יהושע 10 : 1 (ALEP)
א ויהי כשמע אדני צדק מלך ירושלם כי לכד יהושע את העי ויחרימה--כאשר עשה ליריחו ולמלכה כן עשה לעי ולמלכה וכי השלימו ישבי גבעון את ישראל ויהיו בקרבם
יהושע 10 : 2 (ALEP)
ב וייראו מאד--כי עיר גדולה גבעון כאחת ערי הממלכה וכי היא גדולה מן העי וכל אנשיה גברים
יהושע 10 : 3 (ALEP)
ג וישלח אדני צדק מלך ירושלם אל הוהם מלך חברון ואל פראם מלך ירמות ואל יפיע מלך לכיש ואל דביר מלך עגלון--לאמר
יהושע 10 : 4 (ALEP)
ד עלו אלי ועזרני ונכה את גבעון כי השלימה את יהושע ואת בני ישראל
יהושע 10 : 5 (ALEP)
ה ויאספו ויעלו חמשת מלכי האמרי מלך ירושלם מלך חברון מלך ירמות מלך לכיש מלך עגלון--הם וכל מחניהם ויחנו על גבעון וילחמו עליה
יהושע 10 : 6 (ALEP)
ו וישלחו אנשי גבעון אל יהושע אל המחנה הגלגלה לאמר אל תרף ידיך מעבדיך עלה אלינו מהרה והושיעה לנו ועזרנו--כי נקבצו אלינו כל מלכי האמרי ישבי ההר
יהושע 10 : 7 (ALEP)
ז ויעל יהושע מן הגלגל הוא וכל עם המלחמה עמו וכל גבורי החיל פ
יהושע 10 : 8 (ALEP)
ח ויאמר יהוה אל יהושע אל תירא מהם כי בידך נתתים לא יעמד איש מהם בפניך
יהושע 10 : 9 (ALEP)
ט ויבא אליהם יהושע פתאם כל הלילה עלה מן הגלגל
יהושע 10 : 10 (ALEP)
י ויהמם יהוה לפני ישראל ויכם מכה גדולה בגבעון וירדפם דרך מעלה בית חורן ויכם עד עזקה ועד מקדה
יהושע 10 : 11 (ALEP)
יא ויהי בנסם מפני ישראל הם במורד בית חורן ויהוה השליך עליהם אבנים גדלות מן השמים עד עזקה--וימתו רבים אשר מתו באבני הברד מאשר הרגו בני ישראל בחרב ס
יהושע 10 : 12 (ALEP)
יב אז ידבר יהושע ליהוה ביום תת יהוה את האמרי לפני בני ישראל ויאמר לעיני ישראל שמש בגבעון דום וירח בעמק אילון
יהושע 10 : 13 (ALEP)
יג וידם השמש וירח עמד עד יקם גוי איביו--הלא היא כתובה על ספר הישר ויעמד השמש בחצי השמים ולא אץ לבוא כיום תמים
יהושע 10 : 14 (ALEP)
יד ולא היה כיום ההוא לפניו ואחריו לשמע יהוה בקול איש כי יהוה נלחם לישראל ס
יהושע 10 : 15 (ALEP)
טו וישב יהושע וכל ישראל עמו אל המחנה הגלגלה
יהושע 10 : 16 (ALEP)
טז וינסו חמשת המלכים האלה ויחבאו במערה במקדה
יהושע 10 : 17 (ALEP)
יז ויגד ליהושע לאמר נמצאו חמשת המלכים נחבאים במערה במקדה
יהושע 10 : 18 (ALEP)
יח ויאמר יהושע גלו אבנים גדלות אל פי המערה והפקידו עליה אנשים לשמרם
יהושע 10 : 19 (ALEP)
יט ואתם אל תעמדו--רדפו אחרי איביכם וזנבתם אותם אל תתנום לבוא אל עריהם כי נתנם יהוה אלהיכם בידכם
יהושע 10 : 20 (ALEP)
כ ויהי ככלות יהושע ובני ישראל להכותם מכה גדולה מאד--עד תמם והשרידים שרדו מהם ויבאו אל ערי המבצר
יהושע 10 : 21 (ALEP)
כא וישבו כל העם אל המחנה אל יהושע מקדה בשלום לא חרץ לבני ישראל לאיש--את לשנו
יהושע 10 : 22 (ALEP)
כב ויאמר יהושע פתחו את פי המערה והוציאו אלי את חמשת המלכים האלה--מן המערה
יהושע 10 : 23 (ALEP)
