יואל 2 : 1 (ALEP)
א תקעו שופר בציון והריעו בהר קדשי--ירגזו כל ישבי הארץ כי בא יום יהוה כי קרוב
יואל 2 : 2 (ALEP)
ב יום חשך ואפלה יום ענן וערפל כשחר פרש על ההרים עם רב ועצום--כמהו לא נהיה מן העולם ואחריו לא יוסף עד שני דור ודור
יואל 2 : 3 (ALEP)
ג לפניו אכלה אש ואחריו תלהט להבה כגן עדן הארץ לפניו ואחריו מדבר שממה וגם פליטה לא היתה לו
יואל 2 : 4 (ALEP)
ד כמראה סוסים מראהו וכפרשים כן ירוצון
יואל 2 : 5 (ALEP)
ה כקול מרכבות על ראשי ההרים ירקדון--כקול להב אש אכלה קש כעם עצום ערוך מלחמה
יואל 2 : 6 (ALEP)
ו מפניו יחילו עמים כל פנים קבצו פארור
יואל 2 : 7 (ALEP)
ז כגבורים ירצון כאנשי מלחמה יעלו חומה ואיש בדרכיו ילכון ולא יעבטון ארחותם
יואל 2 : 8 (ALEP)
ח ואיש אחיו לא ידחקון גבר במסלתו ילכון ובעד השלח יפלו לא יבצעו
יואל 2 : 9 (ALEP)
ט בעיר ישקו בחומה ירצון--בבתים יעלו בעד החלונים יבאו כגנב
יואל 2 : 10 (ALEP)
י לפניו רגזה ארץ רעשו שמים שמש וירח קדרו וכוכבים אספו נגהם
יואל 2 : 11 (ALEP)
יא ויהוה נתן קולו לפני חילו--כי רב מאד מחנהו כי עצום עשה דברו כי גדול יום יהוה ונורא מאד ומי יכילנו
יואל 2 : 12 (ALEP)
יב וגם עתה נאם יהוה שבו עדי בכל לבבכם ובצום ובבכי ובמספד
יואל 2 : 13 (ALEP)
יג וקרעו לבבכם ואל בגדיכם ושובו אל יהוה אלהיכם כי חנון ורחום הוא--ארך אפים ורב חסד ונחם על הרעה
יואל 2 : 14 (ALEP)
יד מי יודע ישוב ונחם והשאיר אחריו ברכה--מנחה ונסך ליהוה אלהיכם פ
יואל 2 : 15 (ALEP)
טו תקעו שופר בציון קדשו צום קראו עצרה
יואל 2 : 16 (ALEP)
טז אספו עם קדשו קהל קבצו זקנים--אספו עוללים וינקי שדים יצא חתן מחדרו וכלה מחפתה
יואל 2 : 17 (ALEP)
יז בין האולם ולמזבח יבכו הכהנים משרתי יהוה ויאמרו חוסה יהוה על עמך ואל תתן נחלתך לחרפה למשל בם גוים--למה יאמרו בעמים איה אלהיהם
יואל 2 : 18 (ALEP)
יח ויקנא יהוה לארצו ויחמל על עמו
יואל 2 : 19 (ALEP)
יט ויען יהוה ויאמר לעמו הנני שלח לכם את הדגן והתירוש והיצהר ושבעתם אתו ולא אתן אתכם עוד חרפה בגוים
יואל 2 : 20 (ALEP)
כ ואת הצפוני ארחיק מעליכם והדחתיו אל ארץ ציה ושממה--את פניו אל הים הקדמני וספו אל הים האחרון ועלה באשו ותעל צחנתו--כי הגדיל לעשות
יואל 2 : 21 (ALEP)
כא אל תיראי אדמה גילי ושמחי כי הגדיל יהוה לעשות
יואל 2 : 22 (ALEP)
כב אל תיראו בהמות שדי כי דשאו נאות מדבר כי עץ נשא פריו תאנה וגפן נתנו חילם
יואל 2 : 23 (ALEP)
כג ובני ציון גילו ושמחו ביהוה אלהיכם כי נתן לכם את המורה לצדקה ויורד לכם גשם מורה ומלקוש--בראשון
יואל 2 : 24 (ALEP)
כד ומלאו הגרנות בר והשיקו היקבים תירוש ויצהר
יואל 2 : 25 (ALEP)
כה ושלמתי לכם את השנים אשר אכל הארבה הילק והחסיל והגזם חילי הגדול אשר שלחתי בכם
יואל 2 : 26 (ALEP)
כו ואכלתם אכול ושבוע והללתם את שם יהוה אלהיכם אשר עשה עמכם להפליא ולא יבשו עמי לעולם
יואל 2 : 27 (ALEP)
כז וידעתם כי בקרב ישראל אני ואני יהוה אלהיכם ואין עוד ולא יבשו עמי לעולם פ
❮
❯