP)
ח עמו הראובני והגדי לקחו נחלתם--אשר נתן להם משה בעבר הירדן מזרחה כאשר נתן להם משה עבד יהוה
יהושע 13 : 9 (ALEP)
ט מערוער אשר על שפת נחל ארנון והעיר אשר בתוך הנחל וכל המישר מידבא--עד דיבון
יהושע 13 : 10 (ALEP)
י וכל ערי סיחון מלך האמרי אשר מלך בחשבון--עד גבול בני עמון
יהושע 13 : 11 (ALEP)
יא והגלעד וגבול הגשורי והמעכתי וכל הר חרמון וכל הבשן--עד סלכה
יהושע 13 : 12 (ALEP)
יב כל ממלכות עוג בבשן אשר מלך בעשתרות ובאדרעי הוא נשאר מיתר הרפאים ויכם משה וירשם
יהושע 13 : 13 (ALEP)
יג ולא הורישו בני ישראל את הגשורי ואת המעכתי וישב גשור ומעכת בקרב ישראל עד היום הזה
יהושע 13 : 14 (ALEP)
יד רק לשבט הלוי לא נתן נחלה אשי יהוה אלהי ישראל הוא נחלתו כאשר דבר לו פ
יהושע 13 : 15 (ALEP)
טו ויתן משה למטה בני ראובן למשפחתם
יהושע 13 : 16 (ALEP)
טז ויהי להם הגבול מערוער אשר על שפת נחל ארנון והעיר אשר בתוך הנחל וכל המישר--על מידבא
יהושע 13 : 17 (ALEP)
יז חשבון וכל עריה אשר במישר דיבן ובמות בעל ובית בעל מעון
יהושע 13 : 18 (ALEP)
יח ויהצה וקדמת ומפעת
יהושע 13 : 19 (ALEP)
יט וקריתים ושבמה וצרת השחר בהר העמק
יהושע 13 : 20 (ALEP)
כ ובית פעור ואשדות הפסגה ובית הישמות
יהושע 13 : 21 (ALEP)
כא וכל ערי המישר וכל ממלכות סיחון מלך האמרי אשר מלך בחשבון אשר הכה משה אתו ואת נשיאי מדין את אוי ואת רקם ואת צור ואת חור ואת רבע נסיכי סיחון ישבי הארץ
יהושע 13 : 22 (ALEP)
כב ואת בלעם בן בעור הקוסם--הרגו בני ישראל בחרב אל חלליהם
יהושע 13 : 23 (ALEP)
כג ויהי גבול בני ראובן--הירדן וגבול זאת נחלת בני ראובן למשפחותם הערים וחצריהן פ
יהושע 13 : 24 (ALEP)
כד ויתן משה למטה גד לבני גד למשפחתם
יהושע 13 : 25 (ALEP)
כה ויהי להם הגבול--יעזר וכל ערי הגלעד וחצי ארץ בני עמון עד ערוער אשר על פני רבה
יהושע 13 : 26 (ALEP)
כו ומחשבון עד רמת המצפה ובטנים וממחנים עד גבול לדבר
יהושע 13 : 27 (ALEP)
כז ובעמק בית הרם ובית נמרה וסכות וצפון יתר ממלכות סיחון מלך חשבון הירדן וגבל--עד קצה ים כנרת עבר הירדן מזרחה
יהושע 13 : 28 (ALEP)
כח זאת נחלת בני גד למשפחתם הערים וחצריהם ס
יהושע 13 : 29 (ALEP)
כט ויתן משה לחצי שבט מנשה ויהי לחצי מטה בני מנשה--למשפחותם
יהושע 13 : 30 (ALEP)
ל ויהי גבולם ממחנים כל הבשן כל ממלכות עוג מלך הבשן וכל חות יאיר אשר בבשן--ששים עיר
יהושע 13 : 31 (ALEP)
לא וחצי הגלעד ועשתרות ואדרעי ערי ממלכות עוג בבשן לבני מכיר בן מנשה לחצי בני מכיר למשפחותם
יהושע 13 : 32 (ALEP)
לב אלה אשר נחל משה בערבות מואב מעבר לירדן יריחו מזרחה פ
יהושע 13 : 33 (ALEP)
לג ולשבט הלוי--לא נתן משה נחלה יהוה אלהי ישראל הוא נחלתם כאשר דבר להם ס
❮
❯