כג ויעשו כן--ויציאו אליו את חמשת המלכים האלה מן המערה את מלך ירושלם את מלך חברון את מלך ירמות את מלך לכיש את מלך עגלון
יהושע 10 : 24 (ALEP)
כד ויהי כהוציאם את המלכים האלה אל יהושע ויקרא יהושע אל כל איש ישראל ויאמר אל קציני אנשי המלחמה ההלכוא אתו קרבו שימו את רגליכם על צוארי המלכים האלה ויקרבו וישימו את רגליהם על צואריהם
יהושע 10 : 25 (ALEP)
כה ויאמר אליהם יהושע אל תיראו ואל תחתו חזקו ואמצו--כי ככה יעשה יהוה לכל איביכם אשר אתם נלחמים אותם
יהושע 10 : 26 (ALEP)
כו ויכם יהושע אחרי כן וימיתם ויתלם על חמשה עצים ויהיו תלוים על העצים עד הערב
יהושע 10 : 27 (ALEP)
כז ויהי לעת בוא השמש צוה יהושע וירידום מעל העצים וישלכם אל המערה אשר נחבאו שם וישמו אבנים גדלות על פי המערה עד עצם היום הזה ס
יהושע 10 : 28 (ALEP)
כח ואת מקדה לכד יהושע ביום ההוא ויכה לפי חרב ואת מלכה--החרם אותם ואת כל הנפש אשר בה לא השאיר שריד ויעש למלך מקדה כאשר עשה למלך יריחו ס
יהושע 10 : 29 (ALEP)
כט ויעבר יהושע וכל ישראל עמו ממקדה--לבנה וילחם עם לבנה
יהושע 10 : 30 (ALEP)
ל ויתן יהוה גם אותה ביד ישראל ואת מלכה ויכה לפי חרב ואת כל הנפש אשר בה לא השאיר בה שריד ויעש למלכה כאשר עשה למלך יריחו ס
יהושע 10 : 31 (ALEP)
לא ויעבר יהושע וכל ישראל עמו מלבנה--לכישה ויחן עליה וילחם בה
יהושע 10 : 32 (ALEP)
לב ויתן יהוה את לכיש ביד ישראל וילכדה ביום השני ויכה לפי חרב ואת כל הנפש אשר בה--ככל אשר עשה ללבנה פ
יהושע 10 : 33 (ALEP)
לג אז עלה הרם מלך גזר לעזר את לכיש ויכהו יהושע ואת עמו עד בלתי השאיר לו שריד
יהושע 10 : 34 (ALEP)
לד ויעבר יהושע וכל ישראל עמו מלכיש--עגלנה ויחנו עליה וילחמו עליה
יהושע 10 : 35 (ALEP)
לה וילכדוה ביום ההוא ויכוה לפי חרב--ואת כל הנפש אשר בה ביום ההוא החרים ככל אשר עשה ללכיש פ
יהושע 10 : 36 (ALEP)
לו ויעל יהושע וכל ישראל עמו מעגלונה--חברונה וילחמו עליה
יהושע 10 : 37 (ALEP)
לז וילכדוה ויכוה לפי חרב ואת מלכה ואת כל עריה ואת כל הנפש אשר בה לא השאיר שריד ככל אשר עשה לעגלון ויחרם אותה ואת כל הנפש אשר בה ס
יהושע 10 : 38 (ALEP)
לח וישב יהושע וכל ישראל עמו דברה וילחם עליה
יהושע 10 : 39 (ALEP)
לט וילכדה ואת מלכה ואת כל עריה ויכום לפי חרב ויחרימו את כל נפש אשר בה לא השאיר שריד כאשר עשה לחברון כן עשה לדברה ולמלכה וכאשר עשה ללבנה ולמלכה
יהושע 10 : 40 (ALEP)
מ ויכה יהושע את כל הארץ ההר והנגב והשפלה והאשדות ואת כל מלכיהם--לא השאיר שריד ואת כל הנשמה החרים כאשר צוה יהוה אלהי ישראל
יהושע 10 : 41 (ALEP)
מא ויכם יהושע מקדש ברנע ועד עזה ואת כל ארץ גשן ועד גבעון
יהושע 10 : 42 (ALEP)
מב ואת כל המלכים האלה ואת ארצם לכד יהושע פעם אחת כי יהוה אלהי ישראל נלחם לישראל
יהושע 10 : 43 (ALEP)
מג וישב יהושע וכל ישראל עמו אל המחנה הגלגלה פ
❮
❯